JIFUNDE JA MU BAIBOLO: “Bintu bifuukula muntu wingila na ngovu bikalumbuluka, pakuba bonse boba bintu na kanswatu bakayanda.”—Byambo bya Maana 21:5.

BYO KILUMBULULA: Mwafwainwa kunembelanga jimo mutanchi wa bintu byo mukeba kupota ne kumulondela. Saka mukyangye kuya na kupota bintu, nembelai jimo bibena kukebewa. Vulukai kuba’mba kechi mwakonsha kupota byonse byo mukeba ne. Onkao mambo, ingijishainga bulongo mali enu ne kupotatu bintu bibena kukebewa.

BYO MWAKONSHA KUBA:

• Londelai mutanchi wa bintu byo mukeba kupota. Nembai bintu byonse bibena kukebewa pa kyokyo kimye ne kwibitanchika monka mo byalondankena, nabiji kajo, kusonkela nzubo, ne kupota bivwalo. Kepo mwafwainwa kwabanya mali o muji nao kwesakana na bintu byo mubena kupota. Inge mwataana kuba’mba mali o mwanengezhezhe kupota kintu kimo akepa, mwakonsha kwingijisha mali o mwakebelenga kupota kintu kyabula kunema. Twambe’mba mwataana kuba’mba mali o mwanengezhezhe kupotamo kajo akepa, mwakonsha kutolapo mali o mwanengezhezhe kupota nkoloko ne kwiengijisha kupotamo kajo.

• Chinuzhukainga kwikala na nkongole. Mwafwainwatu kukongola mali inge muji na lukatazho lukatampe. Inge paji kyo mukeba kupota, kyawama kulamangapo mali pa ñondo pa ñondo kuba’mba mukapote kyokyo kintu. Mu byalo bimo, bantu bengijisha kakikachi ka ku banki pa kupota bintu pa nkongole, apa bino banki wachibako ku mali abo inge bafola. Inge ne anweba mwingijisha tuno tubikachi, mwafwainwa kubwezha nkongole ku mpelo ya ñondo pa kuba’mba babulenga kwimuchibamo mali avula na mambo a kubanda kubwezha nkongole. Inge muji na nkongole yabaya, isambai na mwina oo mali ne kutendeka kupanako pachepache kufikatu ne byo mukapwisha nkongole.

   Bashayuka bataana kuba’mba, bantu batemwa kupota bintu pa nkongole kwingijisha tubikachi bekala na nkongole yavula kukila boba babula kwingijisha tubikachi. Onkao mambo, inge muji na kakikachi, mwafwainwa kwikengijishanga bulongo.

JIFUNDE JA MU BAIBOLO: “Nkope kechi ujima mu kimye kya mayoo ne, onkao mambo, mu kimye kya kunowa ulombatu kajo, mambo kechi wikalapo na kintu ne.”—Byambo bya Maana 20:4.

BYO KILUMBULULA: Bukope buleta buyanji. Onkao mambo, ingilainga na ngovu ne kwingijishanga bulongo mali pa kuba’mba mukekale na akwingijisha kulutwe na lwendo.

BYO MWAKONSHA KUBA:

• Ingilainga na ngovu. Ingijishainga bulongo mali enu kabiji inge ke mwingile na ngovu pa nkito bakulumpe ba mingilo bakemutemwa bingi ne kwimuketekela.

• Ikalai ba kishinka. Kechi mwafwainwa kwibila kampanyi ne. Kubuula kwikala ba kishinka konauna jizhina jenu kabiji kyakonsha kwimukatazha bingi kutwela nkito kulutwe na lwendo.

• Kange mwikale na lunkumbwa ne. Inge mwakizhamo kutemwa mali kikemulengela kubuula kwikala na butuntulu bwa mubiji bwawama ne kutamisha bulunda bwetu na bakwetu. Yukai kuba’mba mali kechi o onkatu akebewa mu bwikalo ne.

KANGE MUTAYENGA KIMYE KYENU NE MALI KU BINTU BYABULA KUNEMA NE.

“Kitomi ne kiji bakayanda, kabiji kukunuka kukalengela muntu kuvwala misakila.”—BYAMBO BYA MAANA 23:21.

KANGE MUBAMBISHENGA MUCHIMA PA MALI NE.

“Kilekai kubambisha michima pa bumi bwenu na byo mukaja nangwa na byo mukatoma nangwa na byo mukavwala.”—MATEO 6:25.

CHINUZHUKAINGA KWIKALA NA LWISO.

“Muntu wa lwiso ukebesha bunonshi, bino kechi wayuka’mba buyanji bukamufikila ne.”—BYAMBO BYA MAANA 28:22.