Bantu boba misalululo bakwabo na mambo a kuba bafuma ku kyalo kingi, ba mushobo ungi, bamba mulaka ungi, baya mu bupopweshi bungi, banabalume nangwa banabakazhi nangwa baji na bwikalo bwapusana na bwapo. Kabiji bantu bamo boba misalululo bakwabo na mambo a kuba banyike, balemana nangwa na mambo a kuba kechi balamba ne. Bino abo bene kechi bayuka’mba baji na misalululo ne.

Nanchi kyapeela kuyuka’mba tuji na misalululo nyi? Kyapeela bingi kumona misalululo mu bakwetu, bino kyakatazha kuyuka’mba ne atweba tuji na misalululo. Kishinka ke kya kuba’mba atweba bonse kimye kimo tuba misalululo. Ba David Williams baambile’mba, “Umvwe bantu bamba byatama pa mulaka umo, bino pa kupitapo kimye basambakana muntu wamba yewo mulaka, bamunemeka uba nobe kechi baambanga byatama pa mulaka wanji ne.”

Ba Jovica bekala mu kyalo kya Balkan muji ne mulaka wamba bantu bacheche, baambile’mba: “Nalangulukanga’mba bano bantu kechi bawama ne. ‘Kechi nayukile’mba ino yajinga misalululo ne, mambo nalangulukanga’mba kino kyajinga kishinka.’”

Makafulumende avula abikako mizhilo yakanya bantu kuba misalululo. Nangwa byonka byo, bantu batwajijilatu na kuba misalululo. Mambo ka? Mambo ino mizhilo yambatu pa byubilo bya bantu, kechi yakonsha kukwasha muntu kwalula milanguluko yanji nangwa byo amona bantu bakwabo ne. Kabiji misalululo itendekela mu milanguluko ne mu muchima wa muntu. Nanchi misalululo yakonsha kupwa nyi?