“Twasanchile Bingi pa byo Betubijile”
PA Kibelushi pa 25 April mu 2015, mu kyalo kya Nepal mwapichile kitentanshi. Kino kyalo kya mitumba kyaikela ku buyeke bwa kyalo kya India. Akino kitentanshi kyamwekejile palepele makilomita 80, ku muzhika buyeke bwa muzhi mukatampe wa Kathmandu. Bantu bafwile bakijile pa 8,500. Akino kyo kitentanshi kyaipayile bantu bavula bingi mu kino kyalo. Mazubo avula akundukile. Mu kyalo kya Nepal muji Bakamonyi ba kwa Yehoba 2,200, pa kyo kya kimye bavula baikelenga ku ino mpunzha kwamwekejile kitentashi. Bino kyataminekotu ke kya kuba’mba Kamonyi umo ne baana banji babiji bo bafwile.
Kamonyi wa jizhina ja Michelle waambile’mba: “Bakamonyi bavula bayile na kupwila kwa bwina Kilishitu kimye kyamwekele kino kitentanshi. Umvwe kino kitentanshi kyaishijile pa kimye bavula kyo bajinga pa mazubo, bakamonyi bavula inge bafwile.” Ki ka kyalengejile bayile na kupwila kupuluka? Mambo Mazubo a Bufumu beashimika bulongo kabiji akosa kya kuba nangwa kitentanshi kyaiya kechi akonsha kukunduka ne.
“PANO PO TWAYUKA BUWAME!”
Mazubo a Bufumu o babena kushimika mu Nepal babena kwiashimika mu jishinda ja kuba nangwa kuji kitentanshi kechi akonsha kukunduka ne. Ba Man Bahadur bengila mwingilo wa kushimika Mazubo a Bufumu baambile’mba: “Bantu betwipuzha javula bingi pa ene mambo o tushimikila bitendekesho byakosa nangwa pa kushimika bishimikwa bicheche. Pano popo twayuka buwame!” Kitentanshi byo kyapwile, balongo batala pa mwingilo wa buntungi mu kino kyalo kya Nepal baswishishe Mazubo a Bufumu ke mwa kwikala bantu. Nangwa kya kuba kitentanshi kyaonawine bintu byavula, Bakamonyi ba kwa Yehoba ne bantu bo bekala nabo kipikipi kechi baakaminwe pa kwikala mu Mazubo a Bufumu ne.
Jibumba ja Bakamonyi bayuka kubuka bantu bafumine ku Europe babena kukwasha bantu
Bakulumpe mu bipwilo batendekele kukeba basapwishi bo babuujile kumona. Kamonyi umo wa jizhina ja Babita waambile’mba: “Bakulumpe mu kipwilo babika bumi bwabo mu kizumba na mambotu a kuta muchima basapwishi. “Twasanchile bingi pa byo betubijile.” Byo papichile juba jimo kufuma pamwekejile kitentanshi, balongo basatu ba mu kavoto katala pa mwingilo wa Bakamonyi ba kwa Yehoba mu Nepal ne bakalama ba mwanzo batendekele kufwakesha bipwilo kuba’mba bayuke makatazho ne bya kukwasha bakulumpe mu bipwilo.
Ba Gary Breaux bafumine ku ofweshi mukatampe wa Bakamonyi ba kwa Yehoba bayile na kupempula bajinga ku mpunzha kwapichile kitentanshi
Byo papichile moba atanu na jimo kufuma pamwekejile kitentanshi, ba Gary Breaux bafumine ku ofweshi mukatampe wa Bakamonyi ku United States baishile ku Nepal na bakazhi babo ba Ruby. Ba Reuben ba mu kavoto ko twaambapo kala baambile’mba, “na mambo a bintu byamwekele mu muzhi wa Kathmandu, kechi twayukile’mba mulongo Breaux usakwiya ne. Pano bino, waishile. Bakamonyi ba ku ino mpunzha basanchile bingi byo aishile.”
‘TWAKWATANKANA BINGI KUKILA KALA’
Ba Silas bengijila pa ofweshi wa Bakamonyi mu Nepal baambile’mba: “Kampanyi ka mu kyalo ka mafoni byo katendekele kwingila, twatambwijilenga mafoni mute ne bufuku! Bakwetu Bakamonyi mwaya ntanda betutele bingi muchima na mambo a kitentanshi. Nangwa kya kuba baambilenga mulaka ye twabula kuyuka, twayukile’mba betutemwa bingi kabiji babena kukebesha kwitukwasha.”
Bakamonyi ba kwa Yehoba ne bantutu bebalamijile mu Mazubo a Bufumu
Byo papichile moba avula kufuma pamwekejile kitentanshi, Bakamonyi bakonkakwa baletelenga kajo pa Mazubo a Bufumu kuba’mba bapepo bantu babujile kajo. Kabiji balengele Kavoto Kakukwasha Baponenwa na bya Malwa, ponkapotu batendekele kutambwila bukwasho kufuma ku kyalo kya Bangladesh, India ne Japan. Kechi papichile ne moba avula ne, Bakamonyi bayuka bya kubuka bantu bafikile kufuma ku Europe ne kulenga mwakubukilanga bantu ponka pa Mazubo a Bufumu. Ponkapotu batendekele kwingila, kechi bebapiminengatu kuba’mba bamone byo baji ne, bino bebakwashishenga ne kuyuka mwa kubila na binyenge byo bajinga nabyo na mambo a kitentanshi kyamwekele.
Mwanamukazhi umo wa jizhina ja Uttara waambile pa byalangulukilenga bavula amba: “Kitentanshi kyaonawine byavula bingi kabiji bantu bajinga na moyo. Pano bino, twamwene’mba balongo ne banyenga betutemwa bingi.” Akino kitentanshi kechi kyalengejile butemwe bantu bo batemwa Yehoba ne bakwabo kupwa ne. Bino butemwe bwabo bwakosejileko.