BYAMBA BANTU BAMO

Bantu bavula balanguluka’mba muntu uji na lwitabilo witabilatu bintu kwakubula ne bishinka. Kya kumwenako, muntu watemwa bya bupopweshi wakonsha kwamba’mba, “Naitabila mwi Lesa.” Bino inge bamwipuzha’mba, “Mambo ka o waitabila bino?” wakonsha kukumbula’mba, “Abino byo byo bankomeshe” nangwa’mba, “Byo byo bamfunjishe kufumatu ku bwanyike.” Muntu wamba bino kechi twakonsha kwamba’mba uji na lwitabilo ne, bino ulondelatu byo bamubuujile.

BYAMBA BAIBOLO

“Lwitabilo ke kintu kimulengela kushiinwa’mba akya kyo mwaketekela kikamweka, kyo kiyukilo kimwesha’mba akya kyo mwaitabila kya kine nangwa kya kuba kechi mwikimona ne.” (Bahebelu 11:1) Pa kuba’mba muntu ashiinwe’mba kyo aitabilamo kikamweka, wafwainwa kwikala na bishinka byamulengela kwitabila. Mu mulaka mwine mutanshi, byambo bya kuba’mba “kushiinwa’mba akya kyo mwaketekela kikamweka,” kechi bilumbululatu byo tumvwa mukachi ka muchima nangwa byo tukeba’mba bikamweke ne. Onkao mambo, lwitabilo lulumbulula kwikala na bishiino bitulengela kwitabila mu bintu.

“Byubilo byanji [Lesa] bibula kumweka byamweka patoka kufumatu kimye kyo alengele ntanda, mambo bimwekela mu bintu byo alenga, ko kuba’mba bulume bwanji bwa myaka ne kuba’mba ye Lesa.”—Loma 1:20.

BYAMBA BAIBOLO

“Kwa kubula lwitabilo kechi kyakonsheka kutokesha Lesa ku muchima ne, mambo yense usolomoka Lesa wafwainwa kuketekela’mba koaji kabiji ye ufweta aba bamukebesha.”—Bahebelu 11:6.

Byonka byo twaambapo kala, bantu bavula baitabila mwi Lesa na mambotu a kuba’mba byo byo bebabuujile. Bamo bakonsha kwamba’mba, ‘Byo byo bankomeshe.’ Bino Lesa ukeba’mba aba bamupopwela bashiinwe kuba’mba koaji kabiji wibatemwa. O ene mambo Baibolo o etukambizhizha kuba’mba twafwainwa kumukebesha, pa kuba’mba tumuyuke bulongo.

“Fwenyai kwipi ne Lesa, ne aye ukafwenya kwipi ne anweba.”—Yakoba 4:8.

BYAMBA BAIBOLO

Baibolo waamba’mba “lwitabilo lwiya pa kumvwa kintu.” (Loma 10:17) Onkao mambo, kintu kitanshi kyo twafwainwa kuba pa kuba’mba twikale na lwitabilo mwi Lesa ke ‘kumvwisha’ bitufunjisha Baibolo pe aye. (2 Timoti 3:16) Kufunda Baibolo kukemukwasha kutaana mikumbu ya mepuzho anema, nabiji a kuba’mba: Lesa ye ñanyi? Ñanyi bishiino bimwesha kuba’mba koaji? Nanchi Lesa wanta muchima nyi? Ñanyi bintu Lesa byo akoba kulutwe na lwendo?

Bakamonyi ba kwa Yehoba bakeba kwimukwasha kufunda Baibolo. Byonka byo twaamba pa keyala wetu wa jw.org, “Bakamonyi ba kwa Yehoba batemwa kufunjisha bantu bya mu Baibolo, bino kechi tukanjikizha bantu kwiya mu bupopweshi bwetu ne. Tubula bantu byonka byaamba Baibolo, saka twayuka kuba’mba muntu mwine ye uji na lūsa lwa kusalapo mwine kyo akeba kwitabilamo.”

Onkao mambo, lwitabilo lwenu lwafwainwa kwimena pa bishiino byo mumona bimwesha kuba’mba bintu byo mutanga mu Baibolo bya kine. Umvwe kemube bino, mukekala byonka byajinga bantu bamo ba kala bafunjilenga Binembelo, “mambo abo batambwijile mambo a Lesa na muchima yense ne kubalaula bulongo Binembelo moba onse kuba’mba bayuke kana bino bintu bya kine nangwa ne.”—Byubilo 17:11.

“Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.”—Yoano 17:3.