Mafunde Akwasha Kwikala Bulongo na Bantu
Mulenga wetu witubuula byo twafwainwa kwikalanga bulongo na bantu, nangwa pa nzubo, pa nkito nangwa na balunda netu. Akimonai ano mafunde amo akwasha bantu bavula kwikala bulongo mu bwikalo bwabo.
Lekelaingako Mambo Bakwenu
‘Ilekelaingako mambo umvwe umo uji na mambo na mukwabo.’—KOLOSE 3:13.
Atweba bonse tulenga mambo. Twakonsha kuzhingijisha bakwetu nangwa abo kwituzhingijisha. Akino kibena kulumbulula’mba atweba bonse twafwainwa kulekelangako mambo bakwetu mambo ne atweba tukeba bakwetu kwitulekelako mambo. Inge twalekelako muntu mambo tuleka kuvuluka bintu byatama byo etubile. Atweba kechi ‘tushinkanya kibi na kibi’ ne. Kabiji kechi tutwajijila kuvululamo mukwetu mo alubankanya ne. (Loma 12:17) Pano twafwainwa kuba byepi inge betukozha bingi ku muchima kabiji kitukatazha kulubako? Twafwainwa kwisambapo na mukwetu ku mbaji mu mushingi pa kintu kyo etuba. Kine kintu kya kubila bino ke kupwana kechi kukeba kumona waji kutamisha wepi ne.—Loma 12:18.
Ipelulai ne Kwikala na Mushingi
“Na muchima wa kwipelula saka mulanguluka’mba bakwenu bemukila.”—FILIPAI 2:3.
Inge twipelula ne kwikala na mushingi, bantu baketutemwa bingi. Bantu bayuka’mba tusakwibobila lusa ne kwibalangulukilako. Kechi tusakubilangamotu bintu bya kwibakozha ku muchima ne. Pakuba inge bantu betuyuka’mba twimwesha’mba twakila bakwetu nangwa kimye kyonse tukebatu kuba bintu mo tukebela, kuketulengela kubula kumvwañananga na bakwetu. Bantu bakatendeka kwituchinuzhuka kabiji kiketukatazha bingi kwikala na balunda.
Kange Mwikale na Misalululo Ne
“Lesa kechi uji na misalululo ne, bino mu bisaka byonse muntu umwakamwa ne kuba byaoloka ye witabilwa kwi aye.”—BYUBILO 10:34, 35.
Mulenga wetu kechi umona bantu bamo amba banema kukila bakwabo na mambo a ku kyalo ko basemekelwa, mulaka ye bamba, bintu byo baubapo mu bwikalo bwabo nangwa byo bamweka ne. Mambo “ku muntu umo ko ko alengele bisaka byonse bya bantu.” (Byubilo 17:26) Akino kibena kulumbulula’mba bantu bonsetu ke balongo ne banyenga. Inge saka tunemeka bantu bonse ne kwibobila lusa, twibalengela kusangalala ne atweba benetu tusangalala kabiji tutokesha Mulenga wetu ku muchima.
Ikalai Bakooka Muchima
“Vwalai muchima . . . wakooka.” —KOLOSE 3:12.
Inge twakooka muchima, tukalengela bantu kwitukasulukila bingi. Bakwetu bakakasuluka kwisamba ne atweba ne kwitololakotu inge twalubankanya mambo bayuka’mba twakooka muchima. Kabiji inge muntu wituzhingijila, kumukumbula na jiwi jakooka kufwomona bukaji. Byambo bya Maana 15:1 byaamba’mba: “Kukumbula na jiwi jakooka kufwomona bukaji, pakuba byambo byashinta bikolomona bukaji.”
Ikalai Bampanyi ne Kusantanga
“Mu kupana mufuma lusekelo lukatampe kukila mu kutambula.”—BYUBILO 20:35.
Ano moba bantu bavula bantanyi bingi kabiji balangulukatu pa bibawamina kwapwa. Bino bumpanyi bwitulengela kwikala bingi na lusekelo. (Luka 6:38) Baji na muchima wa bumpanyi baji bingi na lusekelo mambo abo batemwa bakwabo kukila bintu. Kutemwa bantu kwibatundaika kusanchila bakwabo bebobila bintu byawama. (Kolose 3:15) Iipuzhai anweba bene amba: ‘Nanchi amiwa natemwa bantu babula kusanta kabiji bantanyi nangwa abya natemwa bampanyi kabiji basanta nyi?’ Tubena kufunjilako ka ku kino? Ikalai muntu wawama kabiji bantu bakemutemwa.—Mateo 7:12.
Mwakonsha Kutemwa
LABAINGA!
Byakonsha Kwimuletela Lusekelo—Kwilekelako Mambo
Kwendatu na kuzhingila zhingila kulengela kubula kwikala na lusekelo ne kubula kwikala na butuntulu bwa mubiji bwawama.
LABAINGA!
Mu Ntanda ya Malwa—Zhikijilai Bantu bo Mwatemwa
Tangai bintu byakonsha kwimukwasha kuzhikijila masongola enu, balunda nenu, ne baana benu.
