Kechi kyawama bantu boba byawama kupita mu makatazho ne. Bantu bamo balanguluka’mba inge kya kuba muntu uba byawama ukapita mu makatazho kulutwe ko kuba’mba kechi kyailamo kuba byawama ne.

Bantu balanguluka kuba’mba kupita mu makatazho kyo kyaswa muchima wa Lesa. Bakwabo balanguluka’mba Lesa wingijisha makatazho kukambwilamo bantu boba byatama nangwa kweseka lwitabilo lwa bantu boba byawama. Kabiji bakwabo bamba’mba kechi kyakonsheka kuyuka kilengela bantu boba byawama kupita mu makatazho ne. Na mambo a luno lwitabilo, bantu bavula bepuzha amba, . .

• Inge makatazho onse o tupitamo kyo kyaswa muchima wa Lesa, pano mambo ka a kukebela kwikala na butuntulu bwa mubiji bwawama ne kukeba kufuukula bintu bulongo?

• Inge kya kuba Lesa wituta muchima, mambo ka kyo esekela lwitabilo lwa bantu na makatazho?

  YUKILAIPO NE BIKWABO

  Tambai vidyo wa kuba’mba Mambo ka Lesa o Aswishisha Buyanji? uji pa jw.org.

Inge bantu ke bapite mu makatazho kechi kilumbulula’mba Lesa ubena kwibakambula ne.

Kupusanako na byaitabilamo bantu, javula makatazho amweka na mambo a kutanwa pa mpunzha patama pa kimye kyabula kufwainwa.

“Aba banyemesha lubilo kechi bo bashinda mu kapela ne, nangwatu bantu bakosa kechi bo bashinda mu nkondo ne, nangwatu ba maana kechi bo bekala na kajo ne, nangwatu boba bayuka mwa kubila bintu kechi bo bekala na bunonshi ne, nangwatu baji na maana kechi bo bekala bulongo ne, mambo bimye ne bintu bya kubula kuketekela, bibamwekela bantu bonse.”—MUSAPWISHI 9:11.

Bundengamambo botwaswana nabo bwitulengela kupita mu makatazho.

Bantu javula beingijisha kyambo kya kuba’mba “bundengamambo” ku muntu walenga mambo. Nangwa byonkabyo, Baibolo waingijisha kino kyambo kya kuba’mba “bundengamambo” kulumbulula bwikalo bwaswana bantu bonse, baji na byubilo byawama nangwa byatama.

“Amiwa nasemenwe mu bubi, kabiji bamama bañimichile mu bundengamambo.”—SALAMO 51:5, Tubyambo twa munshi.

Bundengamambo bulengela bantu kupita mu makatazho.

Bundengamambo bwitulengela bulunda bo tuji nabo na Yehoba Lesa ne na bilengwa bikwabo konaika. Kino kyalengela bonse pano pa ntanda kwikala mu makatazho.

“Byo nkeba kuba kyaoloka, kyatama kyo kinkosela.”—LOMA 7:21.

“Bilengwa byonse bibena kubinza ne kumvwa misongo.”—LOMA 8:22.