BENA KAZAKHSTAN baikalanga bwikalo bwa kupitamotu. Ne lelo jino, bena Kazakhstan batwala banyama babo kwapusana pusana na kwibajisha kuji munyemvu. Mu kimye kya kisalo, batwala banyama babo na kwibajisha mu mitumba muji kimfutele. Inge kimye kya mashika kyafika, batwala banyama babo ku mapunzha kwatwako kyuya.

Lelo jino, bena Kazakhstan bamo bekala mu mataunyi awama bingi. Nangwa byonkabyo, bisho byabo, kajo ko baja ne bintu byo balenga bimwesha bwikalo bwaikalanga bashakulu babo bwa kuvilauka vilauka. Kabiji bano bantu batemwa bingi kushimikizha bishimi ne kwimba nyimbo pa bijimba byo belengela abo bene.

Tumazubo twa kwenda nato to batela’mba yurt tumwesha bintu bya kishakulu byakonsha kulenga bantu kwingijisha  bilengwa na Lesa. Bakafunga batemwa bingi kulenga tuzubo twa kwenda nato kabiji bena Kazakhstan bekala mu mataunyi batemwa kwitwingijisha bingi pa bimye bya bijiilo. Bakañenda baya na kufwakesha kino kyalo batemwa bingi kwikala mu tuno tuzubo. Mukachi ka tuno tumazubo twa bena Kazakhstan mwawama bingi mambo muji byo basonenamo ne bya kupikula bimwesha busendwe bwa banabakazhi.

Bisemi bya bena Kazakhstan bikala mu mizhi balela bingi bambili. Bambili bebatela mazhina nobe 21 ku bena Kazakhstan kabiji ano mazhina aji na byo alumbulula. Kabiji bengijisha ñambilo yapusana pusana kukila pa 30 pa kulumbulula mwatala musombelo wa mbili. Muntu inge bamupa mbili, ko kuba’mba bamunemeka bingi. Kabiji mu mapunzha amo, bansongwalume batendeka kufunda bya kwenda pa mbili saka bajitu banyike.

Javula bena Kazakhstan inge babena kuja kajo, pafwainwa kwikala nyama kabiji kechi babikamo tubintu tuwamisha manyi ne. Bintobyantobya byatemwa bena Kazakhstan bebitela’mba koumiss kabiji bebilenga kufuma ku mabele a mbili mukazhi. Bamba’mba muji bintu bilengela mubiji kwikala bulongo. Kabiji balenga ne mukaka wachimba wa shubat kufuma ku mabele a ngamela.

Bantu bavula baya na kufwakesha ofweshi wa musampi wa Bakamonyi ba kwa Yehoba uji mu Almaty.