4 Nanchi Lesa Witulengele’mba Tukapitenga mu Makatazho Nyi?
Ene Mambo a o Kyanemena Kuyuka Mukumbu wa Buno Bwipuzho
Kuyuka mukumbu wa buno bwipuzho kwakonsha kupimpula ndangulukilo yetu.
Bya Kulangulukapo
Mambo ka Lesa walengele bintu byawama biji pano pa ntanda o aswishisha makatazho o tubena kupitamo?
Bantu babula kwitabila balanguluka’mba Lesa ye ulengela’mba tupitenga mu makatazho nangwa kulanguluka’mba ufwako. Bamba’mba makatazho apitamo bantu amwesha’mba (1) Lesa kechi uji na bulume bwa kupwisha makatazho ne, (2) Lesa kechi ukeba kupwisha makatazho ne, nangwa’mba (3) Lesa ufwako.
Nanchi bino byo byonkatu bitulengela’mba tupitenga mu makatazho nyi?
YUKILAIPO NE BIKWABO
Tambai vidyo wa kuba’mba Twakonsha Kushiinwa Byepi Amba Biji mu Baibolo bya Kine? uji pa jw.org.
Byaamba Baibolo
Lesa kechi witulengele’mba tukapitenga mu makatazho ne.
Ukeba’mba twikalenga bulongo.
“Kintu kyawama ku muntu ke kusangalala ne kuba bintu byawama mu bwikalo bwanji, ne kuba’mba muntu yense wafwainwa kuja, kutoma ne kusangalela mu mingilo yanji yonse. Kino ke kya bupe kyafuma kwi Lesa.”—MUSAPWISHI 3:12, 13.
Lesa wapeele bantu babiji batanshi bintu byonse byakebewenga mu bwikalo bwabo pa kuba’mba babulenga kupita mu makatazho.
Lesa kechi walengele bantu batanshi pamo na baana babo kuba’mba bakapitenga mu makatazho ne.
“Lesa wibapesheshe ne kwibambila’mba: ‘Semainga ne kusemununa, muyuzhe ntanda ne kwiijima.’”—NTENDEKELO 1:28.
Bantu batanshi bafuukwilepo kusatukila Lesa.
Kyafuminemo, beletejile bene makatazho ne baana babo bonse pamo.
“Byonkatu bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.”—LOMA 5:12. *
Lesa kechi walengele bantu kuba’mba bakatangijilenga bakwabo ne.
Byonkatu byo kyakonsha kukatazha muntu kwikala pa mema, byo byo kyakonsha ne kukatazha muntu kutangijila muntu mukwabo.
“Muntu mwine kechi uji na luusa lwa kwitangijila mu jishinda jo afwainwa kuyamo ne.”—YELEMIYA 10:23.
Lesa kechi ukeba’mba tupitenga mu makatazho ne.
Ukeba atweba kwikala bulongo ne kubula kupita mu makatazho
“Kine, umvwe mwakookela mikambizho yami! Mutende wenu ukekala nobe mukola Ne bololoke bwenu bukekala nobe manyaki a pa kalunga ka mema.”—ISAYA 48:18.
^ jifu. 17 Mu Baibolo, kyambo kya kuba’mba “bundengamambo” kechi kilumbululatu kuba byatama ne, kilumbulula ne bwikalo bwaswana bantu bonse baji pano pa ntanda.
Mwakonsha Kutemwa
KYAMBA KYA USOPA
Lesa umvwa byepi inge mubena kuyanda?
Bino binembelo bya mu Baibolo bisa kwimukwasha kuyuka Lesa byo omvwa inge mubena kuyanda.
