BYAMBAPO BAIBOLO
Lweseko
Bifuma mu kubula kuchinuzhuka lweseko ke masongola kupwa, kusambula bikola ne kwikala na jiwi ja mu muchima jibena kwituzhachisha. Twakonsha kuchinuzhuka byepi kino kitewa?
Lweseko lo luka?
Twesekwa bingi inge twamona kintu kyo twatemwa. Twakonsha kufwanyikizha bino. Inge mwaya na kupota bya kupota pota, mwakonsha kumonapo kintu kyo mwatemwa bingi, kabiji mwakonsha kutendeka kulanguluka kwiba kino kintu. Bino jiwi jenu ja mu muchima jakonsha kwimukanya. Mwafwainwa kulondela bibena kwimubuula jiwi ja mu muchima ne kwikileka. Inge mwauba bino, ko kuba’mba mwashinda lweseko.
BYAMBA BAIBOLO
Muntu inge waesekwa kechi kilumbulula’mba uno muntu watama ne. Baibolo waamba’mba atweba bantu bonse twesekwa. (1 Kolinda 10:13) Kintu kyanema ke byo tuba inge twaesekwa. Bantu bamo batwajijilatu na kulanguluka pa bintu byatama, kino kibalengela kuba byatama. Bakwabo baleka ponkapotu inge batendeka kulanguluka pa bintu byatama.
“Muntu yense wesekwa kupichila mu kumukoka ne kumujimbaika ku bya kusakasaka byanji mwine.”—Yakoba 1:14.
Mambo ka o kyanemena kuchinuzhuka lweseko ponkapotu?
Baibolo waambapo bintu byakonsha kulengela muntu kuba bintu byatama. Pa Yakoba 1:15 paamba’mba: “Umvwe bya kusakasaka [byatama] byaimita, bisema bundengamambo.” Kino kibena kulumbulula’mba inge twatwajijila na kulanguluka pa bintu byatama, kitulengela kubula kwikala na bulume bwa kwizhikijila ku kintu kyatama. Nangwa byonkabyo, twakonsha kuchinuzhuka milanguluko yatama. Inge twauba bino, tukashinda lweseko.
BAIBOLO BYO YAKONSHA KWIMUKWASHA
Byonkatu bongo byo bwakonsha kulanguluka pa bintu byatama, byo byo bwakonsha ne kukana milanguluko yatama. Mu ñanyi jishinda? Inge ke tulanguluke pa bintu bikwabo, kwisamba na mulunda netu, kwingilako mingilo ikwabo nangwa kulanguluka pa bintu bikwabo byanema. (Filipai 4:8) Kabiji kyanema bingi kulanguluka pa bintu byakonsha kufumamo inge twaponena mu lweseko, nabiji kwituyanjisha mu milanguluko, bikekala butuntulu bwetu bwa mubiji ne byakonsha kwikala bulunda bwetu na Lesa. (Mpitulukilo ya mu Mizhilo 32:29) Kulomba kimye kyonse kwanema bingi. Yesu Kilishitu waambile’mba: ‘Twajijilai na kulomba, pa kuba’mba mubule kuponena mu lweseko.’—Mateo 26:41.
“Kange mujimbaikwe ne: Lesa kechi ukosamikwa ne. Mambo kyonka muntu kyo abyala, kyo kyo akanowa.”—Ngalatiya 6:7.
Mwakonsha kuba byepi pa kuba’mba muchinuzhuke kuponena mu lweseko?
KISHINKA KE KINO
Mwafwainwa kuyuka kuba’mba lweseko luji nobe kitewa kabiji lwakonsha kwimutwala mu kizumba. (Yakoba 1:14, tubyambo twa munshi) Mu kuba bulalelale mufuma bintu byatama bingi.—Byambo bya Maana 7:22, 23.
BAIBOLO BYO YAKONSHA KWIMUKWASHA
Yesu waambile’mba: “Umvwe jiso jobe ja kilujo jibena kukutuntwisha, jilobolemo ne kwijitaya.” (Mateo 5:29) Yesu waingijishe ñambilo ya kifwanyikizho. Walumbulwilenga’mba inge tukeba kutokesha Lesa ku muchima ne kwikala na bumi bwa myaka ne myaka, twafwainwa kwipaya binungwa bya mubiji pa kuba’mba tuchinuzhukenga kuba byatama. (Kolose 3:5) Kino kibena kulumbulula amba twafwainwa kwibikako kuchinuzhuka kuba bintu byatama pa kuba’mba tukaane lweseko. Kalume wa kishinka wa Lesa walombele amba: “Kanyai meso ami kutala ku bintu byatutu.”—Salamo 119:37.
Kyakatazha bingi pa kuba’mba twikaanye kuba byatama mambo “mubiji wakooka.” (Mateo 26:41) O ene mambo o tubila bintu byatama. Pano bino, inge twalapila ne kwibikako kuchinuzhuka kuba byatama, Mulenga wetu aye Yehoba Lesa uketubila “lusa ne kifyele.” (Salamo 103:8) Kino kitutekenesha bingi.
“Anweba Yehoba, inge mwaji mwatalangatu pa bubi, anweba Yehoba, ñanyi wakonsha kubinga?”—Salamo 130:3.