Ne luno, kafwako bayuka kilengela bongo kuyuka’mba muntu walamba ne. Baibolo kechi walumbulula kilengela ne, bino waamba’mba, atweba bantu tuji na maana a kuyuka’mba kintu kyamweka bulongo, mambo Lesa witulengele mu kipasha kyanji. (Ntendekelo 1:27; Musapwishi 3:11) Kabiji ye walengele ne mubiji wa muntu mu jishinda jawama bingi. O ene mambo nyimbi wa masalamo o aambijile’mba: “Nkemutotanga mambo nalengelwe mu jishinda ja kukumya.”—Salamo 139:14.

Bino, bantu bavula lelo jino kechi batondwa na byo bamweka ne. Kyalengela ke mafwashonyi o batamba pa TV. Buku wa kuba’mba Body Image waamba’mba, kyatanwa’mba mu byalo bya bazungu byavula, “bantu batatu maana pa kukeba kumweka bulongo, kwa kubula ne kulanguluka pa byubilo byawama.” Bino bano bantu balubako kintu kyanema bingi—kwikala na muchima wawama.—1 Samwela 16:7.

Kununga pa bino, ntanda ibena kutundaika banabakazhi kuvwala bivwalo bilengela bantu kulangulukatu pa kwilaala. Sawakya kufuma ku kipamo kya American Psychological Association (APA) wa mwaka wa 2007 waambile’mba, pa TV, pa Intaneti, mu mabuku, mu magazini, ne mu nyimbo monsetu, “banabakazhi babena kwibengijisha kulengela bantu kulangulukangatu pa kwilaala.” Bino, Baibolo witukambizha kuchinuzhuka bino byubilo.—Kolose 3:5, 6.

“Kwiwamisha kwenu kechi kwikaletu kwa pangye ya mubiji . . .  ne, bino kwikale kwa mu muchima, kyo kivwalo kibula kubola kya muchima wakooka kabiji wazhindama, ye wa buneme kwi Lesa.”—1 Petelo 3:3, 4.

Bamo bamba’mba: “Inge walamba, wafwainwa kumwesha bantu amba walamba.” Sawakya kufuma ku kipamo kya APA waamba’mba mu byalo muji bantu bamba bino, bansongwakazhi batendekelatu ku bwanyike kulanguluka’mba mibiji yabo ke “bingijisho bya kukebwilamo bantu.” Pano bino, ino ndangulukilo yatama. Kabiji kwesakana na kipamo kya APA,  bashayuka batala pa bumi bwa bantu baakamwa’mba ino ndangulukilo ibena kulengela banabakazhi bamo “kwikala bingi na bijikila.” Kibalengela “kubula kutondwa na byo bamweka . . . , kwiikazha na nzala amba banyaneko, kwilengulula, ne kupopomenwa nangwa kwinyengaika.”

“Fumya makatazho mu muchima wobe ne kuzhikijila mubiji wobe ku bintu byatama, mambo moba a bwanyike ne a bunsongwalume o atu.”—Musapwishi 11:10.

Baibolo waamba’mba “kwipelula” kulengela muntu “kwikala na milanguluko yawama.” (1 Timoti 2:9) Langulukai pa kino: Bantu bepelula kechi bakamwa pa bintu byabula kunema, nabiji kukizhamo kwakamwa pa byo bamweka ne. Pakuba, abo bayuka pa kupelela. Kabiji banemeka bakwabo, kino kilengela bantu kwibatemwa bingi ne kwibanemeka, kabiji kyakila pa byonse, Lesa wibobila bibusa. (Mika 6:8) Bantu bepelula bekala na balunda ba kine, kabiji byubilo byabo byawama bibalengela kusongolwa ku muntu wawama muchima, ubula kutatu maana pa buuya bwa muntu, bino ukeba kwikala mu masongola a lusekelo kimye kyonse.

O ene mambo Baibolo o etutundaikila kuta muchima pa byubilo byetu, ko kuba’mba muntu wetu wa “mu muchima.” (1 Petelo 3:3, 4) Buuya bupwa inge muntu keakome, bino byubilo byawama kechi bipwa ne. Pakuba biya na kuwaminako inge muntu keakome. Pa Byambo bya Maana 16:31 paamba’mba: “Mvwi ye munchinya wa buya inge yatanwa mu jishinda ja bololoke.” Onkao mambo, bantu balondela lujimuno lwa mu Baibolo, banyike nangwa bakulumpe, bekala na buuya bwa kine, bubula kupwa kabiji buleta munema ne lusekelo.

“Kumweka bulongo kujimbaika, ne buya bo bwa kakimyetu kacheche, bino mwanamukazhi wakamwa Yehoba bakamutakaika.”—Byambo bya Maana 31:30.