Inge twakumbula’mba ee, ko kuba’mba twakonsha kukepeshako makatazho.

Bantu beletela byepi makatazho o bapitamo?

• Kukabishañana.

  Kwesakana na kipamo kya World Health Organization (WHO) muntu umo pa bana bakimukabishapo kala ku bwanyike kabiji mwanamukazhi umo pa banabakazhi basatu bakimukunapo kala.

• Kufwisha mulongo nangwa mulunda.

  “Mu 2016 bantu nobe 477,000 mwaya ntanda bafwile,” byo byaambile kipamo kya WHO mu pepala wa World Health Statistics wa mu 2018. Ku kino kibelengelo twakonsha kubikako ne kibelengelo kya bantu 180,000 bo baipaile mu nkondo ne bafwile na mambo a malwañano.

• Kukolwakolwa.

  Kibaba kimo kyanembele Fran Smith mu pepala wa National Geographic, kyaambile’mba: “Bantu kukila pa milyonyi umo bapepa fwanka, kabiji fwanka uji pa bikola bitanu bibena kwipaya bantu nabiji, kikola kya muchima, kinkanku, kikola kilengela kubula kupema bulongo ne kansa.”

• Misalululo.

  “Kusalulula bantu na mambo a buyanji, kuba muntu kyatama, kushikwa bantu na mambo a kikoba, kupanga bantu pa mpunzha yabo, kulengulula banabakazhi ne kwikyombesha, abino byonse byo bibena kulengela bantu kupita mu makatazho,” byo byaambile shayuka umo wa jizhina ja Jay Watts.

  YUKILAIPO NE BIKWABO

  Tambai vidyo wa kuba’mba Mambo ka Lesa o Alengejile Ntanda? uji pa jw.org

Bantu bene bo babena kulengela bintu bimo byatama bibena kumwekanyika mu ntanda.

Makafulumende o abena kulengela makatazho avula abena kupitamo bantu bo balama.

“Bantu . . .balama bantu bakwabo na kwibayanjisha.”—MUSAPWISHI 8:9.

Twakonsha kukepeshako makatazho.

Mafunde a mu Baibolo etukwasha kwikala na butuntulu bwa mubiji bwawama ne kwikala mu mutende na bakwetu.

“Muchima watekanya upana bumi ku mubiji, bino kichima kiji nobe kikola kilengela bikupa kubola.”—BYAMBO BYA MAANA 14:30.

“Mfika yonse po yapela, bukaji ne kubuuka bukaji, kubwazanga, mwenga ne bintu byonse byatama mwibifumyemo mwi anweba.”—EFISESA 4:31.