Bumi Bwawama
Nangwa kya kuba Baibolo kechi buku waamba pa bya michi ne, bino mafunde ajimo etukwasha kwikala na butuntulu bwa mubiji bwawama. Akimonai mafunde amo a mu Baibolo akonsha kwimukwasha kwikala na bumi bwawama.
LAMAINGA BULONGO MIBIJI YENU
JIFUNDE JA MU BAIBOLO: “Kafwako muntu nangwa umo ushikwa mubiji wanji ne, bino umujiisha ne kumulama bulongo.”—Efisesa 5:29.
BYO KILUMBULULA: Jino jifunde ja mu Baibolo jitutundaika kuba bintu bilengela bumi bwetu kwikala bulongo. Sawakya umo waamba’mba bikola byavula biya na mambo a kubula kulama bulongo mibiji yetu. Onkao mambo, byo tuba mu bwikalo byakonsha kwitulengela kwikala na bumi bwawama nangwa ne.
BYO MWAKONSHA KUBA:
-
Jainga Kajo Kafwainwa. Kuja kajo kafwainwa ne kutoma mema avula kukemukwasha kwikala na butuntulu bwa mubiji bwawama.
-
Koseshainga Mubiji. Kukosesha mubiji kulengela bumi kwikala bingi bulongo nangwa kya kuba mwakoma mu myaka, mwalemana nangwa muji na kikola kibula kupwa. Nangwa kya kuba bakonsha kwimukwasha ku balunda nenu, balongo benu ne badokotala kwikala na butuntulu bwa mubiji bwawama, bino ne anweba bene mwafwainwa kwibikako.
-
Laalainga Kimye Kyabaya. Bantu babula kulaala kimye kyabaya bakonsha kukolwa. Bamo kimye kya kulaala kyo kimye kyo boba bintu bikwabo, kuba bino kwibalengela kubula kulaala kimye kyabaya. Inge ke mulaale kimye kyabaya bumi bwenu bukawama bingi.
CHINUZHUKAINGA BINTU BYATAMA
JIFUNDE JA MU BAIBOLO: “Twayai twitokeshe ku bubipisho bonse bwa mubiji ne bwa mupashi.”—2 Kolinda 7:1.
BYO KILUMBULULA: Pa kuba’mba twikale na bumi bwawama, twafwainwa kuchinuzhuka bintu byatama nabiji kupepa fwanka ne bintutu bikwabo bileta bikola ne lufu.
BYO MWAKONSHA KUBA: Ibikilai juba jo mwafwainwa kuleka kupepa fwanka ne kushabula jojo juba pa kalenda. Juba ja kuleka saka jikyangye kufika, tayai byonse byo mwingijisha pa kupepa fwanka. Kechi mwafwainwa kutanwanga pa mapunzha pataanwa bantu bapepa fwanka ne. Bulaiko balunda nenu ne balongo benu bakonsha kwimukwasha kuleka kino kyubilo.
MAFUNDE AKWABO A MU BAIBOLO
Lombai Baibolo ku Bakamonyi ba kwa Yehoba bekala ku mpunzha ko mwikala
IZHIKIJILAINGA KU MAPUSO.
“Umvwe washimika nzubo ya katataka, wafwainwa kuzhokoloshako ka lupango peulu ya musemi, pa kuba’mba ukabule kwikala na mambo a mashi umvwe muntu wapona kufuma peulu.”—MPITULUKILO YA MU MIZHILO 22:8.
KANGE MUZHINGILENGA BUKIJI NE.
“Awa ubanda kuzhingila ye wa milangwe, pakuba wabula kutekanya umwesha kukosama kwanji.”—BYAMBO BYA MAANA 14:29.
KANGE MUKIZHEMO KUJA NE.
“Kange wikale pa boba . . . [bakizhamo kuja] ne.”—BYAMBO BYA MAANA 23:20.
Mwakonsha Kutemwa
LABAINGA!
Bya Kuba pa Kuwamishako Butuntulu bwa Mubiji
Bintu bitanu byo mwakonsha kuba lelo jino byakonsha kwimukwasha kwikala na butuntulu bwa mubiji bwawama.
LABAINGA!
Byakonsha Kwimuletela Lusekelo—Kwikala na Butuntulu bwa Mubiji Bwawama
Nanchi kechi twakonsha kwikala na lusekelo nenyi?
