Bantu bavula kibakatazha bingi pa kuba’mba bataane bintu byanema bikebewa mu bwikalo. Kyatamakotu ke kya kuba’mba bya malwa bibena kumweka mu ntanda bibena kulengela luno lukatazho kubayilako. Mambo ka?

• Mu mpunzha mwamweka bya malwa bintu bikala bingi na mutengo, nabiji kajo ne mazubo.

• Bavula makito apwa nangwa kwibakepesheshako mali o bafola.

• Bya malwa byonauna busulu bwa bantu, mazubo, nangwa bipe ne kwibasha mu buyanji.

• Inge mwingijisha bulongo mali kikemupelela kuyuka bya kuba inge bya malwa byamweka.

• Vulukai kuba’mba mali o mwalama nangwa bintutu bikwabo byakonsha kuleka kwingila.

• Kuji bintu bimo byo mwakonsha kubula kupota na mali, nabiji lusekelo ne lukwatankano mu kisemi.

Baibolo waamba’mba: “Byo tuji na kajo ne bivwalo, tusekela mu bino bintu.”​—1 Timoti 6:8.

Kusekela na bintu byo tuji nabyo kwavwangamo kukepeshako bintu byo tukeba ne kutondwa na bintu byanema byo twikala nabyo pa juba pa juba. Kino kyanema bingi kikatakata inge kechi tuji na mali avula ne.

Pa kuba’mba mutondwe na bintu byo muji nabyo mwafwainwa kupimpulako bwikalo. Inge kimye kyonse mukeba kupota bintu saka mwabula mali, mukekala na makatazho avula.