Mambo ka Bantu o Balekela Kwipa Mushingi mu Bisemi?

JIZHAI

MAMBO KA BISEMI O BYAFWAINWA KWIPELANGA MUSHINGI?

Inge bamulume ne mukazhi mu masongola ne baana saka bepa mushingi, kisemi kikala bingi mu mutende ne kukwatankana.

Buku wa kuba’mba The Seven Principles for Making Marriage Work waamba’mba inge bamulume ne mukazhi bepa mushingi ne kwimwesha butemwe “kechi mu bintutu bikatampe ne, bino ne mu tubintu tucheche to boba pa juba pa juba” masongola abo akosa bingi.
Bakeba bya kukebakeba bataana’mba baana bafunda kunemeka bakwabo bebatemwa bingi ku bakwabo, bekala na bulunda bwawama na bansemi babo. Kabiji kechi bekala bingi na bijikila ne bikola bya ku bongo ne.

MWAFWAINWA KUBA BYEPI KUMWESHA’MBA MWANEMEKA BA MU KISEMI KYENU?

Ubilainga bintu pamo na kisemi kyenu. Kintu kitanshi kyo mwafwainwa kuba anweba ne benakwenu, ke kukwasha kisemi kyenu kuyuka byo kilumbulula kwipa mushingi. Kya bubiji, nembai bintu byo mukeba ba mu kisemi kyenu kuba ne bintu byo bafwainwa kubula kuba. Kya busatu, isambaipo na kisemi kyonse pa kuba’mba yense mu kisemi ayuke byo afwainwa kuba pa kumwesha mushingi.

“Bintu bifuukula muntu wingila na ngovu bikalumbuluka.”—Byambo bya Maana 21:5.

Ikalai batanshi kumwesha’mba muji na mushingi. Nanchi muzhachisha kisemi kyenu pa byo balubankanya, kwibalengulula nangwa kwibachibikizha inge babena kwamba ne anweba nyi?

Bya kuba: Mweshainga mushingi benakwenu ne baana benu. Kabiji kechi mwafwainwa kwibapatu mushingi inge baubapo bintu bimo ne.

“Ikalainga batanshi kunemeka bakwenu.” —Loma 12:10.

Ambainga na mushingi nangwa kya kuba kechi mwatemwa byaamba mukwenu ne. Inge mubena kwisamba, chinuzhukainga kwingijisha byambo bya kuba’mba “anweba kimye kyonsetu byo byo muba” nangwa’mba “anweba kechi mukekileka ne.” Ñambilo ya uno mutundu ikozha bingi ku muchima ne kulefula ba mu kisemi. Kabiji inge paji lukatazho lucheche, lwakonsha kubayilako.

“Kukumbula na jiwi jakooka kufwomona bukaji, pakuba byambo byashinta bikolomona bukaji.”—Byambo bya Maana 15:1.

BAKAMONYI BA KWA YEHOBA BAMWESHA BYEPI AMBA BANEMEKA BISEMI BYABO?

Bakamonyi ba kwa Yehoba batundaika bisemi kwipa mushingi mulwabo. Kabiji kino kyubilo bekyambapo bingi mu bibaaba, mabuku, mabuloshuwa ne mavidyo. Yense wakasuluka kwibitanga kwa kubula kupana mali.

BIBAABA BYAAMBA PA BAJI MU MASONGOLA: Mitwe ya kuba’mba Bya Kukwasha Kisemi yafwainwa kukwasha bamulume ne mukazhi bya . . .

kwitelekanga bulongo inge umo ubena kwamba
kwisamba pa makatazho ne kubula kwifila mfika
kuleka kutoboka

(Yai po banemba’mba “Bya Kukwasha Kisemi” pa jw.org)

BIBAABA BYA BANSEMI: Mitwe ya kuba’mba Bya Kukwasha Kisemi yafwainwa kukwasha bansemi kufunjisha baana babo . . .

kwikala na lukookelo
kwingilangako mingilo ya pa nzubo
kukumbulanga’mba “mwane” ne kwamba’mba “nasanta”

(Yai po banemba’mba “Kukomesha Baana” ne “Kukwasha Banyike” pa jw.org)

Kabiji monai bibaaba bya kuba’mba “Bintu 6 byo Mwafwainwa Kufunjisha Baana” mu Labainga! Na. 2, 2019 ne “Bintu 12 Bilengela Kisemi Kwikala Bulongo” mu Labainga! Na. 2, 2018 mapa 8-11. (Kebai ino mitwe pa jw.org)

BIBAABA BYA BANYIKE: Pa kipungu kya kuba’mba Banyike kiji pa jw.org paji bibaaba, mavidyo ne mapepala a kunembapo banyike afwainwa kwibakwasha . . .

kumvwañananga na bansemi babo, bakolojabo nangwa bankasabo
kwisamba na bansemi mu mushingi pa mizhilo yo bebapa
kwibaketekela ku bansemi babo

(Yai po banemba’mba “Banyike” pa jw.org)

Kechi bakemulipilisha mali pa kwingijisha keyala wetu wa jw.org ne. Kechi kuji kupana mali pa kwingijisha uno keyala nangwa’mba kana mwaikala Bakamonyi ne. Kabiji kechi tukakeba keyala wenu ne.

LABAINGA!