Bansemi bafwainwa kubanga bintu byonka byo bafunjisha baana babo. Kyakonsha kukatazha bingi mwanenu kwikala wakishinka inge wimumvwa na kubepa. Nabiji inge kwaiya muntu ye mubena kubula kukeba kwisamba nanji, mwamubula’mba, “Babuule’mba mfwapo.”

Ba David baambile’mba: “Javula bantu bamba’mba, ‘Wafwainwa kubanga byo nkubuula, kechi kulondela byo nguba ne.’ Bino ino ñambilo kechi ikwasha pa kufunjisha baana ne. Baana baji nobe butonge. Byonkatu butonge byo butwezha mema ne kwialama, ne baana byo byo balama bintu byo bamona atweba bansemi babo na kuba. Kabiji baana bayuka inge atweba bansemi kechi tubena kulondela bintu byo twibafunjisha ne.”

JIFUNDE JA MU BAIBOLO: “Obewa usapwila’mba, ‘Kwiba ne,’ nanchi wiba nyi?”—Loma 2:21.

Baana javula boba bintu byuba bansemi babo, kechi byuba bakwabo ne. Kino kibena kulumbulula’mba baana bafunda bintu byavula ku bansemi babo, bino bansemi bakonsha kubatu bino inge baji na byubilo byawama.

Ba Nicole baambile’mba: “Mwakonsha kukajipila mwanenu bimye byavula pa kintutu kimo, bino kyakonsha kumweka nobe kechi watako muchima ku byo mubena kwamba ne. Pano bino, juba jo mukoba kintu kyo mwamukajipilangapo, ukemwambilamo.” Baana batako bingi muchima ku bintu byo twibafunjisha nangwa kyakonsha kumweka nobe kechi batako muchima ne.”

JIFUNDE JA MU BAIBOLO: ‘Maana afuma mwiulu kechi aji na bukamfutumfutu ne.’—Yakoba 3:17.

Langulukai pa bintu byo mwatemwa. Ñanyi bintu byo mwatemwa bingi kutamba? Mulama byepi benakwenu ne baana benu? Balunda ba mutundu ka bo muji nabo? Nanchi mulangulukilako bantu nyi? Nanchi mukeba baana benu bakekale na byubilo byo mujipo nabyo nyi?

Ba Christine baambile’mba: “Amiwa ne benakwami kechi tufunjisha baana betu kwikala na byubilo byo twabula ne.”

Mwafwainwa kulomba lulekelo lwa mambo inge mwalubankanya. Baana bayuka’mba kechi mwaoloka ne. Inge mwaambila bakazhi benu ne baana benu amba, “Ndekelaiko mambo,” ko kuba’mba mubena kwibafunjisha kwikala bakishinka ne kwipelula.

Ba Robin baambile’mba: “Baana betu bakeba’mba tulombenga lulekelo lwa mambo inge twalubankanya. Inge kechi tubena kulomba lulekelo lwa mambo ne, kechi tukafunjisha baana betu kulomba lulekelo lwa mambo inge balubankanya ne.”