Kipamo kya United Nations kitundaika bantu kukwatankana ntanda yonse, kunemeka luusa lwa bantu ne kubula konauna ntanda. Mambo ka? Ba Maher Nasser bengila ku kipamo kya United Nations banembele mu magazini wa UN Chronicle amba “bumbanzhi, misalululo, buyanji, kutama kwa mema ne mwela, makondo ne bikola byakumbanatu ntanda yonse.”

Bamo batundaika ne mulanguluko wa kwikalatu na kafulumende umo ntanda yonse. Pa bano bantu batundaikanga uno mulanguluko paji ne ntemwamaana wa ku Italy aye Dante (wasemenwe mu 1265 ne kufwa mu 1321) ne shayuka wa bya sayansi aye Albert Einstein (wasemenwe mu 1879 ne kufwa mu 1955). Dante waambile’mba makafulumende a bantu aabenamo kechi akonsha kuleta mutende pano pa ntanda ne. Kabiji waambilepo ne byambo byaambile Yesu Kilishitu bya kuba’mba: “Bufumu bwakonsha konaika umvwe bene benabo bealukamo.”—Luka 11:17.

Mu Nkondo ya Bubiji ya Ntanda Yonse baingijishe mabomba abiji ashinta. Kino kyalengejile Albert Einstein kunembela nkalata kipamo kya General Assembly kya ba United Nations. Wanembele’mba “Kipamo kya United Nations kyafwainwa kulenga kafulumende wa ntanda yonse wakonsha kuleta mutende ne kuzhikijila bantu.”

Nanchi twafwainwa kuketekela bamulwila ntanda kulenga kafulumende uji bingi na bulume mwabula mazhikakanwa ne buyanji nyi? Inyi nabo bajitu na byubilo byonka byo twaambapo kala? Ano o mepuzho etulengela kuvuluka byambo byaambile shayuka wa mpito aye Lord Acton wa ku Britain bya kuba’mba: “Muntu inge bamupa bulume bukatampe, bumulengela kuba bintu byatama.”

Nangwa byonkabyo, pa kuba’mba bantu bonse bekale mu mutende bafwainwa kukwatankana. Pano bakonsha kuba byepi bino? Nanchi kine twakonsha kukwatankana nyi? Baibolo waamba’mba, bantu bakonsha kukwatankana. Kabiji kino kikobiwa. Mu ñanyi jishinda? Kafulumende wa bumulwila ntanda kechi wakonsha kukwatankanya bantu ne. Bino, kafulumende wa Lesa ye yenkatu ukakwatankanya bantu. Kabiji Lesa ukengijisha uno kafulumende kumwesha kuba’mba ye ujitu na luusa lwa kulama bantu bonse. Nanchi uno kafulumende mwamuyuka nyi? Baibolo utela uno kafulumende amba, “Bufumu bwa Lesa.”—Luka 4:43.

Yesu Kilishitu waambilenga pa Bufumu bwa Lesa kimye kyo afunjishe baana banji ba bwanga kulomba amba: “Bufumu bwenu bwiye. Kyaswa muchima wenu kyubiwe pano pa ntanda.” (Mateo 6:9, 10) Bufumu bwa Lesa bo bonkatu bukafikizha kyaswa muchima wa Lesa pano pa ntanda, kechi kafulumende wa bantu mwavula mazhikakanwa ne.

Bufumu bwa Lesa butelwa ne kuba’mba, “Bufumu bwa mwiulu.” (Mateo 5:3) Mambo ka? Mambo buno Bufumu bukalamanga ntanda yonse, pano bino kechi bukalaminanga pano pa ntanda ne, bukalaminanga mwiulu. Kino kilumbulula ka? Kilumbulula’mba uno kafulumende ukalamanga ntanda yonse kabiji kechi ukengijishanga mali pa kukwasha bantu ne. Kine uno kafulumende ukakwasha bingi bantu bo akalamanga.

Kyambo kya kuba’mba “bufumu” kimwesha’mba Bufumu bwa Lesa ke kafulumende uji na mfumu. Yesu Kilishitu ye Mfumu wa buno bufumu kabiji Lesa wamupa luusa lwa kulama. Baibolo waamba pe Yesu amba:

• “Bundamakyalo bukekala pe aye . . . Bufumu bwanji bukayanga na kubaya kikupu kabiji mutende ye akaleta kechi ukapwa ne.” —Isaya 9:6, 7, Buku wa Lesa.

•   “Kabiji bamupele bukalama, munema ne bufumu kuba’mba bantu ba mitundu yonse, bisaka bya bantu ne bantu bonse bamba milaka yapusana pusana bamwingijilenga. Bukalama bwanji . . . kechi bakebonauna ne.”—Danyela 7:14.

• “Bufumu bwa pa ntanda bwaaluka ke Bufumu bwa Nkambo yetu [Lesa] ne bwa Kilishitu.”—Lumwekesho 11:15.

Byambo byaambile Yesu mu lulombelo lwanji bikafika kimye Bufumu bwa Lesa kyo bukafikizha kyaswa muchima wa Lesa pano pa ntanda. Mu buno Bufumu, bantu bakafunda bya kulama bulongo ino ntanda. Kino kikalengela bantu ne banyama kwikala bulongo pano pa ntanda.

Kyakila pa byonse, Bufumu bwa Lesa bukafunjishanga bantu bakekala mu buno Bufumu. Bantu bonse bakafundangatu mizhilo imo. Kechi kukekala kwabenamo ne. Kinembelo kya Isaya 11:9 kyaamba’mba: “Kechi bakekozhanga nangwa kwionauna . . . ne, mambo pano pa ntanda pakakumbana maana a kuyuka Yehoba byonkatu mema byo akumbana mu kalunga ka mema.”

Mu Bufumu bwa Lesa, bantu bonse pano pa ntanda bakekalanga mu mutende, byonka bikeba kipamo kya United Nations amba bekalenga luno. Kinembelo kya Salamo 37:11 kyaamba’mba: “Bakasangalelanga mu kuvula kwa mutende.” Katatakatu “bumbanzhi,” “kutama kwa mwela,” “buyanji” ne “makondo” bikapwe. Pano ñanyi kimye kyo bikapwa bino bintu? Kabiji ñanyi kimye Bufumu bwa Lesa kyo bukatendeka kulama ino ntanda? Bukoba byepi bino? Ñanyi bintu byawama byo mukamwenamo inge buno Bufumu bwatendeka kulama? Twayai tumone.