1. Kulengwa mu kipasha kya Lesa kwitulengela kwikala na bulume bwa kuba ka?

BANTU bavula bamba’mba, “Awe mwana wasendatu bashanji.” Kya kine, baana bavula bapasha bansemi babo. Bekala na byubilo bijipo na bashabo ne bainabo mambo mashi amo. Yehoba, Shetu wa mwiulu, yo “nsulo ya bumi.” (Sala. 36:9) Atweba bantu bonse, byo tuji baana banji, twamupasha mu bintu bimo. Tuji na bulume bwa kulanguluka, bwa kufuukula bintu ne bwa kulama bulunda na bakwetu mambo twalengwa mu kipasha kyanji.—Nte. 1:26.

2. Yehoba wakonsha kwikala byepi Mulunda netu?

² Yehoba wakonsha kwikala Mulunda netu wa kine kine. Mambo aye witutemwa bingi, onkao mambo, twakonsha kwikala balunda nanji inge twaikala na lwitabilo mwi aye ne mu Mwananji. Yesu waambile’mba: “Mambo Lesa byo ebatemwishe ba pano pa ntanda wapaine Mwananji yenkawa umotu, kuba amba bonse bamwitabila kechi bakonaike ne, poso bakekale na bumi bwa myaka.” (Yoa. 3:16) Kuji bantu bavula bajinga na bulunda bwakosa bingi ne Yehoba. Pano tusakwisambekotu pa bantu babiji.

3, 4. Bulunda bwa kwa Abalahama ne Yehoba bwapusene byepi na bwajinga na bena Isalela ne Lesa?

³ Yehoba watelele mushakulu wa bena Isalela amba, “Abalahama mulunda nami.” (Isa. 41:8) Kinembelo kya 2 Byambo bya Moba 20:7 nakyo kyaamba’mba Abalahama wajinga mulunda ne Lesa.  Ki ka kyalengejile uno mwanamulume wakishinka kwikala mulunda na Mulenga wanji? Mambo Abalahama wajinga na lwitabilo.—Nte.15:6; tangai Yakoba 2:21-23.

⁴ Ba mu kikota kya kwa Abalahama bo baikele mukoka wa bena Isalela. Patanshitu Yehoba wajinga Shabo kabiji Mulunda nabo. Kyataminekotu baonawine bulunda bwabo ne Lesa. Mambo ka? Mambo bakankelwe kwikala na lwitabilo mu milaye ya Yehoba.

5, 6. (a) Yehoba waikele byepi Mulunda nenu? (b) Ñanyi mepuzho anema o twafwainwa kwiipuzha?

⁵ Lwitabilo ne butemwe bo twatemwa Lesa bubailako kupichila mu kufunda byavula pe Yehoba. Akivulukai pa kimye kyo mwayukile kuba’mba Lesa kine koaji, kabiji ne kuba’mba mwakonsha kwikala balunda nanji. Kabiji mwafunjile ne kuba’mba atweba bonse twasemwa na bundengamambo, na mambo a bunsatuki bwa kwa Adama. Kepo mwaumvwishishe kuba’mba bantu bapatuka kwi Lesa. (Kolo. 1:21) Mwaishile ne kuyuka kuba’mba Shetu wa mwiulu witutemwa kabiji kechi uji kwalepa ne atweba ne. Byo twafunjile pa kitapisho kya bukuzhi bwa kwa Yesu ne kwikala na lwitabilo mu kino kitapisho, popo twatendekele kulenga bulunda ne Lesa.

⁶ Inge twalanguluka pa byo twayukile Yehoba, twafwainwa kwiipuzha atweba bene amba: ‘Nanchi mbena kukosesha bulunda bwami ne Lesa nyi? Nanchi luketekelo lwami mwi Mulunda nami Yehoba lubena kukoselako pa juba pa juba nyi?’ Muntu mukwabo wajinga na bulunda bwawama ne Yehoba ke Gidiona. Pano twayai twisambe pe aye pa kuba’mba tufunjileko bintu byanema.

7-9. (a) Ñanyi kintu kyamwekejile Gidiona, kabiji wamwenejilemo ka? (Monai kipikichala kitanshi.) (b) Twakonsha kwikala byepi balunda ne Yehoba?

⁷ Mutonyi Gidiona waingijile Yehoba mu kimye kyakatazhe bingi mu bwikalo bwa bena Isalela panyuma ya kutwela mu Ntanda ya Mulaye. Mu buku wa Mitonyi mu kitango 6 muji jishimikila jaamba pa kimye malaika wa Yehoba kyo aishile kwi Gidiona ku Ofula. Pa kyo kya kimye bena Mijanyi bakebelenga kulukuka bena Isalela. Kyo kyalengejile Gidiona kupujila wichi mu kyakufiinamo binyu kuba’mba kimupelele kufya wichi, mu kifulo ya kuya na kupujila ku kipujilo. Wakuminye bingi malaika byo aishile ne kumwambila’mba wi “kiyangala mwine.” Kepo Gidiona amwipwizhe kuba’mba Yehoba wafumishe bena Isalela mu Ijipita kana usakwibakwasha nyi? Uno malaika waimenejilengako Mulenga wamukoseshe Gidiona kuba’mba Yehoba kya kine usakumukwasha.

⁸ Gidiona waipwizhe kuba’mba kana usakukonsha kupokolola “bena Isalela mu maboko a bena Mijanyi” nyi? Yehoba wamukumbwile’mba: “Nkekala nobe, kabiji ukebatapa bena Mijanyi bonse nobe muntu umotu.” (Mito. 6:11-16) Bino wakizhinaukilenga kino byo kikobiwa, kepo Gidiona akebele kuba’mba amumweshe kiyukilo. Mu uno mwisambo Gidiona kechi wazhinaukilepo Yehoba kuba’mba ufwako ne.

⁹ Byamwekele byakoseshe lwitabilo lwa kwa Gidiona ne kumulengela kufwenya kwipi ne Yehoba. Gidiona wanengezhezhe kajo ne kupa malaika. Bya kuja bebisokele ku mujilo malaika byo akinkilepo kamama. Gidiona popo ashiinwe kuba’mba awa malaika kine bamutumine kwi Yehoba. Gidiona waumvwine moyo ne kwamba’mba: “Mama, anweba Nkambo Mfumu Yehoba, namona malaika wenu kilungi na kilungi, anweba Yehoba!” (Mito. 6:17-22) Kino nanchi kyatamishe bulunda bwa kwa Gidiona ne Lesa nyi? Ine! Gidiona waikele mu mutende na Lesa. Twayuka bino mambo kyakusokelapo bitapisho kyo ashimikile wikitumbile jizhina ja mu Kihebelu amba, “Yehoba-shalomu.” Jilumbulula’mba, “Yehoba ye Mutende.” (Mito. 6:23, 24, NW) Inge twalanguluka pa byonse bitubila  Yehoba, popo tumona kuba’mba Mulunda netu wa kine. Kulomba kimye kyonse kwi Lesa kwitulengela kwikala na mutende wa mu muchima kabiji bulunda bwetu ne aye bukosa bingi.

10. Kwesakana na byaamba Salamo 15:3, 5, ñanyi bintu byo twafwainwa kuba pa kuba’mba twikale balunda ne Yehoba?

¹⁰ Kuji bintu bimo byo twafwainwa kuba pa kuba’mba Yehoba ekale Mulunda netu. Mu Salamo 15, nyimbi wa masalamo watongwele bintu byo twafwainwa kuba pa kuba’mba, ‘twikale benyi mu tente wa Yehoba,’ ko kuba’mba kwikala mulunda ne Lesa. (Sala. 15:1) Pa bino bikebewa twayai twisambekotu pa bibiji—kubula kubabañana ne kwikala bakishinka mu bintu byonse. Nyimbi wa masalamo waambile bintu byafwainwa kubula kuba yense ukeba kwikala mulunda ne Yehoba amba: “Ubula kubabañana na lujimi wanji . . . Nangwa kutambula mfweto ya kumufwisha nao wabula mambo ne.”—Sala. 15:3, 5.

11. Mambo ka o twafwainwa kuchinuzhukila luntepentepe?

¹¹ Mu salamo mukwabo, Davida witujimunako amba: “Ulame lujimi wobe ku bubi.” (Sala. 34:13) Kubula kumvwina luno lujimuno kwitwabanya ne Shetu wa mwiulu waoloka. Kubabañana ke kyubilo kya kwa Satana mulwanyi wa kwa Yehoba. Jizhina ja “Daibola” jafuma ku kyambo kya Kingiliki kilumbulula’mba “waluntepentepe.” Kubula kwamba byatama pa bakwetu kwitulengela kulama bulunda bwetu ne Yehoba. Twafwainwa kuchinuzhukanga kwamba byatama kikatakata pa bakulumpe batongolwa ne Lesa batangijila mu kipwilo.—Tangai Bahebelu 13:17; Yuda 8.

12, 13. (a) Mambo ka o twafwainwa kwikela bakishinka mu bintu byonse? (b) Bukishinka bwetu bukunza byepi bakwetu?

¹² Bantu ba kwa Yehoba bayukanyikwa’mba bakishinka. Mutumwa Paulo wanembele’mba: “Saka mwitulombelako, mambo twaketekela amba tuji na jiwi ja mu muchima jakishinka kabiji tukebesha kwikala bakishinka mu bintu byonse.” (Hebe. 13:18) Kwibikako kwikala “bakishinka mu bintu byonse” kwitulengela kubula kutola kyangwa bakwetu bena Kilishitu. Nabiji inge twibatwezha nkito, twafwainwa kwibengijisha bulongo ne kwibapa mali kwesakana na byo twaumvwañene patanshi. Atweba bena Kilishitu twikala bakishinka ku botwatwezha nkito ne ku bantutu bakwabo. Kabiji inge betutwezha nkito ku mwina Kilishitu mukwetu, kechi twafwainwa kumutola kyangwa ne kukeba kuba’mba etubilenga byawama kukila bakwetu ne.

¹³ Javula tumvwa bantu byo basanchila Bakamonyi ba kwa Yehoba pa bukishinka bwabo. Kya kumwenako mukulumpe umo wa kampanyi ka butungi wamwene kuba’mba Bakamonyi ba kwa Yehoba balama milaye yabo, waambile’mba: “Muba bintu monka mo mwalayañenejile kuba.” (Sala. 15:4) Bukishinka bulengela kutwajijila kwikala balunda ne Lesa. Kabiji butumbijika Shetu wa mwiulu witutemwa bingi.

14, 15. Twakonsha kukwasha byepi bantu kwikala balunda ne Yehoba?

¹⁴ Nangwa kya kuba baitabila kuba’mba Lesa koaji, bantu bavula botutana mu mwingilo wa kusapwila kechi bamumona’mba Mulunda nabo ne. Twakonsha kwibakwasha byepi? Akimonai mikambizho Yesu yo akambizhe baana banji ba bwanga 70 byo ebatumine kuya na kusapwila babiji babiji. Waambile’mba: “Mu nzubo monse mo mukatwela, patanshi ambai amba: ‘Mutende ekale mu ino nzubo.’ Kabiji umvwe mulunda wa mutende mo aji, mutende wenu ukekala pe aye. Bino umvwe kafwamo, ukemubwelela anwe bene.” (Luka 10:5, 6) Twakonsha kulengela bantu bavula kwiya mu bukine inge twakasuluka pa kwisamba nabo. Kuba bino kwakonsha ne kulengela  bantu betukankanya kukepeshako bulwanyi, ne kwibalengela kukatambwila bukine kimye kikwabo.

¹⁵ Inge twatana bantu babanda mu bupopweshi bwa bubela nangwa balondela bisho byakanya binembelo, kechi tuzhingila ne, tutwajijilatu kwikala bamutende. Tutambwila na lusekelo ku kupwila bantu bapelelwa na mambo a makatazho a mu ino ntanda bakeba kufunda byavula pe Lesa ne kutendeka kumupopwela. Mitwe ikala mu Kyamba kya Usopa ya kuba’mba, “Baibolo Upimpula Bwikalo bwa Bantu” mwikala mashimikila a bantu bavula bapimpula bwikalo bwabo.

16. Mu ñanyi jishinda mo twakonsha kwikela balunda kabiji “bamwingilo umo” ne Yehoba?

¹⁶ Bantu bengijila pamo javula bekala balunda na muntu. Bonse bepana kwingijila Yehoba baji na jishuko ja kwikala balunda nanji kabiji “bamwingilo umo” ne aye. (Tangai 1 Kolinda 3:9.) Kwingila mwingilo wa kusapwila ne kulenga baana ba bwanga kwitulengela kuyuka bulongo byubilo bya Shetu wa mwiulu. Tumona mupashi wazhila byo etukwasha kwingila bulongo mwingilo wetu wa kusapwila mambo awama.

17. Kushonkena ne kubuñana kwitulengela byepi kuyuka’mba Yehoba Mulunda netu?

¹⁷ Kwingila kimye kyonse mwingilo wa kusapwila kwitulengela kufwenya kwipi ne Yehoba. Tumona Yehoba byo azhikijila uno mwingilo ku bantu bakeba kumulekesha. Kyamwekeshatu patoka kuba’mba Yehoba witutangijila, kabiji tukumya bingi inge twalanguluka pa byo abena kwitufunjisha pa kupwila ne mu mabuku alumbulula Baibolo. Pa kushonkena ne pa kubuñana twimwena na meso kuba’mba Yehoba wayuka bulongo byonse byo tubena kupitamo ne byo tukeba. Kisemi kimo kyanembele mu nkalata ya kusanta pa mambo a kushonkena kwa nkambi amba: “Mutanchi wa kushonkena witufikile bingi pa muchima. Twamwene kuba’mba Yehoba witutemwa pa muntu pa muntu kabiji ukeba atweba bonse bintu kwitwendela bulongo.” Bamulume ne mukazhi bafumine ku Germany byo bapwishe kukonkana kwa byalo mu kyalo kya Ireland basanchila pa byo bebatambwijile amba: “Twamusanchila Yehoba ne Mfumu Yesu Kilishitu pa kwitukokela mu jibumba ja bantu bakwatankana. Kuno kukwantakana kechi twikwaambatu pa kanwa ne, tubena kwimwena na meso. Kukonkana kwa ku Dublin kuketuvululangamo kimye kyonse jishuko jo tuji najo ja kwingijila Lesa wetu pamo ne anweba.”

18. Twafwainwa kwiipuzha’mba ka pa byo twisamba ne Yehoba?

¹⁸ Kwisamba bulongo kukosesha bingi bulunda. Mu ano moba bantu bavula besamba  kwingijisha mashinda akwisambilamo a pa intaneti ne kwitumina byambo pa mafoni. Kuba bino kwipasha byepi na kwisamba ne Yehoba, Mulunda netu wa kine? Ibyo kuba’mba aye, ‘umvwa milombelo.’ (Sala. 65:2) Pano abya twisamba nanji javula nyi?

19. Ki ka kyakonsha kwitukwasha inge twakankwalwa kulumbulwila Shetu wa mwiulu biji ku muchima wetu?

¹⁹ Bapopweshi ba kwa Yehoba bamo kechi kibapelela kwamba biji ku muchima mu lulombelo ne. Pano bino Yehoba ukeba’mba tumubulenga biji ku michima yetu. (Sala. 119:145; Jila. 3:41) Inge twakankalwa kulumbulula byo tubena kwiumvwa, kuji lunengezho lwitukwasha. Paulo wanembejile bena Kilishitu ba mu Loma amba: “Bimye bimo tukeba kulomba, bino kechi tuyuka kyo twafwainwa kulomba ne. Pa bimye bya uno mutundu nangwa kya kuba kechi twikala na byambo bya kulumbulwilamo bintu biji mu michima yetu ne, tutambwila bukwasho kupichila mu bulume bwa Lesa. Kabiji Lesa ukebakeba mu michima yonse uyuka byaambiwa kupichila mu buno bulume. Mambo bwibalombelako bazhijikwa monka mwayila kyaswa muchima wa Lesa.” (Loma 8:26, 27) Kutanga mabuku a mu Baibolo, nabiji buku wa Yoba, wa Masalamo ne wa Byambo bya Mana kuketukwasha kuyuka bya kulumbulwila Yehoba biji ku muchima wetu.

20, 21. Byanembele Paulo pa Filipai 4:6, 7 bitutekenesha byepi?

²⁰ Inge twaponenwa na bya malwa, twafwainwa kulondela jifunde Paulo jo bamutangijile na mupashi wazhila kunembela bena Filipai ja kuba’mba: “Kange mubambishenga michima yenu na mambo a kintu nangwa kimo ne, bino mu bintu byonse saka mulomba ne milombelo ya misashijilo pamo na kusanta saka musolola kwi Lesa bintu byo mukeba.” Kuno kwisamba mu meso anteka na Mulunda netu wa kine kuketutekenesha bingi. Paulo wanungilepo amba: “Mutende wa Lesa wakila milanguluko ya bantu ukalama michima ne milanguluko yenu kupichila mwi Kilishitu Yesu.” (Fili. 4:6, 7) Kimye kyonse twafwainwa kumweshanga’mba twanemeka uno “mutende wa Lesa” ulama michima ne milanguluko yetu.

²¹ Lulombelo lwitulengela kwikala na bulunda bwakosa ne Yehoba. Onkao mambo, twayai ‘tulombenga kimye kyonse.’ (1 Tesa. 5:17) Twayai tutwajijile kukosesha bulunda bwetu ne Lesa ne kulondela mizhilo yanji yaoloka mu bwikalo bwetu. Kabiji tumonengapo ne kimye kya kulanguluka languluka pa bintu byawama byo tuji nabyo na mambo kwikala na Shetu, Lesa wetu kabiji Mulunda netu wa kine.