Mambo ka Bantu o Balekela Kunemeka Bakwabo?
MAMBO KA O KYANEMENA KUNEMEKA BAKWETU?
Inge twanemeka bakwetu tufwomona bukaji ne kulengela lukatazho kubula kubaya.
-
Kishimpi kya mu Baibolo kyaamba’mba: “Kukumbula na jiwi jakooka kufwomona bukaji, pakuba byambo byashinta bikolomona bukaji.” (Byambo bya Maana 15:1) Kwiambila byambo byatama ne kubula mushingi javula mufumatu makatazho.
-
Yesu waambile’mba: “Kanwa kamba monka mwavujila biji mu muchima.” (Mateo 12:34) Kwamba byatama pa bantu ba mulaka ungi, bantu bafuma ku kyalo kingi nangwa banonshi nangwa bayanji, bafunda nangwa babula kufunda kumwesha kubula mushingi.
Bakeba bya kukebakeba pa kyubilo kya mushingi, bataana’mba mu byalo kukila pa 28 baipwizhe bantu kukila pa 32,000, pa bano kichika kya bantu baambile’mba ano moba bantu bavula mushingi bafwaye.
MWAFWAINWA KUMWESHA BYEPI AMBA MWANEMEKA BAKWENU?
Inge muji ku sukulu nangwa pa nkito, painga mushingi bantu bonse nangwa kya kuba kechi muyila mumo na bintu byo boba ne. Inge kyaikala bino, anweba monaipo bintu bimo bisakwimukwasha kuyila mumo nabo. Kuba bino kukwasha kukepeshako makatazho ne kubula kuzhachishanga bakwetu.
Ubilainga bintu bakwenu byonkatu byo mukeba anweba kwimubila. Inge mulangulukilako bakwenu ne kwibobila lusa, nabo bakemubila byonkabyo.
Lekelaingako bakwenu mambo. Temwai bantu ne kubula kuta muchima pa byambo byatama byo bamba ne byo boba.
BAKAMONYI BA KWA YEHOBA BAMWESHA BYEPI AMBA BANEMEKA BAKWABO?
Atweba Bakamonyi ba kwa Yehoba tupa mushingi bantu mu mapunzha mo twikala ne pa nkito.
Tufunjisha bukine bwa mu Baibolo bantu bonse. Bino kechi tukanjikizha bantu kwitabila mu bintu byo twaitabilamo nangwa kwibafuukwilako bya kuba ne. Pakuba atweba twingijisha byaamba Baibolo kubuulako bantu byo twaitabilamo “na kukooka muchima ne na mushingi mukatampe.”—1 Petelo 3:15; 2 Timoti 2:24.
Twashikwa misalululo o ene mambo pa kupwila kwetu o tutambwila bantu bapusana pusana bakeba kufunda byaamba Baibolo. Twibikako bingi ‘kunemeka bantu bonse’ nangwa kya kuba kechi tutemwa bintu bimo byo bafuukulapo kuba ne.—1 Petelo 2:17.
Tunemeka bakulumpe ba mu kafulumende baji mu byalo mo twikala. (Loma 13:1) Tukookela mizhilo ne kupana misonko. Nangwa kya kuba atweba kechi twivwanga mu bya bumulwila ntanda ne. Pano bino, atweba tunemeka bintu bifuukulapo bakwetu inge basalapo kwivwanga mu bya bumulwila ntanda nangwa ne.
