Kwisamba mu kisemi kuwama bingi inge bansemi ne baana kebambe biji ku michima yabo.

Kwisamba na baana kwakatazha bingi. Buku wa kuba’mba Breaking the Code waamba’mba: “Baana benu byo bakijinga banyike, bemubuulanga byonse bibakatazhanga. Bino luno byo bakomako, kechi bemubuula byavula ne kabiji kechi muyuka bibena kwibakatazha mu milanguluko ne.” Nangwa kya kuba kechi bakeba kwisamba ne anweba ne, mwafwainwa kumonapo mashinda a kwisambilamo nabo.

Isambainga na baana benu. Mwafwainwa kwisambanga na baana benu kimye kyo babena kukeba kwisamba nenu.

Ba Lisa baambile’mba: “Bansemi kechi bafwainwa kwambila baana babo amba, ‘Pano popo ubena kukeba kwisamba ne amiwa saka najinga nobe juba jonse’ ne. Inge mwanenu ukeba kwisamba nenu, kechi mwafwainwa kukana ne. Kishinka ke kya kuba’mba bansemi bafwainwa kwisambanga na baana babo.”

Ba Herbert baambile’mba: “Twisamba bingi na baana bami bufuku nangwa kya kuba natemwa bingi kulaala.”

JIFUNDE JA MU BAIBOLO: “Muntu yense kechi akebengatu bintu byamuwamina aye mwine ne, poso bintu byawamina ne mukwabo.”—1 Kolinda 10:24.

Yukai bintu bimulengela kutabankana. Nsemi wa mulume umo waambile’mba: “Bimye bimo nteleka ku byamba baana bami aku saka mbena kuba bintu bikwabo. Pano bino, baana bayuka inge kechi natako muchima ne.”

Inge ne anweba byobyo muba, mwafwainwa kuzhimya TV ne biñambañambatu bikwabo kimye kyo mubena kwisamba na baana benu. Inge mwanenu ubena kwamba, mutelekainga nangwa kya kuba byo abena kwamba kechi mwibitemwa ne.

Ba Maranda baambile’mba: “Baana bafwainwa kuyuka’mba twibatemwa bingi. Inge bayuka’mba kechi mwibatemwa ne, kikebakatazhanga kwimubuula byo babena kulanguluka, akino kyakonsha kwibalengela kubuulanga makatazho abo bantu bangi bebata muchima.”

Ba Anthony baambile’mba: “Kechi mwafwainwa kuzhingilanga bukiji nangwa kya kuba baana benu baamba bintu byabula kufwainwa ne.”

JIFUNDE JA MU BAIBOLO: “Saka muteshako muchima ku byo mumvwa.”—Luka 8:18.

Ikalaingapo na kimye kya kwisamba na baana benu. Baana bakeba bingi kwisamba na bansemi babo inge bayapo ku mpunzha imo.

Ba Nicole baambile’mba: “Kimye kyo tuya na kufwakasha na baana betu popo twisamba bingi nabo. Kuya nabo ku mapunzha a uno mutundu kulengela baana betu kukasuluka pa kwisamba nabo.”

Kimye kya kuja kajo kyo kimye kyawama kwisamba na baana.

Ba Robin baambile’mba: “Pa kuja kajo ka mulajilo, popo twisamba pa bintu byatama ne byawama byaji kwitumwekela. Kuba bino kwitukwasha kukwatankana ne kuyuka’mba kuji bakonsha kwitukwasha.”

JIFUNDE JA MU BAIBOLO: ‘Muntu yense wafwainwa kupelawizha kumvwa ne kubanda kwamba.’—Yakoba 1:19.