Sawakya wa mu 2014 wamwesha kuba’mba banyike bavula baji na myaka ya kusemwa pakachi ka 18 ne 25 balanguluka’mba kwilaala saka bakyangye kwisongola “kechi mambo akatampe mu India ne.” Shayuka wa michi wikala mu taunyi wa Mumbai wabuujile pepala wa byambo wa Hindustan Times amba kwesakana na milanguluko yanji, “banyike bavula batendeka bulunda kwa kubula kwikala na mulanguluko wa kutwela mu masongola. Nangwa besambatu juba jimo, nangwa bulundatu bwa byonkabya, nangwa bekala pa nzubo imo, bavula kechi balangulukapo bya kutwela mu masongola ne.”

BYA KULANGULUKAPO: Nanchi bikola bisambukila kupichila mu kuba bulalelale ne kubula kukasuluka mu milanguluko biiya na mambo a kwilaala saka mukyangye kutwela mu masongola nyi?—1 Kolinda 6:18.

Kutoboka toboka mu bisemi javula ko kulengela bantu kufwa bukiji. Bakebakeba bishinka pa Sukulu Mukatampe wa University of Copenhagen pa myaka 11 bafunjilenga pa bantu nobe 10,000 bajinga na myaka pakachi ka 40 ne 60, bataaine kuba’mba bantu batemwa kutoboka na balongo babo bafwa bukiji, kukila boba babula kutoboka toboka na balongo babo. Wanembele uno sawakya waambile’mba kukepeshako kwakamwa ne makatazho ne kupwisha makatazho bukiji “kwakonsha kwikala jishinda jimo janema bingi ja kukepesheshamo bantu bafwa bukiji.”

BAIBOLO WAAMBA’MBA: “Muntu wa maana kechi wambaambatu ne, ne muntu wa milangwe utekanya.”—Byambo bya Maana 17:27.

Kwesakana na byataaine bakeba keba bishinka, pa bantu 564 batwela mu masongola mu Louisiana, aba boba beipanguzha byapwa kabiji bebwezha, inge besongola bakonsha kwabanako pacheche mu myaka itanshi 5 ya masongola abo. Bano bantu bakonsha kwikala bingi na makatazho mu masongola ne kubula kwikala na lusekelo.

BAIBOLO WAAMBA’MBA: “Akya kyasambakanya Lesa [mu masongola], muntu kechi ekyabanye ne.”—Mateo 19:6.