Bino byo byaambile jibumba jimo jitala pa nkiilo ne kwalauka kwa mwela. Inge mwaitabila kuba’mba Mulenga wetu wituta muchima koaji, ko kuba’mba byamba ba shayuka byakonsha kwimulengela kulanguluka pa mashinda apusana pusana, abikako Lesa alengela ino ntanda kwiwamisha ayo ine.

Nangwa byonkabyo, bantu baonauna bingi ino ntanda kyakuba kechi yakonsha kwiwamisha ayo ine bulongo ne. Mambo ka o twaketekela’mba Lesa ukobapo kimo?

Monai binembelo biji mu kakitenguluzha byo bitulengela kushiinwa’mba ino ntanda ikatwajijila kwikalako.

• Lesa ye walengele ino ntanda. “Mu ntendekelo Lesa walengele jiulu ne ntanda.”—Ntendekelo 1:1

• Ino ntanda ya kwa Lesa. “Ntanda yo ya kwa Yehoba a ne bintu byonse bijimo”—Salamo 24:1

• Lesa walengele ntanda kuba’mba ikatwajijile kwikalako. “Waikajika ntanda pa bitendekesho byayo; kabiji ikekalanga pa mpunzha yayo myaka ne myaka.”—Salamo 104:5

• Lesa walaya bantu’mba bakekala pano pa ntanda myaka ne myaka. “Lesa wa kine, Yenka walengele ntanda, . . . Kechi wiilengele kwikala yatutu ne, bino wiilengele’mba mukekalenga bantu.”—Isaya 45:18

• Lesa walaya’mba bantu bakela pano pa ntanda myaka ne myaka. “Baoloka bakaswana ntanda, kabiji bakekalangamo myaka ne myaka.”—Salamo 37:29

Lesa walengele ntanda mwakwikala bantu kwakubula kwiyonauna. Baibolo witubuula’mba Lesa pa kimye kyanji mwine, ukafumyapo byonse bilengela ntanda konaika.—Lumwekesho 11:18

Lesa walaya mu Baibolo mba’ ukawamisha ntanda ne kwiilenga kwikala ke paladisa kabiji ukavungulula minwe yanji “ne kupa bilengwa byumi bintu byonse byo bikeba.”—Salamo 145:16