1, 2. Twapusana pusana byepi mu nkomeno ne mu mashinda o twafunjilamo bukine?

YEHOBA ye wabikileko lunengezho lwa kisemi. (Efi. 3:14, 15) Nangwatu twi ba mu kisemi kimo twapusana mu byubilo ne mu bintutu bikwabo. Kampe bemukomesha ku bansemi benu kufuma ku bulukeke kufika ne ku bukulumpe. Bamo, baana bakishale bansemi babo bafwile na bikola, mu mapuso, nangwa ku bintutu bikwabo bipayañana. Kabiji bakwabo kechi bakimonapo kala bansemi babo ne.

² Atweba bonse twi ba mu kisemi kimo kya bapopweshi ba kwa Yehoba, bino twafunjile bukine mu mashinda apusana pusana. Kampe bemukomeshe ku bansemi bemufunjishanga mafunde a mu Baibolo kufumatu ku bwanyike. (Mpitu. 6:6, 7) Nangwa byonka byo kiji ku bantu bavula bafunda bukine, kampe ne anweba bemutaine ku bakalume ba kwa Yehoba mu mwingilo wa kusapwila ne kwimufunjisha bukine.—Loma 10:13-15; 1 Timo. 2:3, 4.

3. Mu ñanyi bintu mo twipasha atweba bonse?

³ Nangwa kya kuba twapusana pusana mu bintu bimo nabiji byo twaambapo, bino atweba bantu bonse kuji bintu bimo mo twipasha. Bonse tuyanda na mambo a kubula lukokelo kwa kwa Adama kabiji bonse twaswana bumbulwa kulumbuluka, bundengamambo ne lufu. (Loma 5:12) Nangwa kiji bino, byo tuji bapopweshi banji  bakishinka, twakonsha kwita Yehoba amba “Shetu.” Mu moba a kala, bantu bo basajile kwi Lesa baambile byambo biji pa Isaya 64:8 bya kuba’mba: “Anweba Yehoba, mwi Shetu.” O ene mambo Yesu o atendekejile lulombelo lwanji lwa kumwenako amba: “Tata wetu wa mwiulu, jizhina jenu jizhile.”—Mat. 6:9.

4, 5. Tusakwisamba pa ñanyi bintu bisakubaisha butemwe bo twatemwa Yehoba, Shetu wa mwiulu?

⁴ Shetu wa mwiulu witupa byo tukeba ne kwituzhikijila mambo twita pa jizhina janji na lwitabilo. Nyimbi wa masalamo waambile byaambile Yehoba amba: “Byo abika butemwe bwanji pe amiwa, onkao mambo ne amiwa nkamupokolola: Nkamutwala peulu, mambo aye wayuka jizhina jami.” (Sala. 91:14) Kya kine, Yehoba Lesa upokolola bantu banji ku balwanyi ne kwibazhikijila kuba’mba babule kwibonauna.

⁵ Pa kuba’mba tubaishe butemwe bo twatemwa Shetu wa mwiulu, twayai twisambe pa bino bishinka bisatu byanema bingi: (1) Shetu ye Mpanyi. (2) Yehoba Wituzhikijila. (3) Lesa Mulunda netu wa kine. Byo tusakwisambanga pa bino bishinka, tulangulukenga pa bulunda bwetu ne Lesa, ne kumona byo twakonsha kumunemeka byo aji Shetu. Kabiji tulangulukenga ne pa bintu byawama Yehoba byo obila bonse bafwenya kwipi ne aye.—Yako. 4:8.

6. Ñanyi bupe bwitupa Yehoba bumwesha kuba’mba ye Mpanyi wa “bya bupe byonse byawama”?

⁶ “Mwana wa bwanga Yakoba wanembele’mba: “Bya bupe byonse byawama ne byalumbuluka bifuma mwiulu, saka biya panshi kufuma kwi Shetu wa byeya bya mwiulu, ubula kwaluka byaluka kimvule.” (Yako. 1:17) Bumi ke bupe bwanema bingi bwitupa Yehoba. (Sala. 36:9) Kuba kyaswa muchima wa Lesa mu bwikalo bwetu kwitulengela kwiyowa mapesho anji luno ne kwikala na luketekelo lwa kukekala na bumi bwa myaka ne myaka mu ntanda ipya. (Mana 10:22; 2 Pe. 3:13) Pano kiji byepi bino, byo kiji kuba’mba atweba bonse twaswana bundengamambo, lufu ne bumbulwa kulumbuluka bwa kwa Adama?

7. Yehoba witukwasha byepi kwikala na bulunda bwawama ne aye?

⁷ Kabiji Yehoba ye Mpanyi Mukatampe ne mu mashindatu akwabo. Kya kumwenako, witupokolola na mambo a lusa lwanji lukatampe. Atweba bonse twaswana bumbulwa kulumbuluka bwa shetu mutanshi wa pano pa ntanda. (Loma 3:23) Nangwa byonkabyo, na mambo a butemwe bwanji, Yehoba witunengezhezha jishinda ja kwikelamo na bulunda bwawama ne aye. Mutumwa Yoano wanembele’mba: “Monka muno mo mwamwekela butemwe bwa Lesa kwi atweba,” mambo “Lesa watumine Mwananji yenkawa umotu pano pa ntanda kuba amba tukekale na bumi kupichila mwi aye. Buno butemwe kechi bulumbulula amba atweba yetu twamutemenwe Lesa ne, bino aye ye witutemenwe ne kutuma Mwananji kwikala kitapisho kya kufuta mambo etu kuba amba tupwane ne Lesa.”—1 Yoa. 4:9, 10.

8, 9. Yehoba wamwesheshe byepi bumpanyi bwanji mu moba a kwa Abalahama? (Monai kipikichala kitanshi.)

⁸ Saka kwa kishala myaka 1,900, Yesu sa akyangye kusemwa, bintu byamwekele mu bwikalo bwa kwa Abalahama byamwesheshe Yehoba byo akoba pa kupana bumi bwa myaka ne myaka. Pa Bahebelu 11:17-19 palumbulula kuba’mba: “Lwitabilo lo lwalengejile Abalahama kukeba kulambula Izaka kimye kyo bamwesekele; uno muntu watambwile milaye na lusekelo, wakebele kulambula mwananji yenkawa umotu, nangwa kya kuba kyaambilwe pe aye amba: ‘Awa ukatelwa amba “lukunwa wobe,” ukafuma mwi Izaka.’ Bino walangulukile amba Lesa wakonsha kumusangula ku bafu; bamupele mwananji kufuma mu maboko a lufu kabiji kino kyajinga ke kifwanyikizho.” Byonkatu Abalahama byo aswile kulambula mwananji, Izaka, ne Yehoba naye byo byo apaine mwananji, Yesu Kilishitu pa kupulusha bantu.—Tangai Yoano 3:16, 36.

 ⁹ Izaka wafwainwa waumvwine bingi bulongo byo bamupokolwele ku lufu. Wafwainwa wamusanchijile bingi Lesa pa kupana mulambo, mukooko mulume wipikankenye mu kitoto ne kumupingakenya pe aye. (Nte. 22:10-13) O ene mambo aya mpunzha o batendekejile kwitela’mba, “Yehoba-jaile,” kilumbulula mu Kihebelu amba, “Yehoba-umwena.”—Nte. 22:14.

10, 11. Bañanyi batangijila “mwingilo wa kupwainyamo bantu” ne Lesa, kabiji bengila byepi uno mwingilo?

¹⁰ Kulanguluka pa bintu byonse bitunengezhezha Yehoba, kwitulengela kuyuka kuba’mba kwa kubula kitapisho kya kwa Yesu Kilishitu kechi twakonsha kwikala balunda ne Lesa ne. Paulo wanembele’mba: “Mambo twalanguluka bino amba, muntu umo wafwijile bantu bonse. Kino kiji bino mambo bantu bonse bafwile kala; wafwijile bonse ne kusangulwa kuba amba aba baji na bumi kechi bobengatu bintu byo bakeba bene ne, poso kuba byo akeba.”—2 Ko. 5:14, 15.

¹¹ Bena Kilishitu batanshi baingilanga “mwingilo wa kupwainyamo bantu” ne Lesa na lusekelo mambo batemenwe Lesa kabiji bamusanchilanga bingi pa kwibapa jishuko ja kumwingijila. Mwingilo wabo kusapwila ne kulenga bana ba bwanga walengejile bantu ba michima ya kishinka kupwana ne Lesa, kwikala balunda bawama ne aye, kabiji mu kuya kwa moba baikele baana ba Lesa mwiulu. Mu ano moba, bakalume bashingwa ba kwa Yehoba nabo bengila yenka uno mwingilo. Bengila nobe bantomesha ba kwa Lesa ne Kilishitu. Uno mwingilo wa kusapwila ye bengila ulengela bantu bamichima ya kishinka kufwenya kwipi ne Yehoba ne kwikala bapopweshi banji.—Tangai 2 Kolinda 5:18-20; Yoa. 6:44; Byu. 13:48.

12, 13. Twakonsha kumusanchila byepi Yehoba pa bintu byavula byo etubila?

¹² Kusanta pa bibobila Yehoba aye Mpanyi Mukatampe kulengela mikooko ikwabo kukwatankana na bashingwa mu mwingilo wa kusapwila mambo awama. Mu uno mwingilo twingijisha Baibolo, bupe bukwabo bwanema bingi bwitupa Lesa. (2 Timo. 3:16, 17) Mu mwingilo wetu wa kusapwila, tupa bantu jishuko ja kukekala na bumi bwa myaka ne myaka kupichila mu kwingijisha bulongo Mambo a Lesa anembelwe na lutangijilo lwa mupashi wazhila. Yehoba upana ne mupashi wazhila wa kwitukwasha kutwajijila mu mwingilo wa kusapwila. Pa kuba’mba twingile bulongo uno mwingilo, atweba bonse twafwainwa kuketekela mu mupashi wazhila. (Zeka. 4:6; Luka 11:13) Bifumamo byawama bingi, nabiji byo tutanga mu mashimikila ekala mu buku wa Yearbook of Jehovah’s Witnesses ye tutambula pa mwaka pa mwaka. Ke jishuko jikatampe bingi kwingilako uno mwingilo utumbijika Shetu kabiji Mpanyi.

¹³ Byo kiji kuba’mba Lesa witupa bintu byavula, twafwainwa kwiipuzha amba: ‘Nanchi mbena kwingila papelela bulume bwami mu mwingilo wa kusapwila, kumwesha kuba’mba mbena kumusanchila Yehoba pa byonse byo ampa nyi? Nakonsha kuwamishako byepi busendwe bwami byo nji musapwishi wa mambo awama?’ Twakonsha kumwesha kuba’mba tumusanchila bingi Yehoba pa byo etubila kupichila mu kutangizhako Bufumu mu bwikalo bwetu. Inge twauba bino, Yehoba uketumwenanga byo tukajilwa mu bwikalo. (Mat. 6:25-33) Na mambo a kuba Lesa witutemwa, ne atweba twafwainwa kwibikako kusangajika muchima wanji.—Mana 27:11.

14. Yehoba watwajijila byepi kwikala Mupokolweshi wa bantu banji?

¹⁴ Nyimbi wa masalamo Davida waimbile’mba: “Amiwa ne muyanji ne wakajilwa; Nangwa byonkabyo aye Nkambo undanguluka: Anweba mwi nkwasho wami, mwi mupokolweshi wami.” (Sala. 40:17) Kimye byonse Yehoba upokolola bantu banji mu bujibumba, kikatakata inge kebebamanyike nangwa inge kebakebe kwibavizha ku balwanyi babo. Tumusanchila bingi Lesa pa byo etukwasha mu bimye bya uno mutundu, ne pa bintu byavula byo etubila pa kuba’mba  tutwajijile kwikala bakishinka kwi aye mu bino bimye byakatazha.

15. Ambai kyamwekele kibena kumwesha shetu watemwa mwananji byo amuzhikijila?

¹⁵ Shetu watemwa baana banji wibamwena bintu bya mu bwikalo ne kwibazhikijila. Mwayilatu kisemwa wibikako kwibapokolola inge baji mu kizumba. Mulongo umo uvuluka kyamumwekejile byo ajingatu mwanyike. Aye ne bashanji byo bafuminenga mu mwingilo wa kusapwila bataine kakola kayula na mambo a mvula mukatampe wanokele. Pa kuba’mba baabuke kano kakola, bafwainwe kukiluka kufuma pa jibwe jimo kuya pa jikwabo jajinga bushiya. Aye ye watendekejilepo kukiluka, byo auba’mba nyante pa jibwe, watezhimukile waponena pa mema, watomena ne jibiji. Uno mwanyike wafwainwa waumvwine bingi bulongo bashanji byo bamukwachile na ngovu pa kipuzhi ne kumupulusha! Shetu wa mwiulu naye witupokolola mu bizumba bya mu ino ntanda ibi ne kwi Satana, kalama wayo. Yehoba ye yenkatu wayuka kuzhikijila ye twafwainwa kuketekela.—Mat. 6:13; 1 Yoa. 5:19.

16, 17. Yehoba wakwashishe byepi ne kuzhikijila bena Isalela kimye kyo balwilenga na bena Amaleki?

¹⁶ Byamwekele panyuma kupokolola bena Isalela mu buzha mu Ijipita ne kwibabusha Kalunga Kachila mu jishinda ja kukumya mu 1513 B.C.E., bimwesha Yehoba byo azhikijila bantu banji. Byo bailenga mu kiselebwa, bafikile pa Lefidimu saka bakyangye kufika ku Mutumba wa Sinai.

¹⁷ Kwesakana na byaamba bungauzhi buji pa Ntendekelo 3:15, Satana wafwainwa wakebeshe bingi kulukuka bena Isalela pa kikye kimye mambo bamwekelenga nobe bapelelwa. Waubile bino kupichila mu kwingijisha bena Amaleki bajinga balwanyi ba bantu ba Lesa. (Bala. 24:20) Akilangulukai pa byaubile Yehoba kwingijisha bakalume banji bakishinka bana—ba Yoshua, Mosesa,  Alona ne Hula. Yoshua byo alwilenga nkondo na bena Amaleki, Mosesa, Alona, ne Hula bajinga peulu ya katumbatumba kajinga kipikipi nako balwijilenga. Bena Isalela bashinjilenga inge Mosesa wasuntula maboko. Inge maboko anji akoka, Alona ne Hula bamukwashishengako kwiasuntula. Na mambo a kuba’mba Yehoba wibakwashishe ne kwibazhikijila, “Yoshua wavizhizhe Amaleki ne bantu banji na mpoko.” (Lupu. 17:8-13) Mosesa washimikile kyakusokelapo bitapisho ne kwikitela mu Kihebelu amba, “Yehoba-nisi” kilumbulula’mba, “Yehoba kyo kyami kya kufyamamo.”—Lupu. 17:14, 15, NW.

18, 19. Lesa uzhikijila byepi bantu banji mu ano moba?

¹⁸ Yehoba uzhikijila bantu bamutemwa kabiji bamukokela. Byonka byo kyajinga kimye bena Isalela kyo bafikile pa Lefidimu, ne atweba tutalatu kwi Lesa kwitupokolola ku balwanyi betu. Yehoba uzhikijila bantu banji kikatakata mu bujibumba, ne kwibapokolola inge Daibola wibalukuka. Kya kumwenako, pa bimye byavula Lesa wapokolola balongo betu bavula bakana kwimvwanga mu bya pano pa ntanda na mambo a bwina Kilishitu. Kino kyamwekele mu kimye kya bukalama bwa bena Nazi mu Germany ne mu byalotu bikwabo. Kutanga ne kulangulukapo pa mashimikila a mu Yearbook amwesha Lesa byo azhikijila bantu banji mu ano moba kwitulengela kuketekela bingi mwi Yehoba kuba’mba kyo kyetu kya kufyamamo.—Sala. 91:2.

¹⁹ Yehoba witupa mafunde etuzhikijila kupichila mu jibumba janji ne mu mabuku o jinemba. Akimonai byo etukwasha pa myaka yapitapo. Ino ntanda byo ibena kuyatu na kutaminako na mambo a byubilo byatama nabiji bulalelale, bukitomi, ne kutamba bya mulekese, Yehoba witupa mafunde etukwasha kuchinuzhuka kuba bintu byakonsha kwitonawina bulunda bwetu ne aye. Kya kumwenako, Shetu wa mwiulu witupa mafunde etukwasha kuchinuzhuka kupwanañana na bantu babi kupichila mu mashinda a kwisambilamo a pa intaneti. *—1 Ko. 15:33.

20. Mu kipwilo betutangijila byepi ne kwituzhikijila?

²⁰ Twakonsha kumwesha byepi kuba’mba ‘Yehoba ubena kwitufunjisha’? Twakonsha kuba bino kupichila mu kukokela mikambizho yanji. (Isa. 54:13) Mu kipwilo mo mo betuzhikijila ne kwitutangijila. Mambo mo muji banabalume bakishinka batongolwa kwikala bakulumpe mu kipwilo bapana bukwasho ne lujimuno lwa mu Binembelo. (Nga. 6:1) Yehoba wapana bano “bantu kwikala bya bupe,” mambo bo bo engijisha pa kwitulama na kifyele. (Efi. 4:7, 8) Pano twakonsha kuba byepi inge betukwasha? Kwibanekenena na muchima yense ne kwibakokela kulengela Lesa kwitupesha.—Hebe. 13:17.

21. (a) Twafwainwa kutwajijila kuba ka? (b) Mu mutwe walondelapo tukesamba pa ka?

²¹ Twayai atweba bonse tutwajijile kulondela lutangijilo lwa mupashi wazhila. Inge ke tube bino ko kuba’mba tubena kukokela Shetu wa mwiulu. Twafwainwa kulangulukanga ne pa bwikalo bwa Mwananji, Yesu Kilishitu ne kwibikako kulondela byo aubanga. Na mambo a kuba wakokejile kufikatu ne ku lufu, Yesu bamupesheshe bingi. (Fili. 2:5-11) Ne atweba baketupesha inge twatwajijila kuketekela mwi Yehoba na muchima yense. (Mana 3:5, 6) Onkao mambo, twayai atweba bonse tutalengatu kwi Yehoba, Mpanyi kabiji wituzhikijila. Kumwingijila kwituletela lusekelo kabiji ke mwingilo wanema bingi. Pano Yehoba uji byepi nobe Mulunda netu wa kine? Butemwe bo twamutemwa bukabailako bingi byo tukakumbula buno bwipuzho mu mutwe walondelapo.