KUFUMA MU BUTALA BWETU

Mashikopo Waikala Myaka 100 Ukosesha Lwitabilo

JIZHAI

“Ba Russell papo bamweka bulongo, kukila ne byo bamweka bene!”—Byo byaambile watambilenga mashikopo wa “Photo-Drama” mu 1914.

UNO MASHIKOPO wakwanya myaka 100 mu uno mwaka kufuma po batendekele kumutambisha. Muji bipikichala bilengela kwitabila byaamba Baibolo, Mambo a Lesa. Pa kyo kya kimye lufunjisho lwa kuba’mba bilengwa bilengeletu bine, myendeleko ne luzhinauko byaonawine lwitabilo lwa bavula. Nangwa byonkabyo, mashikopo wa “Photo-Drama” walengejile bantu bavula kuyuka kuba’mba Yehoba ye Mulenga.

Charles T. Russell watangijilanga Bafunda Baibolo wakebakebanga mashinda akusampanyinyamo bukiji bukine bwa mu Baibolo. Bafunda Baibolo baingijishe mabuku pa myaka kukila pa makumi asatu. Pano balangulukilepo mulanguluko mukwabo wakwingijisha mashikopo.

KUSAMPANYA MAMBO AWAMA KWINGIJISHA MASHIKOPO

Mu ma 1890 bantu mo mo batendekele kutambisha mashikopo mwabula mawi. Mu 1903 mo mo batambishe filimu mutanshi wa bya bupopweshi mu chechi, mu Muzhi wa New York. Kulenga mafilimu popo kwakitendekeletu kimye Russell kyo atendekele kulenga mashikopo wa “Photo-Drama” mu 1912. Wamwene kuba’mba kwingijisha jino jishinda kukasampanya bukiji bukine bwa mu Baibolo ku bantu bavula kukila mabuku.

Mashikopo wa “Photo-Drama” bamutambishanga pa maola atanu na asatu mu bipungu bina. Mwajinga mashimikila 96 epi a mu Baibolo o bashimikizha bulongo ku shimikizhi wayukanyikilwe bingi wajinga na jiwi jawama. Mu bipungu byavula mwajinga nyimbo yawama. Bantu bayuka bulongo bo baimbile ne kwamba byambo byo bakopele ne kwibyesakanya na bipikichala ne na misombelo yakema bulongo. Kabiji mwajinga ne bifwanyikizho bya mashimikila avula ayukanyikwa a mu Baibolo.

“Awe mashikopo waamba pa kimye kyalengelwe tubangabanga shoo kufika ne kimye kya Bukalama bwa Kilishitu bwa Myaka Kiumbi Kimo.”—Ba F. Stuart Barnes, saka baji na myaka 14 mu 1914

Bipikichala byavula biji mu uno mashikopo byafumine ku mazubo a mabilabila. Bashayuka ba ku Philadelphia, ku New York, ku Paris, ne ku London balengele maselechi ne mafilimu aache ache aji mu uno mashikopo. Balongo ba ku musampi bawamishe maselechi alalaikile ne kwiapeta bulongo. Kununga pa mafilimu o bapotele, ba mu kisemi kya Betele nabo balengele bifwanyikizho byo bebakopele saka babena kufwanyikizha Abalahama, Izaka, ne malaika wakainye Abalahama kulambula mwananji.—Nte. 22:9-12.

Balongo baingijile bingi na ngovu pa kubatu’mba batambishe uno mashikopo wa “Photo Drama” wajinga na biñambañamba 26 ne maselechi 500

Mulunda nanji Mulongo Russell wabujile ba ku nzubo ya mabilabila amba, “uno mashikopo usakulengela bantu bavula kuta muchima ku bya mu Binembelo kukila bintu byonse byo baubapo kala mu kutwala palutwe bupopweshi.” Abya bantangi babupopweshi batemwe pa uno mulanguluko wa kulenga mashikopo wakukwasha bavula kuyuka Lesa nyi? Ine, bantangi ba mu Kilishitedomu baambilenga byatama pa uno mashikopo wa “Photo Drama” ne kukeba mashinda a bujimuku akukainyamo kumutambisha ku bantu bavula. Juba jimo jibumba ja bantangi babupopweshi bachibile ntambo ya malaichi kuba’mba bantu babule kutamba uno mashikopo.

Baasha babakazhi bafumine mu bipwilo bya kipi kipi bapele bantu avula bingi mabuku mwajinga bipikichala bya mu mashikopo wa “Photo-Drama”

Bonse batambilenga bebapele ka “Pax,” kamanyikilo pajinga Yesu saka akiji nsongwalume. Kano kamanyikilo kavulwilengamo yense wikavwala kuba’mba “mwana wa mutende”

Nangwa byonkabyo bantu bavula bingi bayanga na kutamba mashikopo wa “Photo-Drama” kyatu. Pa juba pa juba mu kyalo kya United States mu mizhi 80 batambanga mashikopo ya “Photo-Drama.” Bantu bavula beitemenwe bingi mambo kyo kyajinga kimye kitanshi kutambapo mashikopo muji bantu babena kwamba. Bantu bateleko bingi muchima mambo uno mashikopo wamwesheshe bintu byo bakyangye kumonapo kala. Sayansi yalengejile kutumbijika maana a Yehoba pa kyo kya kimye. Byonka byo twaji kwamba kwatendekela kino kibaba, pa kumona Mulongo Russell byo ambilenga byambo bya kuntendekelo ya uno mashikopo wa “Photo-Drama,” umo watambilenga waambile’mba: “Ba Russell papo bamweka bulongo, kukila ne byo bamweka bene!”

MASHIKOPO WAFUNJISHE BANTU BAVULA BYA MU BAIBOLO

Mashikopo wa “Photo-Drama” bamutambishe kimye kitanshi pa 11 January, mu 1914 mu ino nzubo ya kukayilamo yajinga ya ba International Bible Students Association mu Muzhi wa New York.

Nembi kabiji Shayuka wa bya mafilimu aye Tim Dirks walumbulwile mashikopo wa “Photo-Drama” amba, “ye mashikopo mutanshi mwajinga mawi a bantu o bakopele ne bipikichala bya bantu bamwekelenga nobe bo babena kwamba, yo itanshi mashikopo mwajinga bipikichala byaendelenga byajinga na misombelo yakema.” Mamashikopo ajingako, mashikopo wa “Photo-Drama” saka akyangye kulengwa namo baingijishanga ano onka mashinda, pano bino kechi baingijishanga ano mashinda onse mu filimu umo byonka byajinga uno mashikopo waimenejile pa kishina kya Baibolo ne. Kabiji kafwako mashikopo ye batambile ku bantu bavula nobe uno ne. Bantu batambile uno mashikopo mu mwakatu umo mu North America, mu Europe, mu Australia, ne mu New Zealand bajinga 9 milyonyi.

Mashikopo wa “Photo-Drama” bamutambishe kimye kitanshi pa 11 January, mu 1914 mu Muzhi wa New York. Byo papichiletu bañondo batanu na babiji, Nkondo Itanshi ya Ntanda Yonse yatendekele. Nangwa byonkabyo, bantu mwaya ntanda yonse batwajijile kupwila pamo na kutamba uno mashikopo kabiji bintu byawama bikoba Bufumu byo batambanga muno mashikopo bibatekeneshanga bingi. Uno mashikopo ye yenkatu bantu yebatemenwe bingi kutamba mu mwaka wa 1914.