“OBEWA mwanamukazhi.” Yesu byo byo aitanga banabakazhi bimye bimo. Kimye Yesu kyo abukilenga muntu wakolelwe pa myaka 18 wakonkometu wabulanga kwinuka, wamwambijile’mba: “Obewa mwanamukazhi, kikola kyobe kyapwa.” (Luka 13:10-13) Kabiji Yesu waingijishanga kino kyambo pa kwisamba ne bainanji, mambo ino ñambilo yamweshanga mushingi mu kimye kyanembejilwemo Baibolo. (Yoa. 19:26; 20:13) Bino kwajinga kyambo kikwabo kya mushingi kyakijile pa kino.

Baibolo wingijisha bingi kyambo kya lusa ne kifyele pa kwamba pa banabakazhi bamo. Yesu wikingijishe kimye kyo esambilenga na mwanamukazhi wakolelwe kikola kya kupita mashi pa myaka 12. Jishinda jo aishijilemo kwi Yesu uno mwanamukazhi kechi bejiswishishe mu Mizhilo ya Lesa ne, mambo muntu wakolelwe kino kikola wajinga wa muzhilo. Mwayijile mizhilo uno mwanamukazhi wafwainwe kwikala kwa bunke. (Levi 15:19-27) Bino uno mwanamukazhi kechi byo byo aubile ne. “Wamanamine bingi ku bashayuka ba michi bavula kabiji wapaine bintu byanji byonse bino kafwako bukwasho bwafuminemo ne, pakuba kikola kyaswezhezhe ne kuswezha.”—Mako 5:25, 26.

Uno mwanamukazhi waishile kunyuma ya kwa Yesu ne kukwata ku nsenkebele ya kivwalo kyanji kya peulu, kabiji ponkapotu kikola kyanji kya kupita mashi kyapwile. Uno mwanamukazhi walangulukilenga’mba usakunyema kwa kubula kumumona, bino Yesu waipwizhe’mba: “Ñanyi waji kunkwata?” (Luka 8:45-47) Ponkapo, uno mwanamukazhi waakaminwe ne kutendeka kuzakama, wafukamine kwi Yesu “ne kumubuula bishinka byonse.”—Mako 5:33.

Pa kuba’mba amukwashe kubula kumvwa moyo, Yesu waambile na lusa amba: “Kwakamwa ne, mwanami.” (Mat. 9:22) Kwesakana na byaamba bashayuka ba Baibolo, kyambo kya Kihebelu ne Kingiliki kya kuba’mba “mwanami” kimwesha “lusa ne kifyele.” Yesu watwajijile na kumutekenesha byo amwambijile’mba: “Lwitabilo lobe lwakulengela kubukwa. Yanga mu mutende, kabiji kikola kyobe kyatama kipwe.”—Mako 5:34.

“Mwanami.” Mwina Isalela waji nonshi aye Boaza byo byo aambijile Luta mwina Moabu. Luta kechi wakasulukile ne, mambo wapupwilenga mbaale mu bujimi bwa mwanamulume ye abujile kuyuka. Boaza wamwambijile’mba: “Pano umvwa mwanami.” Kabiji wamutundaikile kutwajijila kupupula kajo mu majimi anji. Luta wafukamine kwi Boaza wakinka ne kilungi kyanji panshi, kabiji wamushikishe ene mambo o amubijile bibusa ne kumuta muchima, saka afumine ku kyalo kingi. Boaza wamukumbwile’mba: “Bambuujile bintu byonse byo waubijile bako bobe ba bakazhi [ba Naomi bafwijilwe] . . . Yehoba akupeshe na mambo a byo wauba.”—Luta 2:8-12.

Bakulumpe mu kipwilo bafwainwa kulondelanga byaubile Yesu ne Boaza. Kimye kimo bakulumpe mu kipwilo babiji bakonsha kwisamba na mwanamukazhi mwina Kilishitu ubena kukeba bukwasho bwa mu Binembelo. Panyuma ya kulomba kwi Yehoba ne kuteleka ku bibena kwibabuula nyenga, bakulumpe mu kipwilo bakonsha kumutekenesha kwingijisha Mambo a Lesa.—Loma 15:4.