MU NTANDA YA MALWA

3 Zhikijilai Bantu bo Mwatemwa

JIZHAI

ENE MAMBO O KYANEMENA

Bijikila biya na mambo a bya malwa bilengela bantu bavula kubula kukosesha bulunda na bantu bo batemwa.

Bantu baleka kupwanañana na balunda nabo.
Baji mu masongola bendatu na kutoboka.
Bansemi kechi batako muchima ku bibena kupitamo baana babo ne.

Byo Mwafwainwa Kuyuka

Balunda banema mambo betukwasha kwikala na butuntulu bwa mubiji bwawama ne milanguluko yawama.
Bijikila biya na mambo a bya malwa byakonsha kuleta makatazho mu kisemi.
Baana inge baumvwa nangwa kumona masawakya a bintu byatama bomvwa bingi moyo.

Byo Mwakonsha Kuba Luno

Baibolo waamba’mba: “Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.”—Byambo bya Maana 17:17.

Balunda bakonsha kwitukwasha ne kwitubuulako maana. Bano balunda baketukwasha kwikala na bulume bukebewa pa kuba’mba tuchinchike makatazho.

BYA KUBA—Bintu Byakonsha Kwimukwasha

Mu kimye kya bya malwa, zhikijilai bantu bo mwatemwa kupichila mu kuba bino bintu

KOSESHAI MASONGOLA ENU

Koseshai masongola enu

Baibolo waamba’mba: “Bantu babiji bawama kukila uji bunke . . . Mambo inge umo wapona, mukwabo ukamwimanyapo.” (Musapwishi 4:9, 10) Bantu baji mu masongola bafwainwa kwingijilanga pamo kechi kwikyombesha ne.

Kange mutujilenga mukwenu wa mu masongola mpumwa ne. Mwafwainwa kwitekenyanga ne kwilangulukilako.
Mwafwainwa kumonangapo kimye kya kwisamba pa makatazho o muji nao nangwa jimo mu mulungu. Vulukai kuba’mba mwafwainwa kuta muchima pa kupwisha lukatazho kechi kwitobosha ne.
Monaingapo kimye kya kubila pamo bintu byo mwatemwa bonse babiji.
Isambainga pa bimye byawama byo mwiyowele bonse babiji, nabiji kutala pa bipikichala bya pa masongola enu, nangwa kuvulukatu bintu bikwabo bimusangajikile.

“Baji mu masongola kechi bakonsha kuyila mumo mu bintu byonsetu ne, pano bino, kechi kibena kulumbulula’mba konsha baingijila pamo ne. Baji mu masongola bakonsha kufuukwila pamo kintu kimo, ne kwingijila pamo pa kuba’mba akya kyo bafuukula kyubiwe.”—David.

KOSESHAINGA BULUNDA

Koseshai bulunda na bakwenu

Kununga pa kutambula bukwasho kufuma ku bakwetu, ne atweba twafwainwa kumonangapo mashinda a kwibakwashishamo. Inge mwakosesha bakwenu ne anweba bene mukekosesha.
Pa juba pa juba, isambaingapo na bakwenu pa kuba’mba muyuke byo babuka.
Ipuzhai balunda nenu kuba’mba bemubuuleko byo bashinjile makatazho epasha na o mubena kupitamo.

“Makatazho aji nobe kinkukwila, inge mvula ne mwela bimulengela kukankalwa kumona bulongo, balunda nenu bakemukwasha kuyuka pa mpunzha po muji ne ko mwafwainwa kuya. Balunda nenu bemuta muchima kabiji nabo bayuka’mba mwibata muchima.”—Nicole.

KWASHAINGA BAANA BENU

Kwashainga baana benu

Baibolo waamba’mba: “Muntu yense wafwainwa kupelawizha kumvwa, kabiji abande kwamba.” (Yakoba 1:19) Kimye kitanshi, baana benu bakonsha kuchina kwimubuula bijikila byo baji nabyo, bino inge kemuteleke saka mwatekanya, bakakasuluka kwimubuula.

Kwashainga baana benu kukasuluka kwamba milanguluko yabo. Baana bamo bakasuluka kwamba biji ku michima yabo kimye kyo mubena kubapo bintu bimo, nabiji inge mubena kuyapo ku mpunzha imo na motoka nangwa mubena kwenda, kukila kwisamba saka mwaikala.
Monai kuba’mba baana benu kechi babena kutamba bingi masawakya a bintu byatama ne.
Buulai baana benu bintu byo mwauba pa kuba’mba muzhikijile kisemi kyenu.
Nengezhezhai jimo byo mwakonsha kuba inge kwamweka bya malwa ne kupitulukilamo jimo na baana benu.

“Isambainga na baana benu ne kwibaswisha kwamba milanguluko yabo. Bimye bimo, kechi bakonsha kwimubuula’mba baji na moyo, bijikila nangwa bazhingila ne. Mwakonsha kwibabuula’mba bimye bimo ne anweba mwikala na bijikila ne kwibabuula byo muba pa kuba’mba mukepesheko bino bijikila.”—Bethany.

Mwakonsha Kutemwa

LABAINGA!

Mafunde Akwasha Kwikala Bulongo na Bantu

Ñanyi byubilo byafwainwa kwitukwasha kutwajijila kwikala bulongo na bantu?

LABAINGA!

Mu Ntanda ya Malwa—Zhikijilai Bantu bo Mwatemwa

Kikaonde

Mu Ntanda ya Malwa—Zhikijilai Bantu bo Mwatemwa

https://cms-imgp.jw-cdn.org/img/p/102022008/univ/art/102022008_univ_sqr_xl.jpg

g22 Na. 1 pp. 10-12

Bakamonyi ba kwa Yehoba

3 Zhikijilai Bantu bo Mwatemwa

ENE MAMBO O KYANEMENA

Byo Mwafwainwa Kuyuka

Byo Mwakonsha Kuba Luno

Mwakonsha Kutemwa

Mafunde Akwasha Kwikala Bulongo na Bantu

Mu Ntanda ya Malwa—Zhikijilai Bantu bo Mwatemwa

BYA KUKOPOLOLA

ENE MAMBO O KYANEMENA

Byo Mwafwainwa Kuyuka

Byo Mwakonsha Kuba Luno

Mwakonsha Kutemwa

BYA KUKOPOLOLA

Salai Mulaka Wenu

Tumai Musabilo