KISHINKA

Kwikala na bijikila kwavwangamo kubula kukasuluka, kumvwa moyo nangwa kwakamwa. Na mambo a kuba’mba twikala mu ntanda mumweka bintu bya kubula kuketekela, bijikila byakonsha kwitupwishisha lusekelo.

BYAMBA BAIBOLO

Mfumu Davida wanembele’mba: “Bimye binga byo nkekala na bijikila, ne bulanda mu muchima wami pa juba pa juba?” (Salamo 13:2) Ñanyi bintu byakwashishe Davida kuchinchika? Kimye kyo alombelenga, wabuujile Lesa byonse byajinga ku muchima wanji ne kuketekela mu butemwe bwa Lesa bubula kwaluka. (Salamo 13:5; 62:8) Lesa witubuula’mba tutayenga bitunemena pe aye. Kinembelo kya 1 Petelo 5:7 kyaamba’mba: “Saka mutaya bijikila byenu pe [Lesa] mambo wimuta muchima.”

Nangwa byonkabyo, kuji bintu byo twafwainwa kuba pa kuba’mba tukepesheko bijikila. Kimye nembi wa Baibolo Paulo kyo ajinga na “kijikila pa mambo a bipwilo byonse,” waingijile na ngovu kutekenesha boba bo atele muchima. (2 Kolinda 11:28) Na mambo a kuba bino, kijikila kyanji kyamulengejile kukwasha bakwabo. Ne atweba byobyo twafwainwa kubanga. Pano bino, kubula kuta bantu muchima kumwesha kuba’mba kechi twibatemwa ne.—Byambo bya Maana 17:17.

“Saka muta muchima ku bintu bya bakwenu kabiji kange mulangulukengatu pa bintu byenu byonka ne.”—Filipai 2:4.

KISHINKA

Bantu bamo bekala na bijikila na mambo a bubi bo baubile kala, na mambo a bikamweka kulutwe, nangwa na mambo a mali. *

BYAMBA BAIBOLO

Kwakamwa na mambo a bubi muntu bo aubile kala: Bantu bamo mu myaka kitota kitanshi saka bakyangye kwikala bena Kilishitu, bapendwapendwanga, kuja bya lunkanankana, kuba bulalelale, ne kwiba. (1 Kolinda 6:9-11) Nangwa byonkabyo, kechi batwajijiletu na kulanguluka pa byo baubanga kala ne, bino bapimpwile mashinda abo ne kuketekela mu lusa lukatampe lwa Lesa lo ebamwesheshe. Salamo 130:4 waamba’mba: “Mambo anweba [Lesa] mulekela mambo kya kine, pa kuba’mba bemwakamwe.”

Kwakamwa na mambo a bikamweka kulutwe: Yesu Kilishitu waambile’mba: “Kange mubambishenga michima na mambo a juba ja kesha ne, mambo juba ja kesha jikekala na bijikila byajo.” (Mateo 6:25, 34) Ñanyi kishinka kyo aambilengapo? Mwafwainwa kutatu muchima pa makatazho a jojo juba. Kange muvwangenga bijikila bya lelo na bijikila bya juba jikwabo ne, mambo byakonsha kwimulengela kukankalwa kulanguluka bulongo ne kufuukula bintu kwa kubula kutekanya. Vulukainga’mba bintu byavula bileta bijikila kechi byanema ne kunematu ne.

Kwakamwa na mambo a mali: Mwanamulume wa maana walombele’mba: “Kange mumpe buyanji nangwa bunonshi ne.” (Byambo bya Maana 30:8) Aye wakebelenga kutondwa na byonka byo ajinga nabyo, kino kyo kyaitabilwa kwi Lesa. Pa Bahebelu 13:5 paamba’mba: “Mwikale babula kutemwa mali, sekelainga mu bintu byonka byo muji nabyo. Mambo [Lesa] waamba’mba: ‘Kechi nkakusha ne, kabiji kechi nkakulekelela ne.’” Kupusanako na mali akonsha kupwa, Lesa kechi ukankalwa kukwasha bantu bamuketekela kabiji bekala bwikalo bwapeela ne.

“Kechi nakimonapo kala muntu waoloka bamulekelela, nangwa baana banji saka bapitamo na kukeba kajo ne.”—Salamo 37:25.

BYAMBA BANTU

: Munembeshi wa byambo aye Harriet Green mu kibaba kyo anembele mu 2008 waambile’mba: “Luno bantu babena kwikala na bijikila byavula bingi.” Mu mwaka wa 2014, Patrick O’Connor wanembele mu pepala wa byambo wa The Wall Street Journal amba: “Bena America luno baji bingi na bijikila kukila kala.”

BYAMBA BAIBOLO

“Bijikila biji mu muchima wa muntu byo bilengela muchima kupopomenwa, pakuba byambo byawama bimusangajika.” (Byambo bya Maana 12:25) “Byambo byawama” kikatakata byakonsha kutanwa mu ‘mambo awama a Bufumu bwa Lesa.’ (Mateo 24:14) Buno Bufumu, ko kuba’mba kafulumende wa Lesa, katatakatu akafumyepo bintu byakankalwa kufumyapo bantu, kupwisha bijikila byonse kupichila mu kufumyapo bine bintu bileta bijikila, kubikapotu ne bikola ne lufu. “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—Lumwekesho 21:4.

“Lesa upana luketekelo emuyuzhe na lusekelo ne mutende na mambo a kumuketekela.”—Loma 15:13.