JIFUNDE JA MU BAIBOLO: “Awa ubanda kuzhingila wawama kukila kitonzhi.”—Byambo bya Maana 16:32.

BYO KILUMBULULA: Tumwenamo bingi inge ke tubule kuzhingila bukiji. Nangwa kya kuba kimye kimo twakonsha kuzhingila, bino bantu boba bintu saka bazhingila belangulusha kulutwe na lwendo. Basayansi bataana kuba’mba, bantu inge bazhingila kechi balanguluka bulongo ne, kabiji javula bamba nangwa kuba bintu byo belangulusha kulutwe na lwendo.

BYO MWAKONSHA KUBA: Mwafwainwa kuyuka bya kufwomona bukaji saka bukyangye kwimulengela kuba bintu byatama. Bantu bamo balanguluka’mba bantu baji na bukaji baji bingi na bulume. Bino twafwainwa kuyuka’mba kuzhingila kechi kumwesha’mba muntu uji na bulume ne. Baibolo waamba’mba: “Byonkatu biji muzhi ye bakundula, uji na nsakwa yo baonauna, byo biji ne muntu uzhingila bukiji.” (Byambo bya Maana 25:28) Jishinda jimo jawama jo mwakonsha kufwomwenamo bukaji ke kuyuka kine kintu kyalengela amba muntu obe bintu byo auba, saka mukyangye kwamba nangwa kubapo kimo. Baibolo waamba’mba: “Maana a muntu afwomona bukaji bwanji.” (Byambo bya Maana 19:11) Kyanema bingi kuyuka bishinka byonse, kuba bino kwitulengela kwikala na milanguluko yawama.

JIFUNDE JA MU BAIBOLO: “Saka musanta.” —Kolose 3:15.

BYO KILUMBULULA: Bantu basanta baji bingi na lusekelo. Nangwatu bantu bapitapo kala mu makatazho akatampe nabo baswa kuba’mba bino  byambo bya kine. Bamba kuba’mba kintu kibakwashishe kwikala na milanguluko yawama ke kutwajijila kusanta pa bintu byo bashajile nabyo, ne kubula kuta muchima pa bintu byaonaikile.

BYO MWAKONSHA KUBA: Pa juba pa juba, mwafwainwa kulangulukanga pa bintu byo muji nabyo ne kusantanga. Kuba bino kechi kulumbulula amba kanatu muntu waikala na bintu byavula ne. Langulukainga ne pa bintu bicheche byakonsha kwimuletela lusekelo, nabiji kumona juba byo jibena kusama, kwisamba na balongo ne balunda nenu nangwa kulangulukatu pa bumi bo muji nabo pa jojo juba. Inge ke mulanguluke pa bino bintu, bikemulengela kwikala na lusekelo ne kwikala na milanguluko yawama. Kuba bino kukemulengela kwikala na muchima wa kusanta.

Kintu kikwabo kyakonsha kwimukwasha ke kulanguluka pa bintu byawama bimubila balongo ne balunda. Mwafwainwa kwibasanchilanga pa bintu byawama byo bemubila. Mwakonsha kuba bino kupichila mu kwibabuula pa kanwa, kwibanembela nkalata nangwa kwibatumina tubyambo twa pa Intaneti nangwa twa pa foni. Kuba bino kukalengela bulunda bwenu kukosa mambo mukekala na lusekelo lufuma mu kupana.—Byubilo 20:35.

LUTOBO SAKA LUKYANGYE KUTENDEKA MWAFWAINWA KUFUMAPO.

“Kutendeka lutobo kuji nobe kupoomona kaombe ka mema; lutobo saka lukyangye kutendeka, fumapo.”—BYAMBO BYA MAANA 17:14.

KECHI MWAFWAINWA KUKIZHAMO KUBAMBISHA MUCHIMA PA BWIKALO BWA KULUTWE NE.

“Byonkabyo, kange mubambishenga michima na mambo a juba ja kesha ne, mambo juba ja kesha jikekala na bijikila byajo. Juba jonse jiji na makatazho ajo.”—MATEO 6:34.

LANGULUKAINGA PA BINTU SAKA MUKYANGYE KWIBYUBA.

“Maana a kupima bintu akakulamanga, ne milangwe ikakuzhikijilanga.”—BYAMBO BYA MAANA 2:11.