NANCHI MWIKALA NALUSEKELO KIMYE KYONSE NYI? Inge ibyo, ñanyi bintu bimuletela lusekelo? Kisemi kyenu nyi, nkito yo mwingila nyi, inyi bintu byo mwaitabilamo? Kampe mubena kulangulukapo bimo bikobiwa kulutwe byakonsha kwimuletela lusekelo nabiji kupwisha sukulu, kutwela nkito ya kufola muzema wa mali nangwa kupota motoka.

Bantu bavula bekala bingi na lusekelo inge bauba kyo bakebelenga kuba. Nanchi luno lusekelo lutwajijila nyi? Ine, luno lusekelo ke lwa pa kakimyetu kacheche, mambo bintu byo boba kechi bitwajijila kwibaletela lusekelo ne.

Kwikala na lusekelo kulumbulula kumvwa bulongo ku muchima, kukasuluka mu milanguluko ne kutondwa na bintu byonka byo tuji nabyo.

Kabiji kyanema bingi muntu kwikala na lusekelo. Muntu kechi wafwainwa kwibikila kikonkwanyi pa kuba’mba ekale na lusekelo ne, bino lusekelo luji nobe bantu baji pa lwendo. Kwamba’mba, “nkekala na lusekelo inge . . . ” kumwesha’mba kechi mukeba kwikala na lusekelo pa kyokyo kimye ne.

Twakonsha kufwanyikizha lusekelo ku butuntulu bwa mubiji. Tuba byepi pa kuba’mba twikale na butuntulu bwa mubiji? Tusala kajo ka kuja kawama, tukayako makayo akosesha mubiji ne kwitatu muchima kimye kyonse. Abino byo byo twafwainwa kuba ne pa kuba’mba twikale na lusekelo, kabiji twakonsha kwikala nalo inge ke twingijishe mashinda alumbuluka a mu bwikalo ne kulondela bulongo mafunde.

Ñanyi mafunde nangwa byubilo byakonsha kwituletela lusekelo mu bwikalo? Mafunde amo anema kukila akwabo, ano mafunde engila mingilo yanema bingi:

• KUTONDWA NA BINTU BYO TUJI NABYO NE KWIKALA BAMPANYI

• BUTUNTULU BWA MUBIJI BWAWAMA

• KWIKALA NA BUTEMWE

• KWILEKELAKO MAMBO

• ENE MAMBO O TWAIKELA NA BUMI

• KWIKALA NA LUKETEKELO

Baibolo waamba’mba: “Bo bene ba lusekelo babula kaneneno mu bintu byo boba.” (Salamo 119:1) Pano twayai twisambe byo twafwainwa kuba bino.