Bamo bamba’mba papita moba 21 pa kuba’mba muntu afunde kyubilo kyawama ne kupilwa nakyo. Pano bino, bashayuka bataana’mba bantu bamo bafunda miteeto ipya mu moba achechetu, bino bakwabo papita moba avula bingi. Nanchi kino kyafwainwa kwimulefula nyi?

Fwanyikizhai’mba mukeba kwikala na mutanchi wa kunyemanga lubilo moba asatu mu mulungu, pa kuba’mba mukoseshe mubiji.

• Mulungu mutanshi, mwafikizha kikonkwanyi kyenu pa moba onse asatu.

• Mulungu wa bubiji, mwanyemakotu moba abiji.

• Mulungu wa busatu, mwafikizhatu bulongo kikonkwanyi kyenu.

• Mulungu wa buna, mwakankalwapotu nangwa juba jimo.

• Mulungu wa butanu, mwafikizha kikonkwanyi kyenu, kabiji kufumatu popo, mwatwajijila kufikizha kikonkwanyi pa mulungu pa mulungu.

Ko kuba’mba papita milungu itanu pa kuba’mba mufunde muteeto wawama. Kyakonsha kumweka nobe kimye kyalepa bingi, pano bino mukasangalala bingi inge mwafunda kyubilo kyawama.

Baibolo witutundaika kutwajijila kwibikako. Kine kintu kyanema, kechi bimye byo tupona ne, bino ke byo twibikako kubuukapo kimye kyonse.

• Inge mwabwela panyuma, kange mulanguluke’mba kyapwa mwakankalwa ne. Yukai’mba kechi mukafikenatu kufikizha kikonkwanyi kyenu kwa kubula ne kubwelako panyuma ne.

• Tai muchima pa byo muba bulongo. Inge mukeba kwisambanga bulongo na baana benu, ishikishai’mba: ‘Nanchi kujipo kimye kyo nakebelenga kupachila baana bami, pano bino nekainye nyi? Naubile byepi? Nakonsha kwikanya byepi kimye kikwabo?’ Ano mepuzho akonsha kwimukwasha kuta muchima pa byo muba bulongo, kechi pa byo mukankalwa ne.

Nanchi mukeba kuyuka mafunde a mu Baibolo akonsha kwimukwasha mu bintu bikwabo, nabiji bya kuba na bijikila ne bya kwikala na lusekelo mu kisemi nyi? Isambai na Bakamonyi ba kwa Yehoba nangwa yai pa keyala wetu wa jw.org/kqn.