Katatakatu Bufumu bwa Lesa bo tubena kupembelela bukalete mutende ne kukwatankanya bantu pano pa ntanda. Salamo 72:7 waamba’mba “mutende ukavula.” Pano ñanyi kimye buno Bufumu kyo bukatendeka kulama? Bukatendeka byepi kulama pano pa ntanda? Kabiji mwakonsha kumwenamo byepi mu buno Bufumu?

Baibolo waambijile jimo kuba’mba kukekala bintu bikamwesha’mba Bufumu bwa Lesa bwafwenya kala pepi. Bino ‘biyukilo’ byaambapo Baibolo ke makondo, bipowe bya nzala, myalo, bitentanshi ne kuvula kwa bubi. Abino byonse bibena kumwesha’mba tuji ku mpelo ya buno bwikalo.—Mateo 24:3, 7, 12; Luka 21:11; Lumwekesho 6:2-8.

Bungauzhi bukwabo bwaamba’mba: “Mu moba a kupelako kukeya bimye byakatazha. Mambo bantu bakekala betemwatu abo bene, batemwa mali, . . . babula kukookela bansemi, babula kusanta, babula bukishinka, babula butemwe, babula kukeba kumvwañana, ba luntepentepe, babula kwikanya, bashinta, babula kutemwa kyawama, . . . betota, batemwa bya kisangajimbwe mu kifulo kya kutemwa Lesa.” (2 Timoti 3:1-4) Bino byubilo bibena kumweka mu bantu ano moba. Kabiji byasampukila ne pa katele.

Buno bungauzhi bwatendekele kufika mu 1914. Kabiji bashayuka ba bya mpito, bamulwila ntanda ne banembi baambilepo pa lupimpu lwaubiwe kufuma mu uno mwaka. Shayuka wa mpito wa ku Denmark aye Peter Munch waambile’mba: “Nkondo saka ikyangye kutendeka mu 1914, bantu balangulukilenga’mba bintu bibena kuya na kuwaminako pano pa ntanda. Ino nkondo byo yatendekele bantu batendekele kumanama, kususubala ne kubula kuzhikijilwa.”

Pano bino, kufika kwa buno bungauzhi kumwesha’mba katatakatu pano pa ntanda pekale mutende, mambo Bufumu bwa Lesa katatakatu butendeke kulama. Yesu waambile ne pa bintu byawama bikamwekanga mu moba a ku mpelo. Waambile’mba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mateo 24:14.

Mambo awama a Bufumu kyo kishina kine kisapwilapo Bakamonyi ba kwa Yehoba. Kabiji magazini ye bengijisha bingi bamutela’mba Kyamba kya Usopa Kibena Kubijika Bufumu bwa Yehoba. Akino Kyamba kya Usopa kituntululwa mu milaka kukila pa 338, kabiji kyamba pa bintu byawama bikoba Bufumu bwa Lesa ku bantu pano pa ntanda.

Pa kuba’mba tukumbule buno bwipuzho, twafwainwa kuyuka bino bishinka bina byanema:

1. Bantangi ba bumulwila ntanda kechi bo bakatangijilanga Bufumu bwa Lesa ne.

2. Bantangi ba bumulwila ntanda bakeba bingi kutwajijila kwikala pa bukalama, na mambo a kino bakatendeka kulwisha Bufumu bwa Lesa.—Salamo 2:2-9.

3. Bufumu bwa Lesa bukonauna bufumu bonse bwa pano pa ntanda bukeba kutwajijila kulama bantu. (Danyela 2:44; Lumwekesho 19:17-21) Ino nkondo ikapelako itelwa’mba Amagedonyi.—Lumwekesho 16:14, 16.

4. Bonse batundaika bufumu bwa Lesa bakebazhikijila pa juba ja Amagedonyi ne kutwela mu ntanda ipya mukekala mutende. Bantu bakapuluka bakavula bingi. Kabiji Baibolo utela bano bantu amba, “jibumba jikatampe,” ja kukankalwa kubala.—Lumwekesho 7:9, 10, 13, 14.

Kitanshi kyo mwafwainwa kuba ke kufunda byavula pe Lesa. Yesu waambile’mba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.”—Yoano 17:3.

Bantu inge bayuka bulongo Yehoba Lesa, bamwenamo bintu byavula bingi. Akilangulukai pa bino bintu bibiji: Kitanshi, bekala na lwitabilo lwakosa mwi aye. Luno lwitabilo lwaimena pa bishiino, lwibalengela kushiinwa’mba Bufumu bwa Lesa kine ko buji kabiji katatakatu bukatendeke kulama. (Bahebelu 11:1) Kya bubiji, batemwa bingi Lesa ne bantu. Kutemwa Lesa kwibalengela kumukookela na muchima yense. Butemwe bwitukwasha kukookela mukambizho wa kwa Yesu ye batela bamo amba, Muzhilo Wawama. Uno mukambizho waamba’mba: “Bintu byonse byo mukeba’mba bantu bemubile, ne anweba mwafwainwa kwibobila byonkabyo.”—Luka 6:31.

Byonka bikeba nsemi wa mulume uji na butemwe, Mulenga wetu naye ukeba’mba twikalenga bulongo. Ukeba’mba tukekale na “bumi bwa kine kine.” (1 Timoti 6:19) Ano moba kechi tuji na “bumi bwa kine kine” ne. Bantu bavula lelo jino babena kuyanda kabiji kechi kyapela kumonapo mashinda mwa kutaina kajo ne. Pa kuba’mba muyuke buno “bumi bwa kine kine” byo bukekala, akimonai bintu bimo byawama Bufumu bwa Lesa byo bukobila bantu ba kishinka.