Mu 1985 najingatu na myaka jikumi, kimye baana basukulu bafumine ku Cambodia kyo bafikile pa sukulu mu Columbus, ku Ohio, mu U.S.A. Nsongwalume umo wayukileko Kizungu pacheche ye wanshimikizhanga kwingijisha bipikichala pa kulumbulula bantu byo bebepailenga, kwibakabisha ne byo banyemanga. Najilanga bufuku umvwe kandanguluke pa bano banyike. Nakebanga kwibabulako luketekelo lwa Paladisa ne lwa lusanguko, pano kyakatezhe mambo kechi baumvwanga mulaka ye naambanga ne. Pa kuba’mba nsapwilenga bakwetu pa sukulu pe Yehoba, nafuukwilepo kufunda mulaka wa ki Cambodia nangwa kya kuba nakijingatu mwanyike. Kechi nayukile kino byo kikankwasha kulutwe ne.

Kufunda mulaka wa ki Cambodia kwakatezhe bingi. Nakebelenga kuleka pa bimye bibiji, bino Yehoba wankwashishe kupichila mu bansemi bantundaikile bingi. Bafunjishi ne bakwetu pa sukulu batendekele kuntundaika kufunda bya kukandengela kutwela nkito ya kufola mali avula. Nakebeshe bingi kwikala painiya, onkao mambo, ku sukulu nafuukwilepo kufunda bintu byakukwasha kumonapo nkito mwakwikwashisha pa kwingila bupainiya. Pa kukomboka ku sukulu nayanga mu mwingilo na bapainiya. Kabiji nepaine kufunjisha Kizungu, kuba bino kwandengejile kumona byawama palutwe kacheche.

Byo nafikizhe myaka 16, naumvwine’mba kuji jibumba ja mu mulaka wa ki Cambodia ku Long Beach, ku California, mu U.S.A. Natendekele kuya ku jino jibumba, koko nafunjile ne kutanga ki Cambodia. Natendekele bupainiya byo napwishishetu sukulu. Natwajijile kusapwila bena Cambodia bo twaikalanga nabo nkikalankulo. Byo nafikizhe myaka 18, natendekele kukeba kuvilukila ku Cambodia. Mwakijinga milukuchi, bino bantu bachechetu bo baumvwinepo mambo awama a Bufumu pa bantu 10 milyonyi baikalanga mu Cambodia. Pa kyo kya kimye mu kino kyalo mwajinga kipwilo kimo mwajingatu basapwishi 13. Byo nafikizhe myaka 19, nayile na kufwakasha ku Cambodia kimye kitanshi. Byo papichile myaka ibiji nafuukwilepo kuvilukila ku kino kyalo. Namwenanga mwakujiila mu nkito ya kutuntulula ne kufunjisha Kizungu yo natwelele. Mu kuya kwa kimye nasongwele mwanamukazhi wakebanga kuba byonka byo nakebeshe kuba mu bwikalo bwami. Twakwasha bena Cambodia bavula kwipana kwi Lesa.

Yehoba wampa ‘bisaka muchima wami.’ (Sala. 37:4) Mwingilo wa kulenga baana ba bwanga wawama kukila makito onse engila bantu. Pa myaka 16 yo naikala mu Cambodia, nemwena kino kipwilo mwajingatu bapopweshi ba kwa Yehoba 13 byo kyasemununa bipwilo 12 ne mabumba 4 aji kwalepa a Bakamonyi banji!—Bashimikizha ba Jason Blackwell.