Mwakonsha kukebesha bingi kupimpula bintu byonse mu bwikalo bwenu ponkapotu. Mwakonsha kulanguluka’mba, ‘Uno mulungu nsakuleka kupeepa fwanka ne kutukana, nsakutendeka kulaala bukiji, kukosesha mubiji, kuja kajo kafwainwa ne kwisamba ne bankambo.’ Inge kemukebe kuba bintu byonse byo mukeba kuba pa kimyetu kimo, mukakankalwa kubapotu nangwa kimo.

Muntu wipelula uba kintu kimo pa kimye kimo kwesakana na papelela bulume bwanji, kimye, ne bintu byo aji nabyo. Kechi weseka kupimpula bintu byonse pa kimye kimotu ne. Pakuba, uba bino pachepache.

Ingijilai pa kintu kimo pa kimye kimo. Mashinda alondelapo akonsha kwimukwasha:

1. Nembai mitanchi ibiji, umo wa bintu byawama byo mukeba kubanga, ne mukwabo wa miteeto yatama yo mukeba kuleka. Nembaitu bintu byonse byawama ne byatama byo mukeba kuleka.

2. Tendekelaipo kunemba bintu byanema.

3. Salaipo kintu kimo nangwa bibiji pa mitanchi yonse ibiji ne kwingijilapo. Apa bino mukasalepo bikwabo pa mitanchi yonse ibiji.

Kyakonsha kwimukwasha kuleka bukiji kintu kyatama ke kupingishapo kintu kyawama. Inge pa mutanchi wa byo mukeba kuleka mwanembapo’mba mukeba kuleka kukizhamo kutamba TV, kabiji pa mutanchi wa bintu byawama byo mukeba kubanga mwanembapo’mba musaka kwisambanga na balongo ne balunda nenu. Mwakonsha kufuukulapo’mba: ‘Inge nabwela pa nzubo, saka nkyangye kwambula TV, kintu kitanshi kyo nkobanga ke kutumina balongo bami ne balunda nami foni.’