BANTU BONSE BAKEBA KWIBATEMWA. Inge mu masongola, mu kisemi nangwa balunda babula kwikala na butemwa kechi bakonsha kwikala bulongo ne. Akino kibena kumwesha’mba butemwe bulengela bantu kwikala na butuntulu bwa mubiji bwawama ne kwikala na lusekelo. Kwikala na “butemwe” kulumbulula ka?

Butemwe bo tubena kwambapo pano kechi butemwe bwa kwifwalama ne, bino ke butemwe buji na bantu bonse. Buno butemwe bo bulengela muntu kukwasha bakwabo ne kutangizhako bikeba bakwabo kukila byo bakeba. Kabiji buno butemwe bwaimena pa mafunde a Lesa, kabiji bwitulengela kukebesha kukwasha bakwetu.

Butemwe bebulumbulula bingi bulongo amba: “Butemwe butekanya ne kuba lusa. Butemwe kechi buba kichima ne. Kechi bwitota ne, kechi bwilundumika ne, kechi buba bya bumvu ne, kechi bukeba bintu bibuwamina abo bwine ne, kechi buzhingila ne. Kechi buvuluka kintu kyatama ne. Kechi busekela pa bintu byabula koloka ne, bino busekela na bya bukine. Buvweta pa bintu byonse, . . . buketekela bintu byonse, buchinchika bintu byonse. Butemwe kechi bupwa ne.”—1 Kolinda 13:4-8.

Butemwe bwa uno mutundu ‘kechi bukapwa ne’. Buya na kukomenako pa kupitapo kimye. Butemwe bwitulengela kutekanya, kuba lusa ne kulekelako bakwetu mambo, kabiji bo “bukwatankanya bantu bulongo.” (Kolose 3:14) Balunda baji na butemwa bakazhikijila bulunda bwabo ne kwikala na lusekelo nangwa kya kuba bonse bandengamambo. Pano twayai twambe pa butemwe byo bwakonsha kukwasha baji mu masongola.

Yesu Kilishitu waambile pa mafunde anema bingi aamba pa masongola. Waambile’mba: “‘Mwanamulume ukasha bashanji ne bainanji ne kulamachila ku mukazhanji ne abo bakekala ke mubiji umo’ . . . Onkao mambo, akya kyasambakanya Lesa, muntu kechi ekyabanye ne.” (Mateo 19:5, 6) Waambilepo pa mafunde abiji anema bingi.

“NE ABO BAKEKALA KE MUBIJI UMO.” Masongola ke bulunda bwakosa bingi bwikala na bantu babiji, kabiji butemwe bwakonsha kulengela ba mulume ne mukazhi kubula kwikala ke “mubiji umo” na muntu wabula mwinakwabo. (1 Kolinda 6:16; Bahebelu 13:4) Kubula kwikala bakishinka mu masongola kulengela bantu kubula kwiketekela ne masongola kupwa. Inge bano bamulume ne mukazhi bajinga na baana, bakonsha kulengela baana kwikala na makatazho kabiji kyakonsha kwibalengela ne kulanguluka’mba kechi bebatemwa, kwibazhikijila nangwa kwibata muchima ne.

“KYASAMBAKANYA LESA.” Masongola anema bingi. Baji mu masongola bayuka kino, bakosesha bingi masongola abo. Kechi bakebapo mashinda mwa kupwishisha masongola inge baji na makatazho ne. Na mambo a kuba’mba butemwe bwabo bwakosa, kino kibalengela kubula kupwisha masongola abo. Butemwe bwa uno mutundu “buvweta pa bintu byonse,” kino kishinka kyakonsha kulengela baji mu masongola kwikala mu mutende ne kukwatankana nangwa inge babena kupita mu makatazho.

Bansemi bafwainwa kumweshanga baana babo butemwe bwa kine, Inge ke bobe bino, baana babo bakamwenamo bingi. Nsongwakazhi aye Jessica waambile’mba: “Bataata ne ba mama betemwa bingi kabiji bepa mushingi. Inge namona bamama byo banemeka bataata kimye kyo babena kwitukwasha, kindengela kukeba kwikala na byubilo byo baji nabyo.”

Butemwe kyo kyubilo kya Lesa kyanema bingi. Kabiji Baibolo waamba’mba: “Lesa butemwe.” (1 Yoano 4:8) Bino byambo kechi byakonsha kwitukumisha ne, mambo Yehoba ke “Lesa wa lusekelo.” (1 Timoti 1:11) Ne atweba tukekala na lusekelo inge ke tulondele byubilo bya Mulenga wetu nabiji butemwe. Kinembelo kya Efisesa 5:1, 2 kyaamba’mba: “Londelainga Lesa byo muji baana bo atemwa, kabiji endainga mu butemwe.”