Kwikala Balunda na Lesa
Byonka byo twaji kumona mu mutwe mutanshi, bantu bavula baitabila kuba’mba Baibolo ke buku wa Lesa. Bataana kuba’mba kulondela mafunde a mu Baibolo kwibakwasha kufwenya kwipi ne Lesa ne kwikala bwikalo bwa lusekelo.
Baibolo utela bantu baji na bulunda bwakosa ne Lesa amba bantu ba bumupashi. (Yuda 18, 19) Bantu baji na bulunda bwakosa ne Lesa banemeka bingi mafunde anji, pakuba bantu babula bumupashi kechi bakamwa Lesa ne, kabiji bobatu bintu kwesakana na bisakasaka michima yabo.—Efisesa 5:1.
LUKETEKELO
JIFUNDE JA MU BAIBOLO: “Inge walefulwa mu juba ja bya malwa, ngovu yobe ikakepa.”—Byambo bya Maana 24:10.
BYO KILUMBULULA: Inge twalefulwa, bulume bwetu bwakonsha kupwa kya kuba twakankalwa ne kuchinchika makatazho o tuji nao. Bino luketekelo lwitupa bulume bwa kutwajijila kuchinchika makatazho. Inge tuji na luketekelo, tukavulukanga kuba’mba makatazho etu ke a pa kimye kichechetu, kabiji kimo kimye mwakonsha ne kufuma bintu byawama.
BYO MWAKONSHA KUBA: Langulukainga pa bintu byawama biji kulutwe. Kange mwakamwenga pa bintu byakonsha kumweka kulutwe na lwendo ne, pakuba tai muchima pa bikonkwanyi byenu ne kwingijilapo. Ibyo kuba’mba “bintu bya kubula kuketekela” bibamwekela bantu bonse. (Musapwishi 9:11) Pano bino, javula bintu byo twakamwa bingi amba kampe bikamweka kulutwe kechi bimweka ne. Onkao mambo, Baibolo waingijisha kishimpi kya njimi pa kufunjisha kino kishinka kyawama kya kuba’mba: “Byalai nkunwa yenu lukelo kabiji mabanga kange mwikaletu ne; mambo kechi mwayuka ikamena ne, kana iye nyi, kana yoya, nangwa kana yonse ikamena.”—Musapwishi 11:6.
MIKUMBU KU MEPUZHO ANEMA A MU BWIKALO
JIFUNDE JA MU BAIBOLO: “Mpai milangwe . . . Byambo byenu bo bukine.”—Salamo 119:144, 160.
BYO KILUMBULULA: Baibolo ukumbula mepuzho onse akonsha kwipuzha bantu. Mepuzho amo akumbulwa mu Baibolo ke ano:
-
Nanchi atweba bantu twafumine pi?
-
Mambo ka o twaikelako?
-
Ñanyi kintu kimweka inge muntu wafwa?
-
Nanchi buno bo bwikalo bujikotu nyi?
Bantu bavula mwaya ntanda baji na lusekelo na mambo a kuyuka mikumbu ya ano mepuzho ne akwabotu.
BYO MWAKONSHA KUBA: Tangai pa kuba’mba muyuke Baibolo byo afunjisha. Ipuzhai Bakamonyi ba kwa Yehoba pa kuba’mba bemukwashe kuyuka bifunjisha Baibolo. Yai pa keyala wetu wa jw.org/kqn nangwa yai na kupwila ku Nzubo ya Bufumu iji kwipi na ko mwikala. Kechi mukapana mali pa kutwela ne.
MAFUNDE AKWABO A MU BAIBOLO
Tambai vidyo wa kuba’mba Mambo ka a Kufunjila Baibolo? Uno vidyo uji pa keyala wetu wa jw.org/kqn mu milaka kukila pa 880
IKALAI NA MUCHIMA WA KUKEBA KUYUKA LESA.
“Bo ba lusekelo aba baji na muchima wa kukeba kuyuka Lesa.”—MATEO 5:3.
TANGAI BAIBOLO PA KUBA’MBA MUYUKILEPO BYAVULA PE LESA.
‘Mukebai Lesa ne kumutaana mambo kechi uji kwalepa ne atweba bonse ne.’—BYUBILO 17:27.
TANGAINGA NE KULANGULUKAPO PA BYANEMBWA MU BAIBOLO.
“Aye usekela monka mu mizhilo ya Yehoba, * kabiji utanga mizhilo yanji ne kulanguluka langulukapo mute ne bufuku. . . . Ne bintu byonse byo oba bikalumbuluka.”—SALAMO 1:2, 3.
^ jifu. 23 Baibolo ufunjisha kuba’mba Yehoba jo jizhina na Lesa.
Mwakonsha Kutemwa
KYAMBA KYA USOPA
Baibolo Wakonsha Kunkwasha Byepi mu Bwikalo Bwami?
Mu Baibolo muji mafunde awama bingi.
