INGE muntu wimutala saka abena kumwemwesela, muba byepi? Ne anweba mumwemwesela. Kuba bino kwimusangajika bingi. Inge mukwetu nangwatu muntu ye twabula kuyuka wamwemwesela, ne atweba tumwemwesela kabiji tumvwa bulongo. Ba Magdalena baambile’mba: “Bamwatawami ba Georg bamwemweselanga inge bantala. Naumvwanga bingi bulongo.”

Kumwemwesela kwa kine kulengela muntu kukasuluka ne kutemwa bingi pa kwisamba nanji. Kibaaba kimo mu buku wa Observer, wa Association for Psychological Science uji pa intaneti waamba’mba: “Kumwemwesela . . . tusemwatu nako. Mwana ukijitu lukeke inge wimutalatu ku meso, uyuka inge mwatemwa nangwa ne.” Kino kibaaba kyatwajijila kwamba’mba: “Bantu kechi bayukatu mwatala bibena kwamba muntu ubena kumwemwesela ne, bino kumwemwesela kulengela bakwetu kuba byawama.” *

Bashayuka ba pa Sukulu Mukatampe wa Harvard mu United States bakebelenga kuyuka bisakwikala bakote bakolwa inge bebalamanga ke bamwemwesele nangwa inge ke babule kumwemwesela. Shayuka umo pa bano waambile’mba, bakolwa babukilengako inge babena kwibalama ke bamwemwesele, “bebata muchima ne  kwibalama na kifyele.” Bino inge baleka kuba bino, bikola byakijilengamo.

Kumwemwesela kulengela ne buntuntulu bwa mubiji wenu kuwaminako. Bashayuka bamo bamba’mba kuba bino kulengela kukasuluka, kwikala na lusekelo kabiji kukepeshako bijikila. Bino kubula kumwemwesela bantu kulengela kubula kwikala na lusekelo.

Ba Magdalena bo twaambapo peulupo bajinga Bakamonyi ba kwa Yehoba mu kimye kya Nkondo ya Bubiji ya Ntanda Yonse. Abo ne ba mu kisemi kyabo bebakashijile mu kaleya ka ku Ravensbrück mu Germany na mambo a kukana kuba bibakambizhenga bena Nazi. Baambile’mba: “Bimye bimo balama bakaili betukanyanga kwisamba na bakwetu bakaili. Pano bino, bakankelwe kwitukanya kumwemwesela. Inge bamama ne bakolojami bantala, bamwemwesela, naumvwanga bingi bulongo kabiji kino kyakwashishe kuchinchika.”

Kampe mulanguluka’mba makatazho a mu bwikalo o emulengela kubula kumwemwesela. Bino yukai’mba kumwemwesela kwendela pamo na milanguluko. (Byambo bya Maana 15:15; Filipai 4:8, 9) Inge kimukatazha kumwemwesela, langulukainga pa bintu byawama byo mwatemwa. * Kutanga Baibolo ne kulomba kwi Lesa kwakwasha bavula bingi. (Mateo 5:3; Filipai 4:6, 7) Byambo bya kuba’mba “lusekelo” ne “kusangalala” byavulamo bingi mu Baibolo. Tangainga jipa jimo ja mu Baibolo nangwa abiji pa juba pa juba. Inge ke mube bino, mukatendeka kumwemwesela pa kwisamba na bantu.

Tendekelaingapo kumwemwesela pa kwisamba na bakwenu. Mambo kumwemwesela kya bupe kitupa Lesa kyo tumwenamo atweba bene kabiji kitundaika bakwetu.