Maana a Lesa Kechi Akatazha Kwiataana Ne
Mambo “Binembelo byonse byanembelwe na lutangijilo lwa mupashi wa Lesa.” (2 Timoti 3:16) Mu kino kyepelo, kyambo kya kuba’mba “lutangijilo lwa mupashi” kibena kulumbulula’mba Lesa wa Bulume Bonse ye wabikile milanguluko yanji mu bantu banembele Baibolo.
Lesa Ubena Kukeba’mba Muyuke Maana Anji
“Amiwa yami Yehoba . . . yenka wimufunjisha kuba’mba mumwenemo, yenka wimutangijila mu jishinda jo mwafwainwa kuyamo. Kine, umvwe mwakookela mikambizho yami! Mutende wenu ukekala nobe mukola ne bololoke bwenu bukekala nobe manyaki a pa kalunga ka mema.”—ISAYA 48:17, 18.
Monainga bino byambo kuba’mba Lesa ubena kwambila anweba bunke bwenu. Lesa ukeba’mba mwikale na mutende wa mu milanguluko ne kwikala na lusekelo myaka ne myaka. Kabiji wipana kwimukwasha.
Mwakonsha Kutaana Maana a Lesa
“Mambo awama afwainwa kusapwilwa patanshi mu bisaka byonse.”—MAKO 13:10.
Ano “mambo awama” avwangamo milaye ya Yehoba ya kufumyapo makatazho onse ne kwalula ino ntanda kwikala paladisa. Kabiji ukasangula balongo betu ne balunda netu bafwa. Bakamonyi ba kwa Yehoba babena kusapwila mambo awama aji mu Baibolo ntanda nyonse.
