1, 2. Lumbululai ene mambo kutundaika bakwetu o kwanemena.

CRISTINA uji na myaka 18 waambile’mba: “Bansemi bami kechi bantundaikangapo ne, bino batemenwe bingi kunnena. Kabiji bañambilanga byambo byatama bingi. ^[1] Bañambilanga’mba kechi nakoma mu maana ne, kechi nkayuka bintu ne, kabiji amba nabayisha. Onkao mambo, naendangatu na kujila kabiji kechi nakebanga ne kwisamba nabo ne. Kino kyandengelanga kwilengulula.” Bwikalo bukatazha bingi inge kechi bakutundaika ne.

² Kutundaika bantu kwanema bingi. Rubén waambile’mba: “Pa myaka yavula nemonanga’mba kechi nanema ne. Bino juba jimo, mukulumpe mu kipwilo ye naingijilenga nanji mu mwingilo wamwene’mba kechi najinga na lusekelo ne. Wateleko bingi muchima byo namubuujilenga lukatazho lwami. Uno mukulumpe wankwashishe kuyuka bintu byawama byo naubilenga. Kabiji wamvulwilemo byambo bya kwa Yesu bya kuba’mba atweba bonse pa muntu pa muntu twanema kukila bwalula. Kino kinembelo kechi nekilubamo ne, kabiji kintekenesha bingi. Byambo byaambile uno mukulumpe mu kipwilo byantundaikile bingi.”—Mat. 10:31.

3. (a) Mutumwa Paulo waambilepo’mba ka pa kutundaika bakwetu? (b) Ñanyi bintu byo tusakwisambapo mu uno mutwe?

 ³ Baibolo waamba’mba twafwainwa kutundaikanga bakwetu kimye kyonse. Mutumwa Paulo wanembejile bena Kilishitu Bahebelu amba: “Balongo bami, jimukai kuchina’mba muntu nangwa umo mwi anweba wakekala na muchima watama wa kubula lwitabilo na mambo a kufuma kwi Lesa mumi; Bino pa juba pa juba saka mwitundaika anwe bene na bene, . . . pa kuba’mba muntu nangwa umo mwi anweba akabule kukosesha muchima wanji na mambo a bujimbijimbi bwa bundengamambo.” (Hebe. 3:12, 13) Mwakonsha kuyuka buneme bwa kutundaika bakwenu inge mwavuluka byo bemutundaikile kimye kyo mwapichilenga mu lukatazho. Onkao mambo, twayai twisambe pa ano mepuzho: Mambo ka kutundaika bakwetu o kwanemena? Twakonsha kufunjilako ka kwi Yehoba, Yesu ne Paulo byo batundaikanga bakwabo? Kabiji ñanyi mashinda awama o twakonsha kutundaikilamo bakwetu?

4. Bañanyi bakeba kwibatundaika, bino mambo ka bantu bavula o babujila kutundaika bakwabo?

⁴ Atweba bonse tukeba kwitutundaika, kikatakata kimye kyo tukiji banyike. Mufunjishi aye Timothy Evans waambile’mba: “Baana . . . bakeba kwibatundaika byonkatu bijimwa byo bikeba mema. Mwana inge babena kumutundaika, uyuka’mba bamunemeka.” Bino tubena kwikala mu bimye byakatazha. Bantu betemwatu bene, kechi baji na butemwe ne, kabiji bavula kechi batundaika bakwabo ne. (2 Timo. 3:1-5) Bansemi bamo kechi batundaika baana babo ne, mambo a kuba’mba bansemi babo nabo kechi bebatundaikanga ne. Bamingilo bavula bejizhanya’mba kechi bebatundaika ku bakulumpe babo ba nkito ne.

5. Mu kwitundaika mwavwangwa ka?

⁵ Mu kutundaika muntu mwavwangwa ne kumusanchila pa bintu byo auba bulongo. Twakonsha kutundaika bakwetu kupichila mu kwibabuula’mba baji na byubilo byawama nangwa kwamba byambo ‘bitekenesha aba balefulwa.’ (1 Tesa. 5:14, tubyambo twa munshi) Kyambo kya Kingiliki kyatuntululwa’mba “lutundaiko” kilumbulula “kwinyemena.” Kimye kyo twingijila pamo na balongo ne banyenga, ke kimye kyawama kya kwamba byambo bya kwibatundaika. (Tangai Musapwishi 4:9, 10.) Nanchi bakwetu bayuka ene mambo o twibatemenwa ne kwibasanchila nyi? Saka tukyangye kukumbula buno bwipuzho, patanshi twafwainwa kulanguluka pa bino byambo bya maana bya kuba’mba: “Byambo byaambiwa pa kimye kyafwainwa, byawama bingi!”—Maana 15:23.

6. Mambo ka Diabola o akebela kwitulefula? Ambai kyamwekele.

⁶ Satana Diabola ukeba kwitulefula mambo wayuka’mba jo jishinda jo akonsha kukokesheshamo bulunda bwetu na Lesa. Byambo bya Maana 24:10 byaamba’mba: “Inge walefulwa mu juba ja bya malwa, ngovu yobe ikakepa.” Satana waletejile Yoba bya malwa byapusana pusana ne kumubepela bubela uno muntu wa kishinka na mulanguluko wa kukeba kumulefula, pano bino wakankelwe. (Yoba 2:3; 22:3; 27:5) Twakonsha kushinda mingilo ya kwa Diabola kupichila mu kutundaika ba mu kisemi kyetu ne balongo ne banyenga mu kipwilo. Umvwe twatwajijila kuba bino, tukekwashanga atweba bene na bene kwikala na lusekelo mu bisemi byetu ne mu kipwilo.

7, 8. (a) Ñanyi bintu byamwekele byanembwa mu Baibolo bimwesha’mba Yehoba wanemeka kutundaika bakwetu? (b) Bansemi bakonsha kulondela byepi Yehoba? (Monai kipikichala kitanshi.)

⁷ Yehoba. Nyimbi wa masalamo waimbile’mba: “Yehoba uji kwipi na boba balajika  michima; upulusha boba balefulwa.” (Sala. 34:18, tubyambo twa munshi) Kimye Yelemiya kyo aumvwine moyo ne kulefulwa, Yehoba wakwashishe uno ngauzhi wanji wa kishinka kuchinchika. (Yele. 1:6-10) Fwanyikizhai ngauzhi wakikulumpe Danyela byo atundaikilwe Lesa byo atumine malaika kwiya na kumukosesha. Uno malaika watelele Danyela amba “muntu wanemekwa.” (Da. 10:8, 11, 18, 19) Nanchi ne anweba mwakonsha kutundaika basapwishi, bapainiya, ne balongo ne banyenga bakikulumpe babena kukankalwa kwingila byo baingilanga kala nyi?

⁸ Nangwa kya kuba Lesa waingijile pamo na Mwananji pa myaka yavula bingi, bino kimye Yesu kyo ajinga pano pa ntanda Lesa wayukile’mba wafwainwe kumutakaika ne kumutundaika. Pa bimye bibiji Yesu waumvwine jiwi ja Shanji kufuma mwiulu amba: “Uno ye Mwanami ye natemwa, mo mmwena lusekelo.” (Mat. 3:17; 17:5) Onkao mambo, Lesa watakaikile Yesu ne kumubuula’mba waingijilenga bulongo. Kyamweka Yesu watundaikilwe bingi pa bimye bibiji byo aumvwine bino byambo, ko kuba’mba kimye kyo atendekele mwingilo ne mwaka wapeleleko wa bwikalo bwanji pano pa ntanda. Kabiji Yehoba watumine malaika kuya na kukosesha Yesu kimye kyo amanaminenga bufuku bwapeleleko saka akyangye kufwa. (Luka 22:43) Umvwe twi bansemi twafwainwa kulondela byaubile Yehoba kupichila mu kutundaika baana betu kimye kyonse ne kwibatakaika inge baingila mingilo yawama. Kabiji twafwainwa kwibakwasha umvwe kebapite mu meseko pa juba pa juba ku sukulu.

9. Twakonsha kufunjilako ka kwi Yesu byo aubanga na batumwa banji?

⁹ Yesu. Bufuku Yesu bo atendekeshe Kivuluko, wamwene’mba batumwa banji bajinga na bwitote. Yesu wipelwile ne kwibovwa ku maulu, pano bino, batwajijile kwipachika pa wajinga mukulumpe pe abo; kabiji Petelo wakizhizhemo kwiketekela. (Luka 22:24, 33, 34) Pano bino, Yesu watakaikile batumwa banji ba kishinka pa kutwajijila kwikala nanji kimye kya meseko. Waambijile ne jimo kuba’mba bakengila mingilo yavula kukila ne yo aingijile, kabiji wibabuujile ne kuba’mba Lesa wibatemwa bingi. (Luka 22:28; Yoa. 14:12; 16:27) Onkao mambo, twafwainwa kwishikisha atweba bene amba, ‘Nanchi nakonsha kulondela Yesu kupichila kutakaika baana bami ne bakwetu pa bintu byawama byo boba kukila kutatu muchima pa bilubo byabo nyi?’

10, 11. Mutumwa Paulo wamwesheshe byepi amba wanemekele kutundaika bakwabo?

¹⁰ Mutumwa Paulo. Mu makalata anji, Paulo watakaikile bingi bena Kilishitu bakwabo. Waingijileko na bamo pa myaka yavula kabiji wayukile bilubo byabo, bino waambile byawama pe abo. Paulo waambile pe Timoti amba “mwanami ye natemwa kabiji wa kishinka mwi Nkambo,” kabiji waketekejile kuba’mba Timoti ukakwasha bena Kilishitu bakwabo. (1 Ko. 4:17; Fili. 2:19, 20) Kabiji mutumwa Paulo watakaikile Titusa ku kipwilo kya mu Kolinda amba “ye mukwetu kabiji twi ba mwingilo umo mu kwimwingijila.” (2 Ko. 8:23) Kyamweka Timoti ne Titusa batundaikilwe bingi byo bayukile’mba Paulo wibata bingi muchima.

¹¹ Paulo ne Banabasa babikile bumi bwabo mu kizumba byo babwelele jibiji ku mapunzha ko bebalukukile ku balwanyi babo. Nangwa kya kuba bebamanyikile bingi ku Lisitila, bino babweleleko pa kuba’mba bakatundaike baana ba bwanga bakatataka kwikala na lwitabilo lwakosa. (Byu. 14:19-22) Mu Efisesa, Paulo bamulukukile ku jibumba ja bantu bazhingijile bingi. Kinembelo kya Byubilo 20:1, 2, kyaamba’mba: “Kiwowo byo kyapwile, Paulo waichile baana ba bwanga, kabiji byo ebatundaikile ne kwibashajikapo, wayile ku Makedonya. Byo apichile mu oa mapunzha ne kutundaika bajingamo na byambo byavula,  waishile mu kyalo kya Gilisi.” Kine, Paulo wanemekele bingi kutundaika bakwabo.

12. Mambo ka o kyawamina kuya na kupwila?

¹² Shetu wa mwiulu ukeba’mba tupwilenga kimye kyonse mambo wayuka’mba jo jishinda jo twakonsha kwitundaikilamo atweba bonse ne kufunda pe aye. (Tangai Bahebelu 10:24, 25.) Byonka byaubanga baana ba bwanga ba kwa Yesu batanshi, ne atweba tupwila pamo na kufunda ne kwitundaika. (1 Ko. 14:31) Cristina ye twaambapo ku ntendekelo ya uno mutwe waambile’mba: “Butemwe bo bammwesha balongo ne banyenga ne kuntundaika byo bintu byo natemwa bingi ku kupwila. Kimye kimo inge nafika pa Nzubo ya Bufumu, ngikala bingi na bijikila. Bino banyenga bantambwila na lusekelo, bampakachilamo ne kuñambila’mba namweka bulongo. Bañambila ne kuba’mba bantemwa bingi kabiji bomvwa bulongo pa kumona byo mbena kuyilako palutwe mu mwingilo wa Lesa. Bino byambo bintundaika bingi.” Kiwama bingi inge atweba bonse ‘ketwikoseshe atwe bene na bene.’—Loma 1:11, 12.

13. Mambo ka bakalume ba Lesa babanda mu bukine o bakebewa kwibatundaika?

¹³ Bakalume ba Lesa babanda mu bukine nabo bakeba kwibatundaika. Langulukai pe Yoshua. Waingijile Lesa mu bukishinka pa myaka yavula. Pano bino, Yehoba wabuujile Mosesa kumutundaika. Waambile’mba: “Tongola Yoshua kabiji umutundaike ne kumukosesha, mambo ye ukatangilako kulutwe ya bano bantu pa kwabuka kabiji ye ukebalengela kuswana akya kyalo kyo usakumona.” (Mpitu. 3:27, 28) Yoshua wajingatu pepi kutambula mwingilo mukatampe wa kutangijila bena Isalela pa kuya na kutambula Ntanda ya Mulaye. Mu kuya kwa kimye walwile makondo avula bingi kabiji bebashinjilepo kimye kimo ku balwanyi babo. (Yosh. 7:1-9) O ene mambo o kyanemejile kumutundaika Yoshua ne kumukosesha. Onkao mambo, atweba bonse pa muntu pa muntu twafwainwa kutundaikanga bakulumpe mu kipwilo ne bakalama benda, mambo bengila mwingilo mukatampe wa kulama jitanga ja Lesa. (Tangai 1 Tesalonika 5:12, 13.) Kalama wa mwanzo umo waambile’mba: “Kimye kimo balongo betunembela makalata a kusanta pa byo bamwenamo mu kufwakasha kwetu. Kechi tutaya ano makalata ne, twiatanga inge twalefulwa. Ano makalata etutundaika bingi.”

14. Ki ka kimwesha’mba kutakaika ne kutundaika muntu kwakonsha kumulengela kumvwina lujimuno?

¹⁴ Bakulumpe mu kipwilo ne bansemi bataana kuba’mba kutakaika ne kutundaika muntu kwawama bingi inge babena kumupa lujimuno lwa mu Baibolo. Kyamweka bena Kolinda batundaikilwe bingi kutwajijila kuba kyawama Paulo byo ebatakaikile pa kulondela  lujimuno lwanji. (2 Ko. 7:8-11) Andreas, uji na baana babiji, waambile’mba: “Kutundaika baana kwibakwasha kukosesha bulunda bwabo na Lesa ne kukoma mu maana. Kwibatundaika kwibalengela kumvwina lujimuno. Nangwa kya kuba baana betu bayuka kyawama, bino kibapeelela kuba kyawama mu bwikalo bwabo umvwe ketwibatundaike.”

15. Ñanyi jishinda jo twakonsha kutundaikilamo bakwetu?

¹⁵ Sanchilainga bapopweshi bakwenu pa byo bebikako kwikala na byubilo byawama. (2 Moba 16:9; Yoba 1:8) Yehoba ne Yesu betunemeka bingi atweba bonse byo twibikako kutundaika Bufumu, nangwa kya kuba kimye kimo tukankalwa kwingila papelela bulume bwetu na mambo a makatazho. (Tangai Luka 21:1-4; 2 Kolinda 8:12.) Bakikulumpe bamo bebikako bingi kwiya na kupwila, kukumbulapo pa kimye kya kupwila ne kwingila mwingilo wa kusapwila kimye kyonse. Nanchi twibatakaika ne kwibatundaika nyi?

16. Mambo ka o twafwainwa kutwajijila na kutundaika bakwetu?

¹⁶ Tundaikainga bakwenu kimye konse. Inge mukwetu wauba kyawama, kyanema kumutakaika. Monai kyamwekejile Paulo ne Banabasa byo bajinga ku Antioka mu Pisidya. Bakulumpe ba nshinagoga bebabuujile’mba: “Anweba bakwetu, balongo, umvwe muji na byambo bya kutundaika bantu, byambai.” Paulo wibatundaikile kupichila mu kwamba jashi. (Byu. 13:13-16, 42-44) Kyanema bingi kutundaika bakwetu. Inge kimye kyonse saka tutundaika bakwetu, bakwetu nabo baketutundaika.—Luka 6:38.

17. Ñanyi jishinda jawama kutundaikilamo bakwetu?

¹⁷ Ambainga bibena kufuma panshi ya muchima ne kushinkamika. Byambo bya kutundaika ne kutakaika bakwetu byawama, bino byambo Yesu byo aambijile bena Kilishitu ba mu Tiyatila bimwesha amba washinkamikile pa kwamba. (Tangai Lumwekesho 2:18, 19.) Umvwe twi bansemi, twafwainwa kutakaika baana betu pa byo babena kwibikako kwingijila Lesa ne kwibabuula byubilo byawama byo baji nabyo. Twakonsha ne kutakaika mwanamukazhi wabula balume uji na baana pa byo abena kwibikako kukomesha baana mambo kechi kyapeela kuba byobyo ne. Kutakaika ne kutundaika bakwetu mu jino jishinda kwibakwasha bingi.

18, 19. Twafwainwa kuba byepi pa kuba’mba tutundaikenga bakwetu?

¹⁸ Yehoba kechi uketubuula muntu ye twafwainwa kutundaika byonka byo abuujile Mosesa kutundaika ne kukosesha Yoshua ne. Bino Lesa umvwa bingi bulongo inge ketutundaike bakwetu ba mu lwitabilo ne bantutu bakwabo. (Maana 19:17; Hebe. 12:12) Twakonsha kubuula mulongo waji kwamba jashi ja mvula bantu kishinka kyaji kwitufika pa muchima nangwa byo aji kwitukwasha kumvwisha kinembelo kimo. Nyenga umo wanembejile ñambi mwenyi nkalata ne kumubuula’mba: “Nangwa kya kuba mwaikeletu ne atweba pa kimye kicheche, bino byambo byenu byantekeneshe bingi ne kuntundaika. Mbena kukeba muyuke’mba jashi jo mwaambile ne mwisambo ye twajinga nanji panyuma ya kupwila byajinga bupe kufuma kwi Yehoba.”

¹⁹ Twakonsha kumonapo mashinda avula a kutundaikilamo bakwetu kukosesha bulunda bwabo na Lesa inge twalondela lujimuno lwa kwa Paulo lwa kuba’mba: “Itundaikainga ne kwikomesha anwe bene na bene, byonkatu byo mubena kuba.” (1 Tesa. 5:11) Atweba bonse tukasangajika Yehoba inge ‘pa juba pa juba saka twitundaika atwe bene na bene.’