BYAMBAPO BAIBOLO
Bamalaika
Mu mabuku ne mu mafilimu mutanwa bipikichala bya bamalaika ba kulenga. Nanchi bamalaika bo bañanyi, kabiji ñanyi mwingilo ye bengila?
Nanchi bamalaika bo bañanyi?
BYAMBAPO BAIBOLO
Lesa wa Bulume bonse walengele bamalaika saka akyangye kulenga ntanda ne bantu batanshi. Bano bamalaika baji bingi na bulume kukila bantu, kabiji bekala mwiulu. Kafwako muntu wakiyapo kala mwiulu ne. (Yoba 38:4, 7) Baibolo utela bano bamalaika ba maana amba “mipashi.”—Salamo 104:4. *
Bamalaika baji banga? Kuji bamalaika bavula bingi. Bamalaika bazhokoloka jitanda ja Lesa baji “mabumba a mabumba,” nangwa’mba “makumi a biumbi bimye makumi a biumbi.” (Lumwekesho 5:11; tubyambo twa munshi) Bino byambo bibena kumwesha kuba’mba kuji bamalaika bavula bingi.
“Namwene . . . bamalaika bavula bazhokolokele jitanda . . . , kabiji pa kwibabala bajinga mabumba a mabumba ne biumbi bya biumbi.”—Lumwekesho 5:11.
Ñanyi mingilo yaingilanga bamalaika mu moba a kala?
BYAMBA BAIBOLO
Lesa waingijishe bamalaika kwikala baluwe banji. * Kabiji Baibolo umwesha kuba’mba bamalaika baingijile mingilo ya Lesa ya kukumya. Lesa watumine malaika kuya na kupeesha Abalahama ne kumukanya kulambula mwananji aye Izaka. (Ntendekelo 22:11-18) Malaika wamwekele kwi Mosesa mukachi ka kipupu kyapilenga kuba’mba atwale byambo byo bamukambizhe. (Kulupuka 3:1, 2) Ngauzhi Danyela byo bamutayile mu jiyengo ja mabokwe, ‘Lesa watumine malaika wanji ne kushinka tunwa twa mabokwe.’—Danyela 6:22.
“Kepo malaika wa Yehoba amwekele kwi [Mosesa] mu lubebe lwa mujilo mukachi ka kipupu kya miba.”—Kulupuka 3:2.
Ñanyi mwingilo ubena kwingila bamalaika lelo jino?
BYAMBA BAIBOLO
Kechi twakonsha kuyuka mingilo yonse ibena kwingila bamalaika lelo jino ne. Nangwa byonkabyo, Baibolo wamba’mba bamalaika babena kwingilako mwingilo wa kukwasha bantu baji na michima ya kishinka kuyuka Lesa.—Byubilo 8:26-35; 10:1-22; Lumwekesho 14:6, 7.
Yehoba wamwesheshe Yakoba kimwesho mo amwene bamalaika baikijilenga ne kukanjila pa “kya kukanjijilapo” kyajinga pakachi ka mwiulu ne ntanda. (Ntendekelo 28:10-12) Kwesakana na byo amwene mu kimwesho, Yakoba washiinwe’mba Yehoba Lesa utuma bamalaika pano pa ntanda na kwingila mingilo ya kukwasha bantu bakishinka bakeba bukwasho bwanji.—Ntendekelo 24:40; Kulupuka 14:19; Salamo 34:7.
‘Wamwene kya kukanjijilapo kyo baimikile pano pa ntanda kyafikile mwiulu; kabiji bamalaika ba Lesa baikijilenga ne kukanjijila ponka.’—Ntendekelo 28:12.
^ jifu. 6 Baibolo wamba’mba bamalaika bamo basatukijile Lesa, kabiji bamalaika batama batelwa’mba “bandemona.”—Luka 10:17-20.
^ jifu. 11 Kabiji byambo bya Kihebelu ne Kingiliki byo baingijisha mu Baibolo bya kuba’mba “malaika,” byonse bilumbulula “muluwe.”
