Kafulumende Ukafumyapo Misalululo Myaka ne Myaka
Mafunde aji mu mutwe wafumako akwasha bantu bavula kushinda misalululo. Nangwa byonkabyo, kechi kyapeela kufumya misalululo mu muchima ne. Nanchi misalululo ikatwajijilatu nyi?
Kafulumende Ukapwisha Misalululo
Makafulumende akankalwa kufumyapo misalululo. Nanchi kino kibena kulumbulula’mba kafwako kafulumende wafwainwa kufumyapo misalululo nyi?
Pa kuba’mba kafulumende afumyepo misalululo wafwainwa
-
1. Kwalula milanguluko ya bantu byo bomvwa ne byo balanguluka pa bantu bakwabo.
-
2. Kufumya milanguluko ilengela bantu kumona bakwabo kutama.
-
3. Kunengezha bakalama babula misalululo.
-
4. Kulengela bantu bonse pano pa ntanda kukwatankana.
Baibolo witubuula kuba’mba Lesa wanengezha kafulumende ukafumyapo misalululo. Uno kafulumende utelwa’mba “Bufumu bwa Lesa.”—Luka 4:43.
Akimonai uno kafulumende byo akoba.
1. Kufunjisha Bantu Bintu Byaoloka
“Bantu ba mu kyalo ba [kafunda] kuba byaoloka.”—ISAYA 26:9.
“Bololoke bukaleta mutende, kabiji bololoke bukalengela kwikala ku matwi nzoo ne kuzhikijilwa.”—ISAYA 32:17.
Kino kinembelo kibena kulumbulula ka? Bufumu bwa Lesa bukafunjishanga bantu bintu byaoloka. Inge bantu bayuka kyawama ne kyatama, bakapimpula byo bamona bakwabo. Bonse bakekala na butemwe.
2. Kufumyapo Nshiji Yonse
Lesa “ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne, bintu bya kala byapichijila.”—LUMWEKESHO 21:4.
Kino kinembelo kibena kulumbulula ka? Bufumu bwa Lesa bukafumyapo misongo yonse yaiyako na mambo a nshiji. Bantu bonse bo bayanjishanga kechi bakekala na muchima wa kushinkanya ne.
3. Buntangi Bwawama
“Kechi ukachiba mambo kwesakana na mwekelo ya muntu ne, nangwa kukajipila bantu kwesakana na byo aumvwa ne, ukachibila bayanji mambo monka mo aolokela, kabiji ukazhachisha bantu mu bololoke ne kupokolola bakimote ba pano pa ntanda.”—ISAYA 11:3, 4.
Kino kinembelo kibena kulumbulula ka? Yesu Kilishitu, mfumu wa bufumu bwa Lesa buji mwiulu ukalamanga bulongo bantu pano pa ntanda ponse. Yesu kechi watemwapo kisaka kimo ne kushikwa kisaka kikwabo ne, kabiji bantu bonse bakalondelanga mizhilo yanji.
4. Kukwatanakana
Bufumu bwa Lesa bufunjisha bantu kwikala “na mulanguluko umo ne na butemwe bumo saka [bakwatankana], ne kwikala na mulanguluko umo.”—FILIPAI 2:2.
Kino kinembelo kibena lumbulula ka? Bangikazhi ba mu bufumu bwa Lesa ‘bakakwatankana bingi’ mambo bakekala na butemwe bwa kine.
