MUTWE WA PA NKUPIKO | BIMWESHO BYAAMBA PA BYA MWIULU
Mepuzho Aamba pa bya Mwiulu
Nanchi mwakilangulukapo kala pa bilengwa bya mupashi ne ko bikala nyi? Inge byo ibyo, kechi yenu bonka ne. Bantu baambapo bingi pa uno mutwe pa myaka yavula. Bamo baitabila’mba kuji mpunzha kwikala mipashi ya bashakulu kabiji twafwainwa kwibanemeka. Kabiji bakwabo baitabila’mba bilengwa bya mupashi bikala mwiulu, muji mutende, mwikala bamalaika bavula kabiji ko kuya bantu bawama inge bafwa. Bakwabo nabo baitabila’mba mwiulu mo mwikala balesa babo.
Bantu bavula bakana kuba’mba kechi twakonsha kuyuka biji mwiulu ne, mambo kafwako wafumine mwiulu wakonsha kwitubula bya kine ne. Buno ke bubela bufiita. Mambo Yesu Kilishitu wajinga mwiulu saka akyangye kwiya pano pa ntanda. Yesu waambijile bantangi ba bupopweshi amba: “Naiya kufuma mwiulu, kechi na kuba kyaswa muchima wami ne, poso kuba kyaswa muchima wa yewa wantumine.” Onkao mambo, Yesu waambilenga pa bintu byo amwene byo aambile’mba: “Mu nzubo ya Batata muji mapunzha a kwikalamo avula.”—Yoano 6:38; 14:2.
Yesu Mwana Lesa, yenka wa jizhina ja Yehoba, “nzubo” yanji iji mwiulu. (Salamo 83:18) Kafwako muntu wakonsha kulumbulula bulongo biji mwiulu byonka byakonsha kulumbulula Yehoba ne Yesu Kilishitu ne. Bimwesho byo bamweshanga bakalume ba kishinka byasolola byavula bingi pa biji mwiulu.
Kibaaba kyalondelapo kyalumbulula byaamba Baibolo pa bimwesho byamwene bakalume ba Lesa. Byo musakutanganga pa bino bimwesho, muvulukenga kuba’mba bilengwa bya mupashi kechi twakonsha kwibimona nangwa kwibikwata ne. Onkao mambo, Lesa inge walumbulwile biji mwiulu kwesakana na moebimwena aye mwine, atweba inge kechi twakonsheshe kwibikwatankanya ne. Bino bimwesho bisakwimulengela kuyuka bulongo bekala mu “mapunzha a kwikalamo avula” aji mwiulu.
