BANYIKE
9: Kwiyuka byo Uji
BYO KILUMBULULA
Kuyuka byo uji kwanema bingi kukila jizhina jobe ne byo umweka. Kino kyavwangamo kuyuka byubilo byobe, byo waitabilamo ne byo uji. Kabiji kwavwangamo ne byo ulanguluka ne bintu byo watemwa kuba.
ENE MAMBO O KYANEMENA
Inge wayuka bulongo byo uji, kikakulengela kutwajijila kwikala na byubilo byawama, kabiji bakwenu kechi bakakukanjikizhanga kuba bintu byatama ne.
Adrian waambile’mba: “Bantu bavula baji nobe bilubi byo batanchika mu mashitolo. Kechi basala bya kuvwala byo bafwainwa kuvwala ne, bino bakwabo bo bebasajilako.”
Courtney waambile’mba: “Luno ntokesha Lesa ku muchima nangwa mbena kupita mu makatazho. Byuba bantu bo nesamba nabo byo bindengela kuyuka’mba balunda nami ba kine.”
JIFUNDE JA MU BAIBOLO: “Kilekai kulondela bintu bya buno bwikalo, bino mwalulukenga kupichila mu kupimpulanga milanguluko yenu.”—Loma 12:2.
BYO WAKONSHA KUBA
Yuka byubilo byo uji nabyo ne byo ukeba kwikala nabyo kulutwe. Ukoba bino inge wayuka bintu byo uba bulongo, byo ubula kuba bulongo ne byo waitabilamo. Iipuzhe mepuzho alondelapo pa kuba’mba uyuke byo uji.
Bintu byo uba bulongo: Ñanyi mingilo yo nayuka? Ñanyi bintu byo nguba bulongo? (Wakonsha kwiipuzha’mba: Nanchi nkelwa ku mingilo inyi? Nanchi nekanya nyi? Ngingila na ngovu nyi? Nanchi nji na muchima wa bumpanyi nyi?) Ñanyi bintu byawama byo nguba?
BYA KUBA: Nanchi kikukatazha kuyuka bintu byo uba bulongo nyi? Ipuzha bansemi bobe nangwa mulunda nobe ye waketekela bingi akubuuleko bintu byo uba bulongo ne byo ubula kuba bulongo. Kabiji mwipuzhe ene mambo o aambila byobyo.
JIFUNDE JA MU BAIBOLO: “Muntu yense apime byubilo byanji, ne kwitotela mu bintu byanji mwine, kechi kwiesakanya ku muntu mukwabo ne.”—Ngalatiya 6:4.
Bintu byo ubula kuba bulongo: Ñanyi bintu byo nafwainwa kwingijilapo mu bwikalo bwami? Ñanyi kimye kyo ngesekwa kuba bintu byatama? Mu ñanyi bintu kikatakata mo nafwainwa kwikala na kyubilo kya kwipelula?
JIFUNDE JA MU BAIBOLO: “Umvwe twaamba’mba, ‘Bundengamambo tufwabo,’ ko kuba’mba tubena kwijimbaika atwe bene.”—1 Yoano 1:8.
Byo waitabilamo: Ñanyi mafunde o ndondela mu bwikalo bwami kabiji mambo ka? Nanchi naitabila mwi Lesa nyi? Ñanyi bishinka bindengela kushiinwa’mba Lesa koaji? Ñanyi byubilo byo mmona kuba’mba byatama kabiji mambo ka? Ñanyi bintu byo naketekela’mba bikamweka kulutwe na lwendo?
JIFUNDE JA MU BAIBOLO: “Maana a kupima bintu akakulamanga, ne milangwe ikakuzhikijilanga.”—Byambo bya Maana 2:11.
Mwakonsha Kutemwa
MIKUMBU YA MEPUZHO 10 EPUZHA BANYIKE
Nanchi Neyuka Bulongo byo Nji Nyi?
Kuyuka kuba’mba wanema, bulume, po upelela kuba bintu, ne bikonkwanyi kukukwasha kufuukula bulongo bintu inge bintu byakatazha
