Buku wa Hope in the Age of Anxiety waamba’mba: “LUKETEKELO LWANEMA BINGI MAMBO LWITULENGELA KWIKALA NA BULUNDA BWAKOSA NA LESA. Kabiji lwitulengela ne kubula kwilengulula, kubula kwikala na binyenge ne kubula kwikala na moyo.”

Nangwa kya kuba Baibolo watundaika bantu kwikala na luketekelo, bino witujimunako’mba kechi twafwainwa kuketekela bantu ne. Salamo 146:3 waamba’mba: “Kange muketekele mu baana ba bamfumu nangwa mu mwana muntu ukabula kukonsha kwimupulusha ne.” Twafwainwa kuketekela Mulenga wetu uji na bulume bwa kufikizha milaye iji kulutwe kechi mu byamba bantu ne. Ñanyi milaye Lesa yo etulaya? Twayai twisambe pa milaye imo:

BUBI BUKAPWA, KABIJI BANTU BAOLOKA BAKEKALANGA MU MUTENDE MYAKA NE MYAKA: “Kwashalatu pacheche, babi kechi bakekalako ne . . . Pakuba bakimote bakaswana ntanda, kabiji bakasangalelanga mu kuvula kwa mutende.” (Salamo 37:10, 11) Kabiji kyepelo 29 kyaamba’mba: “Baoloka . . . bakekalangamo myaka ne myaka” pano pa ntanda.

KECHI KUKEKALA NKONDO NE: ‘Yehoba, ukapwisha nkondo pano pa ntanda ponse. Ukachimauna buta bwa mukanda ne jifumo; Ukasoka makalaki a nkondo mu mujilo.’—Salamo 46:8, 9.

KECHI KUKEKALA KUKOLWA, BUYANJI NANGWA LUFU NE: “Tente wa Lesa uji na bantu . . . Ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne.”—Lumwekesho 21:3, 4.

KAJO KAKAVULA BINGI: “Kajo kakavula bingi pano pa ntanda; kakekala ne peulu ya mitumba.”—Salamo 72:16.

KILISHITU YE UKALAMANGA NTANDA YONSE: “[Yesu Kilishitu] bamupele bukalama, munema ne bufumu kuba’mba bantu ba mitundu yonse, bisaka bya bantu ne bantu bonse bamba milaka yapusana pusana bamwingijilenga. Bukalama bwanji bo bwa myaka ne myaka, kechi bukapwa ne, kabiji bufumu bwanji kechi bakebonauna ne.”—Danyela 7:14.

Twakonsha kushiinwa byepi kuba’mba ino milaye ikafika? Yesu byo ajinga pano pa ntanda, wamwesheshe’mba ye Mfumu wafikilamo kulama bantu. Wabukile bajinga na bikola, wajiishishe bayanji ne kusangula bafwa. Byo afunjishanga byo bintu byanemene bingi, mambo pajinga mafunde akakwasha bantu kwikala myaka ne myaka mu mutende ne kukwatankana. Kabiji Yesu wambile ne pa bintu bikamweka kulutwe. Pa bino bintu, paji bikamwesha’mba tubena kwikala mu moba a kupelako.

Yesu waambijile jimo kuba’mba moba a kupelako kechi kukekala mutende ne luzhikijilo ne. Kabiji biyukilo bimwesha’mba tuji ku “mpelo ya buno bwikalo,” ke makondo, bipowe bya nzala, myalo ne bitentanshi bikatampe. (Mateo 24:3, 7; Luka 21:10, 11; Lumwekesho 6:3-8) Yesu wanungilepo amba: “Na mambo a kuvujilako kwa bubi, butemwe bwa bavula bukakepa.”—Mateo 24:12.

Bino biyukilo bibena kumweka mu mashinda apusana pusana kwesakana na byaambijile jimo nembi wa Baibolo. Pa 2 Timoti 3:1-5, Baibolo waamba’mba, “mu moba a kupelako” bantu kechi bakatemwa bakwabo ne, bakekala ba kutemwa mali ne byakisangajimbwe. Bakekala bejantula ne kushinta. Bisemi kechi bikekala na butemwe ne, kabiji baana kechi bakakokelanga bansemi babo ne. Mu bupopweshi namo mukekalanga bingi bukamfutumfutu.

Bino biyukilo bibena kumwesha’mba tuji mu moba a kupelako. Kabiji bimwesha’mba Bufumu bwa Lesa katatakatu butendeke kulama. Yesu mu bungauzhi bwanji bwaamba pa moba a kupelako waambile’mba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mateo 24:14.

Ano mambo awama apana lujimuno ku bantu boba byatama ne luketekelo ku bantu baoloka. Kabiji amwesha bantu boba byawama kuba’mba katatakatu milaye yalaya Lesa ikafike. Nanchi mubena kukeba kufunjilako byavula pa ano mapesho nyi? Inge byo ibyo, yai pa jipa japelako mu uno magazini.