Baji mu masongola inge kebengijile pamo, bakayilanga mumo, byonkatu byuba muntu wendesha ndeke ne umukwashako. Nangwa inge mu masongola abo muji makatazho, bengijila pamo pa kupwisha makatazho.

JIFUNDE JA MU BAIBOLO: “Kechi bakiji babiji ne, bino ke mubiji umo.”—Mateo 19:6.

Ba Christopher baambile’mba: “Masongola kechi aimena pa muntu umo ne. Balume ne bakazhi bafwainwa kwingijila pamo pa kuba’mba bekale na lusekelo mu masongola abo.”

Inge mu masongola mwaikala makatazho, balume ne bakazhi bafwainwa kwingijila pamo pa kuba’mba bapwishe lukatazho. Kuba bino kulengela kubula kwipamo mambo ne kubula kubayisha bintu byalubankanya benakwenu.

Ba Alexandra baambile’mba: “Kwingijila pamo kuleta lusekelo mu masongola. Inge kechi twaingijilanga pamo na bamwatawami ne, inge tujitu nobe bantu bekala pamo babula kwisongola. Kabiji inge tuyila mumo pa kufuukula bintu byanemba mu bwikalo ne.”

IIPUZHAI’MBA

• Nanchi mmona mali o mfola amba ami bunketu nyi?

• Inge mbena kukeba kukokoloka, abya nkeba kwikalatu bunke kwa kubula benakwami nyi?

• Nanchi nchinuzhuka kwisamba na balongo ba benakwami nyi?

ISAMBAI NA BENAKWENU

• Mu ñanyi bintu mo tubena kwingijila pamo mu masongola etu?

• Ñanyi bintu byo twafwainwa kuwamishako?

• Twakonsha kuba byepi pa kuba’mba twingijilenga pamo mu masongola?

BYA KUBA

• Balume ne bakazhi kechi bafwainwa kwikyombeshanga byonka byuba bantu bapama mpila ne, bino bafwainwa kubilanga bintu pamo mu masongola abo.

• Kange mulangulukenga’mba, ‘Nakonsha kushinda byepi?’ ne, bino mwafwainwa kulangulukanga’mba ‘Twakonsha kushinda byepi luno lukatazho?’

Ba Ethan baambile’mba: “Kechi mwafwainwa kuta muchima pa bintu byatama byauba benakwenu ne. Kyanema mu masongola ke mutende ne lukwatankano.”

JIFUNDE JA MU BAIBOLO: “Saka muta muchima ku bintu bya bakwenu kabiji kange mulangulukengatu pa bintu byenu byonka ne.”—Filipai 2:3, 4.