Bantu bengila na ngovu bebikako bingi pa kwingila mingilo. Bebikako kwingila na ngovu pa kuba’mba bekale na bya kwikwashishamo mu bwikalo ne kukwasha bakwabo. Kabiji kechi basala nkito ya kwingila ne.

Kishinka ke kya kuba’mba bonse tuji na mingilo yo twafwainwa kwingila. Bantu bavula lelo jino kechi bakeba kwingila na ngovu ne. Bino inge ke wingile na ngovu ukamwenamo bintu byawama.—Musapwishi 3:13.

Reyon waambile’mba: “Kwingila na ngovu kunkwasha kwikala na lusekelo ne kubula kwilengulula. Kabiji luno lusekelo lwandengela kutemwa bingi nkito yo ñingila. Kunungapo, muntu wingila na ngovu ulenga jizhina jawama.”

JIFUNDE JA MU BAIBOLO: “Mu kwingila na ngovu mufuma byawama.”—Byambo bya Maana 14:23.

Mashinda aji panshipo akonsha kukukwasha kutemwa kwingila nkito.

Funda bya kwingila nkito bulongo. Umvwe ubena kwingila mingilo pa nzubo, kunemba byo baji kukupa ku sukulu, nangwa inge uji ku nkito, ingilanga na ngovu. Inge wafunda bya kwingila nkito, mona byo wakonsha kuwamishako ñingijilo yobe ne kwingila yoyo nkito mu kimye kicheche. Inge wayuka bya kwingila bulongo nkito, ukengilanga na lusekelo.

JIFUNDE JA MU BAIBOLO: “Nanchi wamonapo muntu wayuka kwingila bulongo mwingilo wanji nyi? Aye ukemana ku bamfumu; kechi ukemana ku bantutu ne.”—Byambo bya Maana 22:29.

Langulukilako bakwenu. Javula inge waingila bulongo nkito yobe, bantu bamwenamo. Inge waingila mingilo ya pa nzubo, ukapezhezhako mingilo ba mu kisemi.

JIFUNDE JA MU BAIBOLO: “Mu kupana mufuma lusekelo lukatampe kukila mu kutambula.”—Byubilo 20:35.

Ingilangako ne mingilo ikwabo. Kechi wafwainwa kwingilatu nkito yonka yo bakupa ne, bino wakonsha kwingila ne ikwabo. Inge keube bino, ukefuukwilanga bintu mu bwikalo, kabiji ukengilanga nkito na muchima yense, kechi kya kukukanjikizha ne.—Mateo 5:41.

JIFUNDE JA MU BAIBOLO: “Mingilo yobe yawama ubule kwiingila kya kukukanjikizha, poso mo waswila obewa mwine.”—Filemonyi 14.

Ingilanga papelela bulume bobe. Bantu bengila na ngovu kechi bankope ne, batemwa bingi kwingila. Bayuka pa kupelela pa kwingila nkito, basangalela mu mingilo yabo ne kwikalapo na kimye kya kukookoloka.

JIFUNDE JA MU BAIBOLO: “Kyawama kukokolokako kukila kukizhamo kwingila mingilo ne kupulwilamotu mabuula.”—Musapwishi 4:6.