1-3. Ñanyi bintu byakonsheshe kulengela Yodia ne Shinchike kupusenamo, kabiji makatazho a uno mutundu twakonsha kwiachinuzhuka byepi? (Monai kipikichala kitanshi.)

BAKALUME ba Yehoba banemeka bingi buku wazhila wa Lesa, Baibolo. Na mambo a kuba’mba twi bambulwa kulumbuluka, atweba bonse betufundako na lujimuno lwa mu Binembelo. Tuba byepi inge betufundako? Langulukai pa byaubile bena Kilishitu ba mu myaka kitota kitanshi ba Yodia ne Shinchike. Bano banabakazhi bashingwa baikele na makatazho akatampe. Ñanyi makatazho onkao? Baibolo kechi wiatongola ne. Pano pa kuba’mba tumvwishe, langulukai pa kino kifwanyikizho.

² Kampe Yodia waichile balongo ne banyenga ku nzubo yanji kuba’mba bajiile pamo kajo ne kwisamba. Shinchike kechi bamwichileko ne, bino waumvwine kuba’mba kwawamine bingi. Shinchike kampe waambile’mba: ‘Nakumya bingi Yodia pa kubula kungitako. Nalangulukanga’mba twi balunda.’ Shinchike walangulukilenga’mba Yodia kechi wamutemwa ne, kabiji kechi wakebelenga kupwanañana nanji ne. Onkao mambo, Shinchike naye wanengezhezhe  kijiilo ne kwitako balongo ne banyenga bonka bo baichile kwi Yodia, bino Yodia aye kumwitako ne. Luno lukatazho lwabo lwakonsheshe kuvulañanya mutende wa kipwilo kyonse. Baibolo kechi witubuulapo byafuminemo ne, pano bino, bano banyenga kyamweka bakookejile lujimuno lwa mutumwa Paulo.—Fili. 4:2, 3.

³ Makatazho a uno mutundu bimye bimo ataanwa ne mu bipwilo bya Bakamonyi ba kwa Yehoba lelo jino. Nangwa byonkabyo, twakonsha kupwisha ano makatazho nangwa kwiachinuzhuka inge ketulondele lujimuno luji mu Mambo a Lesa, Baibolo. Kabiji inge twanemeka Buku wa Yehoba tukalondelanga mikambizho ijimo.—Sala. 27:11.

4, 5. Ñanyi lujimuno luji mu Mambo a Lesa lwaamba pa kufwomona bukaji?

⁴ Kyakatazha bingi kufwomona bukaji inge twamona’mba betuba nshiji. Kyakonsha kwitukola bingi ku muchima inge kya kuba betutala bibi na mambo a kisho kyetu, kikoba nangwa mwekelo. Kikilamo ne kukola ku muchima inge kya kuba mukwetu mwina Kilishitu ye ubena kwituba bino. Nanchi mu Mambo a Lesa muji lujimuno lwakonsha kwitukwasha kuchinchika bino byubilo bya bumbulwa kulumbuluka nyi?

⁵ Yehoba wayuka kyakonsha kumweka inge bantu bakankalwa kufwomona bukaji. Wituyuka bulongo byo tuji. Milanguluko yetu yakonsha kwitulengela kwamba byambo byakonsha kwitulengela kwilangulusha kulutwe. Onkao mambo, kyawama bingi kulondela lujimuno lwa mu Baibolo pa kuba’mba tufwomone bukaji ne kuchinuzhuka kuzhingila bukiji. (Tangai Byambo bya Maana 16:32; Musapwishi 7:9.) Atweba bonse twafwainwa kwibikako kubula kuzhingila bukiji ne kulekelako bakwetu mambo. Yehoba ne Yesu banemeka bingi kwilekelako mambo. (Mat. 6:14, 15) Nanchi mwamona kuba’mba mwafwainwa kutekanya ne kulekelangako bakwenu mambo nyi?

6. Mambo ka o twafwainwa kuchinuzhukilanga bukaji?

⁶ Bantu bakankalwa kufwomona bukaji bazhingila bingi. Kabiji kino kilengela bakwabo kwibachiina. Muntu wa bukaji wakonsha kulengela ne bakwabo mu kipwilo kwikala na bino byubilo byatama. Kimye kimo wakonsha kufya bukaji bwanji nangwatu lupato, bino ‘bikasoloka ku kipwilo.’ (Maana 26:24-26) Bakulumpe mu kipwilo bakonsha kukwasha bantu baji na bino byubilo kuyuka’mba bukaji, lupato, ne mfika kechi byafwainwa kwikala na bantu baji mu jibumba ja Lesa ne. Buku wa Yehoba kechi wapita mu mbaji pa kwamba pa bino ne. (Levi 19:17, 18; Loma 3:11-18) Nanchi mulondela byaamba Baibolo nyi?

7, 8. (a) Yehoba utangijila byepi lubaji lwa pano pa ntanda lwa jibumba janji? (b) Ñanyi mikambizho imo itaanwa mu Mambo a Lesa, kabiji mambo ka o twafwainwa kwiikookela?

⁷ Yehoba utangijila ne kufunjisha lubaji lwa pano pa ntanda lwa jibumba janji. Watongola Kilishitu kwikala “mutwe wa kipwilo,” kabiji Kilishitu watongola “kalume wa kishinka kabiji wa maana” kufunjisha ne kutangijila bantu ba Lesa. (Mat. 24:45-47; Efi. 5:23) Byonka byaubile jibumba jatangijilanga mu myaka kitota kitanshi, kalume wa kishinka waswa byamba Mambo a Lesa anembelwe na lutangijilo lwa mupashi kabiji wianemeka bingi. (Tangai 1 Tesalonika 2:13.) Ñanyi mikambizho imo iji mu Baibolo itukwasha?

⁸ Baibolo witukambizha kupwilanga kimye kyonse. (Hebe. 10:24, 25) Kabiji witutundaika kukwatankana. (1 Ko. 1:10) Mambo a Lesa etukambizha kutangizhako Bufumu patanshi  mu bwikalo bwetu. (Mat. 6:33) Kabiji Binembelo bitukambizha kusapwila ku nzubo ku nzubo, ku mapunzha kutaanwa bantu bavula, ne kwingilako busapwishi bwa kushukilwa. (Mat. 28:19, 20; Byu. 5:42; 17:17; 20:20) Buku wa Lesa wakambizha bakulumpe kumona kuba’mba mu kipwilo kechi muji byubilo byatama ne. (1 Ko. 5:1-5, 13; 1 Timo. 5:19-21) Kabiji Yehoba wakambizha bantu banji kwikala ba butooto ne kuchinuzhuka milanguluko ne byubilo byo ashikwa.—2 Ko. 7:1.

9. Ñanyi jishinda Yesu jo abena kwingijisha pa kwitukwasha kumvwisha Mambo a Lesa?

⁹ Bamo balanguluka’mba bakonsha kumvwisha biji mu Baibolo bunke bwabo. Pano bino, Yesu watongola “kalume wa kishinka” kwikala jishinda jo apainamo kajo ka ku mupashi. Kutendeka mu mwaka wa 1919, Yesu Kilishitu ubena kwingijisha uno kalume kukwasha baana banji ba bwanga kumvwisha byaamba Buku wa Lesa ne kukookela mikambizho ijimo. Inge ketukookele mikambizho iji mu Baibolo, tulengela kipwilo kwikala kyatooka, kya mutende kabiji kyakwatankana. Atweba bonse pa muntu pa muntu twafwainwa kwishikisha’mba, ‘Nanchi nkookela mikambizho ifuma ku kalume wa kishinka nyi?’

10. Lubaji lwa mwiulu lwa jibumba ja Yehoba belulumbulula byepi mu buku wa Ezikyo?

¹⁰ Mambo a Yehoba etukwasha kuyuka lubaji lwa mwiulu lwa jibumba janji. Ngauzhi Ezikyo wamwene mu kimwesho kalaki mukatampe wimenako lubaji lwa mwiulu lwa jibumba ja Lesa. (Ezi. 1:4-28) Yehoba ye wendesha uno kalaki, kabiji uno kalaki uya konse ko bamutangijila ku mupashi. Lubaji lwa mwiulu lwa jibumba janji lukwasha lubaji lwa pano pa ntanda. Kine, uno kalaki ubena kwenda. Akilangulukai pa lupimpu lwaubiwa mu jibumba ja Lesa pa myaka 10 yapitapo. Vulukainga kuba’mba Yehoba ye ubena kuleta luno lupimpu. Byo kwashalatu kimye kicheche kuba’mba Kilishitu ne bamalaika bazhila bonaune ino ntanda ibi, kalaki wa Yehoba ubena kunyema kuba’mba abingishe bumfumu bwanji ne kuzhijika jizhina janji jazhila.

11, 12. Ñanyi bintu bimo bibena kwingila jibumba ja Yehoba?

¹¹ Langulukai pa bintu bibena kuba lubaji lwa pano pa ntanda lwa jibumba ja Lesa mu ano moba a kupelako. Mwingilo wa kushimika. Bamingilo bavula bapayankene bingi na kushimika ofweshi mukatampe wa ntanda yonse wa Bakamonyi ba kwa Yehoba wa katataka ku Warwick, New York, U.S.A. Dipatimenti wa Buntungi wa Ntanda Yonse utangijila bamingilo bepana bavula bingi mwaya ntanda yonse kushimika Mazubo a Bufumu a katataka ne kubayisha maofweshi a musampi. Tubena kusanchila bingi balongo ne banyenga bepana kwingila ino mingilo. Vulukainga kuba’mba Yehoba ubena kupesha basapwishi ba Bufumu mwaya ntanda yonse bapanako bupe bwa kukwasha ino mingilo.—Luka 21:1-4.

 ¹² Masukulu. Akilangulukai pa masukulu apusana pusana afunjisha bantu bya kwingila mwingilo wa Lesa. (Isa. 2:2, 3) Tuji na Sukulu wa Mwingilo wa Bupainiya, Sukulu wa Basapwishi ba Bufumu, Sukulu wa Gileada, Sukulu wa ba pa Betele, Sukulu wa Bakalama ba Mwanzo ne Bakazhi Babo, Sukulu wa Bakulumpe mu Kipwilo, Sukulu wa Mwingilo wa Bufumu ne Sukulu wa Baji mu Kavoto ka Musampi ne Bakazhi Babo. Yehoba watemwa bingi kufunjisha bantu banji. Pa keyala wetu wa pa Intaneti wa jw.org paji mabuku mu milaka yavula bingi, kabiji uno keyala ukwasha bantu kufunda Baibolo. Pa uno keyala paji bipungu byawama bya baana ne bisemi ne kipungu kya masawakya. Nanchi mwingijisha jw.org mu mwingilo wa kusapwila ne pa kupopwela kwa kisemi nyi?

13. Bapopweshi ba Yehoba ba kishinka bafwainwa kuba byepi?

¹³ Ke munema mukatampe kwikala mu jibumba ja Yehoba. Kuyuka mizhilo ya Lesa ne byo akeba kwitulengela kuba byawama ne kutumbijika bumfumu bwanji. Ino ntanda byo ibena kuyatu na kutaminako, twafwainwa ‘kushikwa byatama,’ byonka Yehoba byo ebishikwa. (Sala. 97:10) Kechi tukeba kwikala nobe bantu babula kwakamwa Lesa bamba “byawama amba byatama, ne byatama amba byawama” ne. (Isa. 5:20) Na mambo a kuba’mba tukeba kutokesha Lesa ku muchima, twibikako kwikala batooka ku mubiji, ne kuchinuzhuka bintu byatama byakonsha konauna bulunda bwetu na Lesa. (1 Ko. 6:9-11) Twatemwa Yehoba kabiji twamuketekela; tumwesha bukishinka bwetu kwi aye kupichila mu kulondela mizhilo yanembwa mu Buku wanji. Kabiji twingila na ngovu kukookela ino mizhilo pa mazubo etu, mu kipwilo, pa nkito, ku sukulu, ne konsetu ko tutaanwa. (Maana 15:3) Akimonai mashinda akwabo mo twakonsha kumweshesha’mba twi ba kishinka kwi Lesa.

14. Bansemi bena Kilishitu bamwesha byepi amba ba kishinka kwi Lesa?

¹⁴ Kukomesha baana. Bansemi bena Kilishitu bamwesha bukishinka kwi Yehoba kupichila mu kufunjisha baana babo Mambo anji. Bansemi bakamwa Lesa kechi balondela bisho bya bantu ba ku mpunzha ko bekala pa kukomesha baana babo ne. Mupashi wa ntanda kechi wafwainwa kwikala mu mazubo a bena Kilishitu ne. (Efi. 2:2) Nsemi wa mulume wabatizhiwa kechi wafwainwa kwamba’mba, ‘Mu kisho kyetu banabakazhi bo bafunjisha baana’ ne. Baibolo waambatu patoka amba: “Anweba bashetu, . . . bakomeshainga [baana benu] mu kwibajimuna ne kwibafunjisha maana [lutangijilo; mafunde] a Yehoba.” (Efi. 6:4; tubyambo twa munshi) Bashetu ne bainetu bakamwa Lesa bakeba baana babo kwikala byonka byajinga Samwela, mambo Yehoba wajinga nanji byo akomenenga.—1 Sam. 3:19.

15. Tumwesha byepi amba twi ba kishinka kwi Yehoba pa kufuukula bintu bikatampe?

¹⁵ Kufuukula bya kuba. Pa kufuukula bya kuba mu bwikalo, tumwesha’mba twi ba kishinka kwi Lesa kupichila mu kukeba bukwasho mu Mambo anji ne ku jibumba janji. Pa kuba’mba mumvwishe buneme bwa kuba bino, langulukai pa bintu byuba bansemi bavula. Bantu bavula bavilukila mu byalo bikwabo, batemwa kutuma baana ba bacheche ku balongo babo kuba’mba bakebalamineko pa kuba’mba abo bakebenga mali avula mu kyalo kyo bavilukilamo. Ibyo kuba’mba muntu mwine ye wafwainwa kufuukulapo kuba bino, pano bino, twafwainwa kuyuka’mba Lesa uketutotolwesha pa byo tufuukulapo. (Tangai Loma 14:12.) Nanchi kijitu bulongo  kufuukula bintu bikatampe byakunza kisemi ne nkito kwa kubula patanshi kumona byaamba Baibolo nyi? Ine! Twafwainwa kulomba bukwasho bwa Shetu wa mwiulu mambo kechi tuji na luusa lwa kwitangijila atweba bene ne.—Yele. 10:23.

16. Inetu umo byo asemene mwana, wafuukwilepo kuba byepi, kabiji ki ka kyamukwashishe kufuukulapo bulongo?

¹⁶ Inetu umo wasemene mwana wamulume saka ekala ku kyalo kingi, wafuukwilepo kutuma mwana kwabo kuba’mba bakamulamenga ku bankambo yanji. Kimyetu kyasemenwe mwana, Kamonyi wa kwa Yehoba watendekele kufunjisha uno mwanamukazhi Baibolo. Wafunjile’mba ke mwingilo wanji wamupa Lesa wa kufunjisha mwana kuyuka Yehoba. (Sala. 127:3; Maana 22:6) Uno inetu walombele kwi Yehoba, byonka bitubuula Binembelo kuba. (Sala. 62:7, 8) Kabiji wabuujile wamufunjishanga Baibolo byonse byajinga ku muchima wanji kabiji wisambanga ne na bakwabo ba mu kipwilo. Nangwa kya kuba balongo banji ne balunda nanji bamukanjikizhenga kutuma mwana ku bankambo yanji, aye wakaine kuba’mba kechi kyawama kuba byobyo ne. Mwatawanji waumvwine bingi bulongo pa kumona kipwilo byo kyakwashishe mukazhanji ne mwananji kya kuba naye waswile kufunda Baibolo kabiji watatwile kuya na kupwila pamo na mukazhanji ne mwana. Nanchi mwalanguluka’mba uno inetu wamwene’mba Yehoba wakumbula milombelo yanji nyi? Kwa kubula nangwa kuzhinaukatu ne, byo byo amwene.

17. Ñanyi mukambizho ye twatambula kutazha ku bantu bo tufunjisha Baibolo?

¹⁷ Kukookela mikambizho. Jishinda janema ja kumwesheshamo bukishinka kwi Lesa ke kukookela mikambizho ifuma ku jibumba janji. Akilangulukai pa mashinda o betubuula a kulondela pa kufunjisha bantu Baibolo. Betukambizha kuba’mba aku tutendekatu kufunjisha muntu Baibolo kwingijisha buku wa Nanchi Baibolo Waamba’mba Ka? twafwainwa kwikalangako na kakimye ka kukwasha ye tufunjisha kuyuka jibumba ja Lesa. Twakonsha kuba bino kupichila mu kwingijisha vidyo wa kuba’mba Ñanyi Bintu Byubiwa pa Nzubo ya Bufumu? ne buloshuwa wa kuba’mba Bañanyi Babena Kuba Kyaswa Muchima wa Yehoba Lelo Jino? Inge twapwisha kufunjisha muntu kwingijisha buku wa Nanchi Baibolo Waamba’mba Ka?, twafwainwa kutuntulukila mu buku wa “kalai mu Butemwe bwa Lesa” nangwatu inge wabatizhiwa. Jibumba ja Lesa jitubuula kuba bino pa kuba’mba baana ba bwanga ba katataka ‘bakoselemo mu lwitabilo.’ (Kolo. 2:7) Nanchi mubena kulondela ino mikambizho ifuma ku jibumba ja Yehoba nyi?

18, 19. Ñanyi bishinka bimo byafwainwa kwitulengela kusanchila Yehoba?

¹⁸ Tuji na bishinka byavula bingi byafwainwa kwitulengela kusanchila Yehoba. Ye witupa bumi, kwa kubula aye inge tufwako. (Byu. 17:27, 28) Witupa bupe bwanema bingi, buku wanji, Baibolo. Tumona Baibolo amba Mambo a Lesa byonkatu bena Kilishitu ba mu Tesalonika byo beatambwijile.—1 Tesa. 2:13.

¹⁹ Na mambo a kuba tuji na Mambo a Lesa, tufwenya kwipi ne Yehoba, kabiji ne aye ufwenya kwipi ne atweba. (Yako. 4:8) Shetu wa mwiulu witupa munema mukatampe wa kwikala mu jibumba janji. Tumusanchila bingi pa kino. Nyimbi wa masalamo waimbile’mba: “Musanchilai Yehoba, mambo wawama; butemwe bwanji bubula kwaluka bo bwa myaka ne myaka.” (Sala. 136:1) Mu Salamo 136, byambo bya kuba’mba “butemwe bwanji bubula kwaluka bo bwa myaka ne myaka” bitaanwamo bimye 26. Umvwe twatwajijila kwikala ba kishinka kwi Yehoba ne ku jibumba janji, tukemwena kufika kwa bino byambo, mambo tukekala myaka ne myaka!