MUTWE WA PA NKUPIKO | MWAKONSHA KWIKALA BYEPI NA BYUBILO BYAWAMA?
2 Chinuzhukainga Bintu Bileta Lweseko
-
Fwanyikizhai’mba mwafuukulapo kuleka kutoma malwa, bino jonse mutanwa paji malwa.
-
Mwafuukulapo kuleka kupeepa fwanka, bino mulunda nenu wimupa fwanka saka ayuka’mba mukeba kuleka.
-
Mwanengezha kuya na kunyema lubilo pa kuba’mba mukosesheko mubiji, pano mwaumvwa bingi mukose kya kuba mwakankalwa ne kukeba kuji masapato a kunyemenamo.
Nanchi mwamona bino bintu byo bipasha nyi? Kyatanwa kuba’mba mapunzha ko tutanwa ne bantu bo tutanwa nabo javula, bakonsha kwitulengela kwikala na byubilo byawama nangwa miteeto yatama.
JIFUNDE JA MU BAIBOLO: “Muntu wajimuka umona bileta malwa kabiji ufyama, pakuba muntu wabula maana uyatu kabiji umona bya malwa.”—Byambo bya Maana 22:3.
Baibolo witutundaika kulangulukapo bulongo pa bintu. Kuba bino kwakonsha kwitukwasha kuchinuzhuka bintu bileta lweseko, ne kuba bintu byakonsha kwitukwasha kulutwe na lwendo. (2 Timoti 2:22) Twafwainwa kuchinuzhukanga bintu byakonsha kwitulengela kwesekwa.
Chinuzhukainga bintu byakonsha kwimulengela kwesekwa, kabiji ubainga bintu byakonsha kwimukwasha kuba byawama
BYO MWAKONSHA KUBA
-
Chinuzhukainga bintu byakonsha kwimulengela kuba byatama. Inge mukeba kuleka kutoma malwa, kechi mwafwainwa kuyanga pa malwa ne. Mambo kino kikemulengela kwikala na kilaka kya kutoma malwa.
-
Ubainga bintu byakonsha kwimukwasha kuba byawama. Twambe’mba kesha mukaya na kunyema lukelo. Ko kuba’mba mwafwainwa kunengezhezha jimo masapato a kunyemenamo ne bya kuvwala. Inge mwauba bino, kikemupelela kuba byo mwafuukula.
-
Salai bulongo balunda nenu. Javula twikala na byubilo bya bantu bo tutanwa nabo jonse. (1 Kolinda 15:33) Onkao mambo, mwafwainwa kuleka kupwanañana na bantu baji na miteeto yatama yo mukeba kuleka. Mwafwainwa kusala balunda bakonsha kwimulengela kwikala na byubilo byawama.
