KE KYALO kimo pa byalo byakepa bingi. Kino kyalo kyaikela mu mitumba iji pakachi ka kyalo kya Switzerland ne Austria. Myaka ya kala, bena Celt, bena Rhaetia, bena Loma, ne bena Alemanni bo baikalanga mu kino kibunji. Lelo jino, kukila pa kichika kya bantu bekala mu Liechtenstein baana ba bena Alemanni, baishile mu kino kibunji pa myaka nobe 1,500 yapitapo.

Kijeomani ye mulaka ye bengijisha bonse mu Liechtenstein, pano bino, ntelelo ya byambo yapusana pusana monka mwapusena mizhi. Kajo katemwa bena Liechtenstein kaji mu mitundu ibiji. Kamo bekatela’mba Tüarka-Rebel ko balenga kwingijisha mataba, kakwabo bekatela’mba Käsknöpfle ko balenga kwingijisha mukaka wachimba.

Benyi baya mu kino kyalo bamona mitumba yo bavweta ku sino, misanza muji nsono ya munyemvu, majimi a miñanzañanza ne bijimwa bikwabo byapusana pusana. Mu kino kyalo muji mitundu 50 ya maluba a mungye. Bena Liechtenstein baji ne na mapunzha mo basungila bintu bya kala ne mo balamina malwa. Mu kimye kya kyuya nangwa mu kimye kya mashika, bantu beya na kumona bilengwa na Lesa.

 Bakamonyi ba kwa Yehoba batendekele kusapwila mu Liechtenstein kutendeka mu ma 1920. Pa kino kimye, mu kino kyalo muji Bakamonyi nobe 90, bafunjisha Baibolo ku bantu ba mu kino kyalo ne benyi.