Ñanyi Bintu byo Mwayuka pa Bakamonyi ba kwa Yehoba nyi?

JIZHAI

Mwitumona na kusapwila. Kampe mwatangapo kala byambo byaamba pe atweba mu mapepala a byambo nangwa bantu bamo bemubuulapo bintu bimo pe atweba. Nanchi mwayuka byavula ba Bakamonyi ba kwa Yehoba nyi?

ESEKAI KUKUMBULA ANO MEPUZHO

Pa ino mikuku yonse kyongaipo kine nangwa bubela.

KINE BUBELA

Bakamonyi ba kwa Yehoba bena Kilishitu.
Bakamonyi ba kwa Yehoba baitabila’mba ntanda yalengelwe mu moba atanu na jimo a maola 24.
Bakamonyi ba kwa Yehoba kechi bakeba kwibabuka ku bipatela ne.
Bakamonyi ba kwa Yehoba bengijisha Baibolo yense.
Bakamonyi ba kwa Yehoba bengijishatu Baibolo wabo.
Bakamonyi ba kwa Yehoba bapimpula Baibolo kuba’mba aswañane na byo baitabilamo.
Bakamonyi ba kwa Yehoba kechi bevwanga mu mingilo ya mu kimasamasa mo bekala ne.
Bakamonyi ba kwa Yehoba balengulula bintu byaitabilamo bakwabo.

Mikumbu, monai mapa alondelapo.

1 KINE. Twibikako bingi kulondela mafunjisho ne byubilo bya kwa Yesu Kilishitu. (1 Petelo 2:21) Bino twapusanako na mabumba akwabo a bupopweshi atela’mba bena Kilishitu. Twataana kuba’mba Baibolo ufunjisha’mba Yesu Mwana Lesa; kechi ye umo pa balesa basatu ne. (Mako 12:29) Kechi twaitabila kuba’mba mweo kechi ufwa ne, kabiji kafwako kishinka kya mu Binembelo kimwesha’mba Lesa umanyika bantu mu mujilo wa helo myaka ne myaka ne. Kabiji kechi twaitabila kuba’mba aba batangijila mu bupopweshi bafwainwa kwikala na mazhina a mushingi a kwibanemeka kukila bakwabo ne.—Musapwishi 9:5; Ezikyo 18:4; Mateo 23:8-10.
2 BUBELA. Twaitabila kuba’mba Lesa ye walengele bintu byonse. Kabiji kechi twitabizha byamba bantu baitabila’mba ntanda yalengelwe mu moba atanu na jimo a maola 24 ne . Mambo ka? Mambo byo baitabilamo byapusana na bifunjisha Baibolo. Bano bantu baitabila’mba moba atanu na jimo o balengejilemo ntanda, ke moba a maola 24. Bino, mu Baibolo, kyambo kya “juba” kilumbulula myaka yavula. (Ntendekelo 2:4; Salamo 90:4) Kabiji bano bantu bafunjisha’mba ntanda yaikalatu myaka icheche. Bino Baibolo waamba’mba ntanda ne jiulu byajingako Lesa saka akyangye kwingijisha oa moba atanu na jimo kulengelamo bintu. ¹—Ntendekelo 1:1.
3 BUBELA. Tuswa muchi ye betupa ku bipatela. Kabiji bamo twi badokotala byonka byajinga mwina Kilishitu wa mu kitota kitanshi, Luka. (Kolose 4:14) Bino kechi tuswa kwitubuka mu jishinda jilwañana na mafunde a mu Baibolo ne. Kechi tuswa kwitubika mashi ne, mambo Baibolo wakanya kuja mashi.—Byubilo 15:20, 28, 29.

Tukeba bingi mashinda awama a kwitubukilamo pamo na bisemi byetu. Inge twakolwa tuya na kumona badokotala bayuka kubuka muntu kwakubula kumubika mashi. Mashinda awama o babukilamo Bakamonyi bakolwa kwa kubula kwibabika mashi, babena kwiengijisha kubukilamo ne bantu bakwabo. Mu byalo byavula bantu bakolwa basalapo kubula kwibabika mashi kuchinuzhuka bikola bisambukila kupichila mu mashi, bikokesha bukikizhi bwa mubiji ne makatazho akwabo.
4 KINE. Twaitabila’mba Baibolo yense wanembelwe “na lutangijilo lwa mupashi wa Lesa.” (2 Timoti 3:16) Ko kuba’mba Lulayañano lwa Kala ne Lulayañano Lupya. Tutela Lulayañano lwa kala amba Binembelo bya Kihebelu, kabiji Lulayañano Lupya amba Binembelo bya Kingiliki bya Bwina Kilishitu. Kuba bino kwitukwasha kubula kumona nobe mabuku amo a mu Baibolo apwa nkito, nangwa nobe kechi anema lelo jino ne.
5 BUBELA. Twingijisha Mabaibolo apusana pusana pa kufunda Mambo a Lesa. Mu milaka mwatuntululwa Baibolo wa Binembelo bya Ntanda Ipya, tutemwa bingi kumwingijisha mambo muji jizhina ja Lesa, bamutuntulula bulongo kabiji wapela kumvwa. Langulukai pa jizhina ja Lesa, ja kuba’mba Yehoba. Mu byambo bitanshi bya Baibolo umo, muji mazhina a bantu 79 bakwashisheko kutuntulula uno Baibolo. Pano bino, bashapo jizhina ja mwine wanembele Baibolo aye Yehoba Lesa. Baibolo wa Binembelo bya Ntanda Ipya wapusanako mambo jizhina ja Lesa bejinemba ponse po jiji byonkatu biji mu mulaka mutanshi ye banembejilemo Binembelo. ²
6 BUBELA. Inge twataana kuba’mba byo twaitabilamo kechi byakwatankana na byaamba Baibolo ne, tupimpulako. Kala saka tukyangye kutendeka kutuntulula Baibolo wa Binembelo bya Ntanda Ipya mu 1950, twaingijishanga Mabaibolo apusana pusana kabiji po paimenejile ne bintu byo twaitabijilemo.
7 BUBELA. Mwingilo wetu wa busapwishi utundaika bingi bantu. Twakwasha bantu bavula bingi kuleka byubilo byabo byatama, biji nobe kupepa fwanka ne kutoma malwa. Sukulu wetu wa kufunjisha bantu kuyuka kutanga ne kunemba wakwasha bantu bavula bingi mwaya ntanda. Inge kwamweka bya malwa biponakotu, tukwasha Bakamonyi ne babula Bakamonyi. Twibakwasha kupichila mu kwibatundaika mu milanguluko ne kukosesha bulunda bwabo na Lesa kimye kya makatazho. ³
8 BUBELA. Tulondela mukambizho wa mu Baibolo wa kuba’mba “nemekainga bantu bonse” nangwa kya kuba baitabila mu bintu byapusana pusana. (1 Petelo 2:17) Nangwa kya kuba mu byalo bimo yetu twavujilamo, kechi tutundaika bamulwila ntanda nangwa boba balenga mizhilo kukanya mabumba akwabo a bupopweshi ne. Kabiji kechi tutundaika makafulumende kulenga mizhilo ya kuba’mba bantu bonse balondelenga bintu byo twaitabilamo ne. Bino kechi tulengulula byaitabilamo bakwetu ne, byonkatu byo babula kulengulula byo twaitabilamo.—Mateo 7:12.

Byambo biji mu kino kibaba byafuma pa keyala wetu wa jw.org/kqn. Pa kuba’mba muyukilepo byavula, chintai panembwa’mba BAKAMONYI BA KWA YEHOBA > MEPUZHO O BEPUZHA JAVULA.

^ 1. Kupusanako na boba baitabila’mba ntanda yalengelwe mu moba atanu na jimo a maola 24, atweba kechi tukana kishinka kyataana ba sayansi kya kuba’mba ntanda yaikala myaka yavula bingi ne.

^ 2. Kuji kintu kikwabo kyalengela’mba Baibolo wa Binembelo bya Ntanda Ipya apusaneko: Uno Baibolo kechi bapotesha ne, bapanatu watutu. Na mambo a kino, bantu bavula bingi babena kutanga Baibolo mu milaka yabo. Baibolo wa Binembelo bya Ntanda Ipya luno uji mu milaka kukila 130. Kabiji mwakonsha kutanga uno Baibolo pa keyala wa www.pr418.com/kqn.

^ 3. Jishinda jimo jo twingijishishamo ano mali o tupana ke kukwasha boba baponenwa na bya malwa. (Byubilo 11:27-30) Na mambo a kuba’mba uno mwingilo bamwingila ku bantu babula kufola, ano mali beengijishatu ku uno mwingilo kechi ku kufolesha bamingilo ne.