Balume ne bakazhi betemwa banemeka bingi masongola abo mambo bayuka’mba kechi afwainwa kupwa ne. Kuba bino kulengela masongola abo kukosa. Bonse babiji bebikako kutwajijila kwita muchima mu masongola nangwa kya kuba babena kupita mu makatazho.

Bamo batwajijila kwikala mu masongola na mambo a kwibakanjikizha ku balongo babo ne balunda nabo. Pano bino, butemwe ne mushingi byo byafwainwa kulengela bantu kutwajijila kwikala mu masongola.

JIFUNDE JA MU BAIBOLO: “Mwanamulume kechi wafwainwa kwabana na mukazhanji ne.”—1 Kolinda 7:11.

Ba Micah baambile’mba: “Inge mwitemwa mu masongola, kechi mukazhingilanga bukiji ne. Mukelekelangako mambo ne kulomba lulekelo lwa mambo. Kabiji kechi mukapwisha masongola enu na mambo a makatazho ne.”

Inge mu masongola muji makatazho, balume ne bakazhi babula kwitemwa bamba’mba, ‘Kyawamatu ne kwikaana.’ Kulanguluka bino kulengela kupwisha masongola.

Ba Jean baambile’mba: “Bantu bavula batwela mu masongola na mulanguluko wa kuba’mba umvwe bakapitenga mu makatazho, bakekana. Bantu inge batwela mu masongola na uno mulanguluko kimwesha’mba kechi betemwa nangwa kwita muchima ne.”

IIPUZHAI’MBA

Inge mwapusenamo . . .

• Nanchi mwilangulusha pa kutwela mu masongola na benakwenu nyi?

• Nanchi mulanguluka kusongola nangwa kusongolwa ku muntu mukwabo nyi?

• Abya mwamba’mba, “Masongola apwetu” nyi? Inyi amba “Nsakusongola nangwa kusongolwa ku muntu wanta muchima” nyi?

  Inge byobyo kiji, kibena kumwesha’mba mwafwainwa kwibikako kwitemwa mu masongola enu.

ISAMBAI NA BENAKWENU

• Nanchi mu masongola etu twaleka kwita muchima nyi? Inge byobyo kiji, ñanyi bintu byalengela?

• Ñanyi bintu byo twafwainwa kuba pa kuba’mba tutwajijile kwitemwa mu masongola?

BYA KUBA

• Buulainga benakwenu amba mwi batemwa

• Mwafwainwa kubikanga bipikichala bya benakwenu ko mwingijila, inge kemube bino, kimwesha’mba mwatemwa bingi benakwenu

• Tuminainga benakwenu foni kimye kyo muji ku nkito nangwa inge mwafumapo

JIFUNDE JA MU BAIBOLO: “Kyasambakanya Lesa, muntu kechi ekyabanye ne.”—Mateo 19:6.