MUTWE WA PA NKUPIKO | NANCHI BAIBOLO KINE WAFUMA KWI LESA NYI?
Nanchi Baibolo—Kine ‘Wanembelwe na Lutangijilo lwa Mupashi wa Lesa’ Nyi?
NANCHI mwaitabila kuba’mba Baibolo buku wa Lesa nyi? Inyi mulanguluka’mba ke bukutu muji milanguluko ya bantu?
Bantu bebepekezha kwikala bena Kilishitu bepachika bingi pa ano mepuzho. Kupesapesa kwajingako mu mwaka wa 2014 mu United States bataaine kuba’mba bantu baya mu machechi bavula baambile’mba, “Baibolo kampe ke buku wa Lesa.” Bino pa bantu batanu, umotu ye waambile’mba Baibolo ke buku muji “mashimikila a kala ne mizhilo yanembele bantu.” Abino byo baambile, bibena kumweshatu patoka’mba twafwainwa kwibikako pa kuba’mba tuyuke inge kya kine Baibolo ‘wanembelwe na lutangijilo lwa mupashi wa Lesa.’—2 Timoti 3:16.
‘KUNEMBWA NA LUTANGIJILO LWA MUPASHI WA LESA’—KULUMBULULA KA?
Mu Baibolo muji mabuku 66, anembele banabalume 40 kukila pa myaka nobe 1,600. Pano inge kya kuba bantu bo banembele Baibolo, twakonsha kwamba byepi amba Baibolo ‘wanembelwe na lutangijilo lwa mupashi wa Lesa’? Byambo bya kuba’mba ‘kunembwa na lutangijilo lwa mupashi wa Lesa’ bimwesha kuba’mba byambo biji mu Baibolo byafumine kwi Lesa. Baibolo waamba’mba: “Bantu baambilenga byafumine kwi Lesa byo bebatangijile ku mupashi wazhila.” (2 Petelo 1:21) Mu jishinda jikwabo, twakonsha kwamba’mba Lesa waingijishe bulume bubula kumweka, ko kuba’mba mupashi wanji wazhila, kubuula bantu byambo byo bafwainwe kunemba mu Baibolo. Twakonsha kufwanyikizha kino ku mukulumpe wa nkito ubena kubuula munembeshi wanji kumunembelako nkalata. Ino nkalata kechi ya munembeshi wanji ne, bino ke ya mukulumpe wanji wa nkito waji kumubuulanga bya kunemba.
Banembi bamo ba Baibolo bebabuujilenga ku bamalaika byambo bya Lesa byo bafwainwe kunemba. Bamo Lesa wibamweshanga bimwesho, bakwabo wibabuulanga byambo byanji mu biloto. Kimye kimo Lesa wibaswishishe banembi kunemba byambo byo ebabuujilenga mu byambo byabo, bino bimye bikwabo wibambilanga kwibinembatu suka. Nangwa kya kuba bano banembi batambwilenga byambo bya Lesa mu mashinda apusana pusana, bino bonse banembele milanguluko ya Lesa.
Pano twakonsha kushiinwa byepi kuba’mba Lesa watangijile bantu banembelenga Baibolo na mupashi wanji wazhila? Akilangulukai pa bishinka bisatu byalondelapo bitulengela kushiinwa’mba Baibolo ke buku wa Lesa.
